انسداد دہشت گردی ایکٹ – ٹی بی پی سرگپ
بلوچستان نا متنازعہ حکومت نا بے سوبر فیصلہ ہلنگ نا بھیم بش کروک لڑ برجاء ءِ۔ زوراکی نا بیگواہیک و ریاستی تادی نا برخلاف تیوہ بلوچستان ئٹ مخلوق برانز کننگ ءِ، واہم پاکستان پیپلز پارٹی نا متنازعہ حکومت بلوچستان اسمبلی ٹی انسداد دہشت گردی (بلوچستان ترمیمی) ایکٹ 2025 نا موکل ءِ تریسہ زوراکی نا بیگواہی کون آ بے راہبندی گام تے قانودی دروشم تریسہ ءِ۔
بلوچستان انسداد دہشت گردی ایکٹ 2025 سکیورٹی ایجنسی تے باقاعدہ چارج آتیان بیدس ہر بندغ ءِ عدالتی عمل آن گدارینگ آن بیدس مُسہ توہ اسکان دزگیر کننگ نا شابیت اختیار ایتک، ہرا منّنگ نا لائخ ءُ گام اس اف۔ داڑان پاکستان نا راہبند ئٹ تروک بنداوی حق آک پُلنگور۔
پاکستان و بلوچستان نا ساڑی آ متنازعہ حکومت آک بھلو وخت ئسے آن بلوچستان ئٹ زوراکی نا بیگواہی تیان نمن مریسہ بسنو، واہم دا ایکٹ ئنا موکل آن دا ہیت پاش مسنے کہ داسہ بلوچ سیاسی باسک آتا زوراکی نا بیگواہی و ریاستی تادی تے دروغ پاننگ ممکن متو۔
بلوچستان و جہانی تلہ غا زوراکی نا بیگواہی و ریاستی تادی نا برخلاف بش مروک توار تے چپ کرفنگ کن پاکستان پیپلز پارٹی نا متنازعہ حکومت زوراکی نا بیگواہی تے قانودی دروشم تننگ ءِ، تاکہ بیدس راہبند ریاستی گام تا برخلاف بش مروک تحریک آتے قانودی دروشم نا ذریعت ئٹ توننگہ۔
زوراکی نا بیگواہی تا بھلا ویل سوبر و بندغی بنداو آ تالان گام تا خواست کیک، ہرا گام تے ساڑی آ حکومت ارفپک۔ دا متنازعہ ایکٹ آن ریاستی تادی ءِ قانودی سوب دوئی مرو، ولے دا ویل ایسر مروف، و بلوچستان تون اوار جہانی ادارہ تیٹی دانا برخلاف توار بش مریسہ کرو۔