ریاست نا سروکی ٹی سوگو آ بیدادی – ٹی بی پی سرگپ
بلوچستان ئٹ سیاسی مزاحمت و آجوئی نا تحریک ءِ ایسر کننگ کن ریاستی ادارہ غاک تادی و بیدادی ءِ بنجاہی حکمت عملی جوڑ کرینو۔ اندا پالیسی نا سوب آن ریاست نا سیخا ٹی اندنو سلہہ بند ٹولی وجود ٹی بسنو، ہرافک بلوچ چاگڑد ئٹ بھیم، بشخ و چانٹ و بے باوری ودی کرینو۔ اندافتیان اسہ پنی ءُ دروشم اس شفیق مینگل و اونا ایلم عطاالرحمن نا ءِ، ہرا گمانی وڑئٹ خضدار و ایب کیب ئٹ ٹہیفوک ڈیتھ اسکواڈ آتا سروکی تون تفوک مسنو۔ زوتیٹ عطاالرحمن نا مرگ ئنا گواچی مننگ نا ذمہ واری ءِ بلوچ لبریشن آرمی ارفے، ہراڑان پد دا معاملہ دوارہ الس نا پام ئنا بنجاہ جوڑ مس۔
2008 آن گڈ ہراتم بلوچ مزاحمتی تحریک ئٹ ترندی بس گڑا ریاستی ادارہ غاک اودے پرغنگ کن ڈیتھ اسکواڈ کون آ ٹولی تے کاریم ئٹ ایسُر۔ دا ٹولی تیا بندغی حق آتا ترند لتاڑ آتا دوبہ غاک ءُ، ہرافتیٹ زوراکی نا بیگواہی، بیدس عدالت خون، زر اکن برمتہ، مذہبی شدت پسندی ءِ تالان کننگ، داڑیلی و ڈغار تیا کوزہ کون آ ڈوہک اوار ءُ۔ خضدار ئٹ ٹہفوک شفیق مینگل نا ٹولی ہمو غٹ کاریم تیتون تفنگانے، ہرافتیٹ اونا ایلم عطاالرحمن نا کڑد ہم کیہی رپورٹ آتیٹ پاش مسنے۔
اندا دوبہ غاتا ردئٹ 2014 ٹی توتک نا ہند آ اسہ اشتماعی قبر اس خننگا، ہراڑان 140 آن زیات جشوک جونک خننگار۔ او جون تا تیوہ چاہنداری مننگ کتئو ولے کیہی مبصر آک و بندغی حق آتا ادارہ غاک دا تدینی تے ریاستی سروکی ٹی مروک بیداد کاروائی تا چرجوئی پن کریسہ بسنو۔ پارلیمان نا تہٹی ہم دا ٹولی تیا سوج ارفنگسہ مسنے، ولے گمانی وڑئٹ ریاستی پالیسی نا بشخ مننگ نا سوب اوفتیا ہچو قانودی کاروائی اس کاریم ئٹ ہتنگ متنے۔
دا ہیت ہم ریکارڈ آ ساڑی ءِ کہ عطاالرحمن و اونا سنگت آتا برخلاف بھلا مقدمہ و عدالتی پرمان تیان پد ہم ریاستی ادارہ غاک اوفتا دزگیری ٹی بے سہب مسر۔ انگہ ملک نا نگران وزیر اعظم و وزیر داخلہ تا پارہ غان اوفتیتون اوڑدہی و اوفتا دفاع ٹی تروک بیان آک ریاست نا پامداری تیا سوبر ءُ سوج بش کرینو۔
بلوچستان ئٹ ریاستی کمک ئٹ جوڑ مروک دا ٹولیک نئے بیرہ سلہہ بند مزاحمت ءِ لتاڑنگ ئٹ بے سہب مسنو بلکہ اوفک چاگڑدی ڈھانچہ ءِ ہم نسخان تسنو۔ قبائلی دشمن آتیٹ ودکی مسنے، سیاسی طاغت آتیٹ بشخ و چانٹ کڑمب مسنے، و لس شاری ساندئی بے رکھ نا گواچی مسنے۔ عطاالرحمن کون آ بندغ آتے بلوچ سیاسی و چاگڑدی کڑدہ تیٹ ”راجی ڈوہدار“ خیال کننگک انتیکہ اوفتا کاریمک نئے بیرہ آجوئی نا تحریک ءِ نسخان تسنو بلکہ بلوچ چاگڑد نا آٹی ءِ ہم خراب کرینو۔
ریاست اگہ راستی نا ایمنی و سوگوی خوائک گڑا اودے دن انگا بے ریاستی بندغ آتا سروکی ءِ یلہ کروئی تمو، و بندغی حق آتے تینا پالیسی تا بنجاہ جوڑ کروئی تمو۔