ریاستی تادی و بلوچ زالبول آتا محاذ
ٹی بی پی سرگپ
بلوچستان ئٹ زوراکی نا بیگواہیک اِرا دہائی آن برجا ءُ، واہم تدوکا سال تیٹ بلوچ زالبول آتا زوراکی نا بیگواہی تیٹ ہم پاش ودکی خننگ ئٹ بسنے۔ بیست و نو مئی آ بلوچستان نا بنجائی شار کوئٹہ ٹی سول اسپتال نا نرسنگ ہاسٹل آن ماہ جبین بلوچ ءِ زوراکی ئٹ بیگواہ کننگا، اندن اونا ایلم محمد یونس بلوچ ضلع واشک نا علاقہ بسیمہ ٹی اوفتا اُرا غان بیست و یک مئی آ برمتہ کننگاسس۔ ماہ جبین بلوچ نا خاہوت کیہی سال تیان ریاستی تادی تیتون مون تننگ ءِ۔ بلوچ راجی جہد اتون اواری نا سوب آن اوفتا خاہوت نا کیہی بندغ آک زوراکی ئٹ بیگواہ کننگانو یا بیدس عدالت کسفنگانو۔
اِرا ہزار بیست و پنچ نا اولیکو پنچ تُو ئٹ بلوچستان ئٹی زوراکی نا بیگواہی تیٹ بھلو کچ ئسے اسکان ودکی مسنے۔ واہم، بلوچستان نا متنازعہ حکومت دا بندغی حق آتا بھلا ویل آ پام تننگ نا جاگہ غا، اقتدار ئٹ مننگ کن مقتدر طاغت آتا پالیسی تیا عمل کریسہ بندغی گڑتی ءِ خن تیان چپ کننگ ءِ، حالانکہ بلوچ ویل ءِ ریاستی تادی ئٹ شیف کننگ و سیاسی راہشون تے جیل کننگ آ بندغی حق آتا ادارہ غاک چرجوئی ئٹ خُلیس نا درشانی کننگ ءُ۔
پنچ شرف مند جہانی بندغی حق آتا ادارہ غاک، ایمنسٹی انٹرنیشنل، دیمروی و بندغی حق آتا ایشین فورم، فرنٹ لائن ڈفینڈرز، بندغی حق آتا جہانی فیڈریشن، و ورلڈ آرگنائزیشن اگینسٹ ٹارچر بلوچستان ئٹ زوراکی نا بیگواہی و بیدس قانود ریاستی پالیسی تا برخلاف توار بڑز کرینو۔ دا ادارہ غاک 3MPO نا ردئٹ دزگیر سیاسی راہشون تا آجوئی و ریاستی تادی نا ایسری کن پاکستان نا سر وزیر آ چِھٹی ہم نوشتہ کرینو، ہرا دا ہیت ئنا پاش شاہدی ءِ کہ بلوچستان ئٹ بندغی حق آتا لتاڑ ءِ دروغ پاننگ مفک۔
اِرا دہائی تدینگ آن پد ہم پاکستان نا مقتدر طاغت آک دا گواچنی ءِ منپسہ کہ بلوچ زالبول آتا زوراکی نا بیگواہی و سیاسی راہشون تا دزگیری تیان بلوچ راجی آجوئی نا جہد ایسر کننگ مفک۔ ریاست نا برجا غا پالیسیک و بے سوبر آ گامک نئے بیرہ سیاسی مزاحمت ءِ توننگ ئٹ بے سہب مرور بلکن دا راجی مزاحمت ءِ گیشتر بش کرور۔