دا ظالم ءُ جابر تکے قہّارآک ہرادو
جنگ لؤز اٹی کیرک او قلمکارآک ہرادو
گودل تا دامُن آتے او رکّارہ غزل ٹی
چادر تکے والی تینے پاریرہ اول ٹی
جیجل تا گڑتی تے قلمبند کریرہ
ایڑو تا پِراد آتے وا موستی او دریرہ
پاریرہ تینے شان اٹی او ننگ ئنا وارث
دا ڈیھ ئنا دا جہد ئنا سہہ ئنا رنگ ئنا وارث
لمّہ تہ گُد آک جیل انا آہن ٹی تفوکو
دڑد آتیٹی پیوَندو الَم تیٹی گفوکو
زمزم او خڑینک آتے کہ پاریرہ ننا دُر
اوغنگ اٹی تیبہ ہمو کانیک سلیسُر
پاریرہ روا کپّنہ پلّو تیا نشان ئے
سیاسر تا ہورک چادر آ غیر آتا نشان ئے
جوزہ تا الہ حوصلہ ہمت تا ہرا مس؟
جیرت تا خننگپک الہ غیرت تا ہرا مس
لج آتکے او خُشک وا گُٹ آتے کریرک
ڈکھنگ کے تینا پَت ئنا جُھٹ آتے کریرک
دا خاخر ئے شعر آتیٹی کسفِر او مشکل ئے
گفتار اٹی دا رُمب ئے وا کٹّر او مشکل ئے
دھرتی نا ہرا دڑد اٹی بشخندہ کرینو
او ساندہ اولس کے تینے تابندہ کرینو
دون اف کہ کنا بیرہ کنا بیرہ دا جہدے
دا راج ئنا دا قوم ئنا ہر فرد ئنا جہدے
بر پاؤ نے شاعرک امر یار مریرہ
او گفت اٹی کڑدار ئنا استار مریرہ
فکر آتا گلاب کرڈ ئنا گواڑخ او مریرہ
بادوفر آ شاعرک مدام مون آ سلیرہ
چُپی ٹی ہرا دڑد ئے کہ درشان مریک پا
درشان مفک گر امہ درمان مریک پا؟
دا شال ئنا شاعرتا کہ باہ بیرے بھیم اٹی
کشّارہ درو بھیم ئنا گژغ آتے غزل ٹی
مستونگ نا سخن انتئکے دون برف تفینے
چار بند ئتو دیر چلتنی برف آتے کرینے
سنگت نا دیار آن الہ دیوان تا توار اف
جت بت نا سرونز آتا او ساز آتا خمار اف
غفّار نا جالب تے نظر دیر نا لگّا
تُنگانو سفا ٹکہ ئنا او خمب اٹی یکّا
بس پِن کے قلمکار ولیفیس اڑے قلّو
گفتار اٹی کڑدار اٹی تا فرق اسے بھلو
گل خان نا فراز آتا خنس خنتے نی بُڑزا
مونے تا کہ سِلّانو ائے کڑدآک مرید نا
نادان سلال زیدی آ پُھل آک گر ہنانو
دھرتی نا تینا دڑد ئنا درمان کے روانو
او بیرہ تینا کڑد ئکے دون گام کننگو
سد شونق اٹی دھرتی نا تینا پام کننگو
اے رابعہ بصری نا سُخن ساز تا ڈس اف
اے دلبر آ چاکر نا او جانباز تا ڈس اف
افلاک اٹی تینا اگہ شاھین گوہی خلپ
امیت مریک تل نا یقین نیام آن مریک کپ
گر خوف انا چاگڑد اٹی پاپ راج ئنا مرض ئے
شاعر تے امو پِن نا قتل واجب و فرض ئے
مُچّی تکے چِل بند ئے تو لکّھار کریر جوان
مُچّی نا داسہ کپئسہ رہبرک تِکے ایمان؟
پا زلم ستم کے مگہ مخصوص ارے وخت
مجلس تا گڑا انتئکے دون یند ارے تخت
ہر بند اٹی درکارے دتر جہد ئکے پاسہ
ہر شعر اٹی دا راج ئے سڑک آتیا خواسہ
نی سیال ئنا مونا تو توار شیف ہوراسہ
بس راج برانز آ، تینے ڈھکّاسہ شِناسہ
توار بلوچ