راجی مچی
شاعر: یوسف عجب
اِیسری کہ تادی تا قوم اَنا دا مُچی ءِ
راج اَنا دا مچی ءِ نا کنا دَا مُچی ءِ
داڈغار نا تِینا وارثی کروٸی ءِ
دُژمن وُ نہار آتا گُٹ اَٹی الوٸی ءِ
حق انا توار آ بر دو پہ دو مروٸی ءِ
تینا حق اکن کینہ نن بِنا دا مُچی ءِ
لنگڑو شپاد انگا قوم انا اواری ِکن
دا دتر نا ہولی ٹی, سُہب انا سہاری ِکن
بےگواہا تا آجوٸی , ایڑتا دا خواری کن
کینہ لمہ غاتا ہم نن پِنا دا مُچی ءِ
خواجہ اُن گدان آتا دا ڈغار تِیناءِ
بندی ان گُڑا انتیہ, گَر دا شار تِیناءِ
دشمن ہم اسٹ تینا,کل میار تِیناءِ
قوم انا اسٹی کن کُلنا دا مُچی ءِ
کونٹ اٹ ومٹ انتیہ سُہب شام شاغِن نن
یا کہ لاش توتک ٹی تینا ہَڈ پَٹن نن
کینسر آن کہین یاکہ روڈ آلاش ارفن نن
ظلم انا خلاف اینو ہُر نَنا دا مُچی ءِ
اٹ و مٹ مرین ٹُکر گوہنک جغر انتیہ؟
میر ٹکری سردار کیر درپدر انیتہ؟
قوم انا وہو نی پا دا وڑٹ دتر انتیہ؟
اَف خُلیس پاننگ ءِ ہَر چُنا دا مُچی ءِ
کودک آک مونجاوُ باوہ غاتا فریاد ءِ
لمہ غاتا زاری ءِ ,ایڑ اسے تو بیداد ءِ
ماتم ءِ اُراتے ٹی , دڈد اسے ٹی زیزاد ءِ
دافتا کمک کن تو خن خَنا دا مُچی ءِ
قوم دا اسٹ تِینا, خواہنہ اَسٹی ءِ
کھیترانی ءِ تینا,شان دا بلوچی ءِ
ہر زبان تینا ءِ دیدہ خن براہوٸیءِ
ناز اٹی عجب یوسف مہرنا دا مُچی ءِ