بلوچ یکجہتی کمیٹی نا راہشون ڈاکٹر ماہ رنگ بلوچ، بنجاہی راہشون بیبرگ بلوچ، بیبو بلوچ و شاہ جی صبغت اللہ بلوچ تدوک پنچ دے آن بین برانز آ تولوک ئسور۔ بین برانز نا سوب اوفتا طبیعت آک ترندی ئٹ خراب مریسہ ئسور، اندنکہ اسہ توہ ئسے آن زیات وخت جیل ئٹ گدارینگ نا سوب آن اوفتا جانجوڑی مالو آن زیمی مروک ئس۔ اسہ رنگ بینگنی و ترند باسنی نا سوب اوفتا حالیت پین خراب مسوسس۔
بی وائی سی نا رد ئٹ بین برانز ءِ ایسر کننگ کن بلوچ چاگڑد نا جتا انگا تپہ فکر آن تعلق تخوک آ بندغ آک اسہ رنگ بلوچ یکجہتی کمیٹی نا قیادت تون حوال ٹی ئسور و خواست کریسہ ئسور کہ اوفک تینا بین برانز ءِ ایسر کیر۔ اینو، بلوچ بیگواہ بندغ آتا خاہوت آک، سیاسی بندی تا خاہوت و بھلا وکیل آتا تالان اسہ بھلو ٹولی اس جیل ئنا دورہ ءِ کرے و بلوچ یکجہتی کمیٹی نا قیادت آن خواست کرے کہ “ریاست ءِ نما ساہ ئنا پرواہ اف، ولے نن نما زند ءِ دوست تخنہ؛ گڑا ننا شرف ئٹ تینا بین برانز ءِ ایسر کبو۔”
جیل ئنا بست و بند بیرہ ڈاکٹر ماہ رنگ بلوچ، شاہ جی و بیبرگ بلوچ نا خاہوت و وکیل آتے اوڑدئی نا اجازت تس۔ اوڑدئی آن گڈ بلوچ یکجہتی کمیٹی نا قیادت زوراکی ئٹ بیگواہی آن زیمی خاہوت و وکیل آتا شرف ئٹ تینا بین برانز ءِ ایسر کننگ نا فیصلہ ءِ کریر۔