غزہ ٹی باہوٹی تا اسہ اسکول ئسے آ اسرائیل نا آسمانی جلہو نا سوب غزہ نا جانجوڑی کوالخواہ تا ردئٹ 90 آن زیات بندغ مرگ ئنا گواچی مسنو۔ دا جلہو غزہ جنگ ئنا بناء آن پد اسرائیل نا پارہ غان کروک بھلا جلہو تیان اسٹ ئسے۔
اسرائیل فوج جلہو نا ذمہ واری ارفسہ اسہ شاہدی اس ہم فراوان کننگ آن بیدس دعویٰ کرینے کہ اسکول ئٹ حماس نا کمانڈ سینٹر ئس۔
حوال تروک ادارہ ’اے ایف پی‘ نا ردئٹ غزہ نا سول ڈیفنس ایجنسی پارینے کہ اسرائیل باہوٹی تا اسکول آ مُسہ راکٹ خلک ہراڑان مرگ ئنا گواچی مروک بندغ تا کچ 90 آن 100 ئنا نیام ئٹ ءِ۔
غزہ نا جانجوڑی وزیر نا ردئٹ نیامی غزہ نا تابین اسکول آ جلہو ئٹ 47 بندغ ٹپی ہم مسنو۔ دا اسکول ءِ غزہ جنگ آن زیمی مروک آک رہینگنگ کن کاریم ئٹ ہتنگ ئسر۔
خن خنوک شاہد ابو انس پارے کہ جلہو ہموتم مس ہراتم بندغ آک اسکول نا تہٹی ساڑی مسیت ئٹ سہب ئنا نماز خواننگ ئسر اندن جلہو آن مُست ہچو حوال اس ہم تننگتوسس۔
ابو انس نا ردئٹ ”بندغ آک نماز خواننگ ئسر، گڑاس وضو کننگ ئسر و گڑاس بندغ زی آ خاچاسر ہرافتیٹ زالبول، چنا و پیر انگا ہم اوار ئسر۔ اسیکہ اسہ میزائل اس بس و اوڑان پد ایلو، پدا ہر جاگہ غا بندغی جون تا اُزبہ غاک تموک تالان ئسر۔“
اسرائیل لس شاری تا کسفنگ نا ذمہ وار حماس ءِ پائک ہرانا پاننگ ءِ کہ حماس اسکول و رہینگوک علاقہ تے تینا آپریشنل مسخت آتیکن کاریم ئٹ ہتیسہ بندغ آتا زند آتے بھیم ئٹ شاغنگ ءِ۔
اسرائیل پوسکنا جلہو ءِ اندنو وخت ئسے آ کرینے ہراڑے امریکہ، قطر و مصر نا ثالثی ٹی بدی دار آتے جنگ بندی معاہدہ نا خڑک آ ہتنگ نا کوشست برجاء ءِ۔
امریکہ برجاء دے تیٹ دعویٰ کریسس کہ جنگ بندی معاہدہ ایسری مرحلہ تیٹی ءِ۔
یاتی مرے غزہ جنگ نا بناء خدو ہفت اکتوبر آ حماس نا اسرائیل آ جلہو آن پد مسوسس۔ اسرائیلی کوالخواہ تا ردئٹ دا جلہو ئٹ 1200 بندغ مرگ ئنا گواچی و کم و ود 250 بندغ ءِ بندی کننگاسس۔
اسرائیل نا ورندی کارروائی ٹی غزہ نا جانجوڑی وزیر نا ردئٹ 39 ہزار آن زیات فلسطینی مرگ ئنا گواچی مسنو ہرافتیٹ بھلا کچ زالبول و چنا تا ءِ۔