سروزیر بلوچستان، سرفراز بگٹی درو اسمبلی نا مجلس نا وخت آ تران کرسا پارے کہ قرارداد آن بی ایل اے نا پنے کشنگ نا حالت انتئے بس، انت دا جلہو آتے بی ایل اے کتنے؟ اونا پن بلوچ لبریشن آرمی ءِ۔
او پارے کہ دا ایوان داڑے فیصلہ کے کہ نمے آزات بلوچستان نا اگہ مخ تفی ءِ کروئی ءِ گڑا اسہ کنڈ آ مبو، نن تو پاکستان و فیڈریشن نا ہیت ءِ کننگن۔
او پارے کہ اللہ کپ اگہ دافک بلوچستان ءِ آجو کریر گڑا اسہ ہندنو ریاست ئس ہرا تدوکا ہفتاد سال ناسے شیفی بڑزی تیٹ ءِ دنیکا بلوچستان نا گزران امر مرو۔
او دعویٰ کرسا پارے کہ ای بلوچ نا مسڑ تے پی ایچ ڈی کن انگلینڈ آ گدرنگ اُٹ و نم اسہ بلوچ ئسے ہرا قانود نا خوانندہ ئسے اودے نم جند ندر جیکیٹ ئس بینفنگرے گڑا دا فیصلہ ءِ بلوچ کے کہ بشیر زیب جوان کاریم کننگ ءِ یا نن جوان کاریم کننگن۔ دا فیصلہ ءِ بلوچ ءِ ہلوئی تمو۔
او پارے کہ ریاست نا برخلاف سوگو ءُ چم بازی کرسا نم مچا بلوچستان ءِ پلوٹ کننگ اُرے نم بلوچستان نا ورنا تے بیدادی نا پارہ غا دننگرے۔
سرفراز بگٹی دعویٰ کرے کہ بلوچستان آجو مننگ کپک، قیامت اسکان پاکستان سلو بیدادی نا ذریعہ ئٹ دادے پرغنگ کپیرے۔