زوراکی ئٹ بیگواہ نور عالم مری تون اوار ایلو بیگواہ بندغ تا آجو مفننگ نا برخلاف اینو کوئٹہ ئٹ برانز کننگا۔
زوراکی ئٹ بیگواہ بندغ تا خاہوت آک نور عالم مری نا یلہ کننگ کن وائس فار بلوچ مسنگ پرسنز نا کیمپ آن ریلی اس کشار ہرا عدالت روڈ، سرکلر روڈ، جناح روڈ، منان چوک آن مریسہ عدالت روڈ آ سر مریسہ ایسر مس۔
ریلی ئٹ اوار مروک آک نور عالم تون اوار ایلو بیگواہ کننگوک بندغ آتا آجوئی کن نعرہ خلکر۔
برانز کروک آتا پاننگ ئس کہ نور عالم مری ءِ 7 سال آن زوراکی ئٹ بیگواہ کننگانے ہرا دائسکان بیگواہ ءِ و اونا ہچ سماء اف کہ او ہراڑے کے۔
اوفک پاریر کہ دلشاد مری نا مار نور عالم ءِ اینو آن ہفت سال مالو اسہ لشکر کشی اسیٹی اونا اُرا یعنی ہرنائی آن زوراکی ئٹ بیگواہ کننگا ہرا دائسکان آجو کننگتنے، اونا پیر انگا لمہ اونا آجوئی نا امیت ئٹ تولوک ءِ نور عالم مری تون اوار زوراکی ئٹ بیگواہ غٹ بندغ آتا آجوئی نا خواست کینہ۔
برانزی تا پاننگ ئس کہ ننا بیگواہ کننگوک بندغ آتیا دوبہ اس ارے گڑا اوفتے عدالت آتیٹ ہتنگہ تاکہ قانود نا ردئٹ اوفتا برخلاف کارروائی مننگ کے۔ اگہ اوفک ہچو ڈوہ اس کتنو گڑا اوفتے دمدستی آجو کننگہ تاکہ اوفتا خاہوت آک ہرا تادی و دڑد آن تدینگ ءُ او تادی و ودار آن اوفتے خلاسی رسینگہ۔