سندھ ئنا علاقہ شکار پور ئٹ جعفر ایکسپریس ءِ بمب تراک ئٹ ٹک کننگانے۔
پولیس نا پاننگ ءِ کہ تراک شکار پور نا کیب ئنا علاقہ سلطان کوٹ نا خڑک ریل ئنا پٹڑی آ مس ہرا نا سوب راولپنڈی آن کوئٹہ غا ہنوکا جعفر ایکسپریس نا 4 ڈبہ پٹڑی آن شیف تمار۔
اوفتا پین پاننگ ءِ کہ تراک ہمو وخت مس ہراتم جعفر ایکسپریس سلطان کوٹ اسٹیشن آن گدرینگسہ ئس۔ تراک نا سوب ریل آتا ہن و بر بند مس۔
تراک نا ذمہ واری ءِ بلوچ سلہہ بند آزادی دوست تنظیم بلوچ ریپبلیکن گارڈز ( بی آر جی ) ارفینے۔
بی آر جی نا ترجمان دوستین بلوچ تینا بیان ءِ شینک کریسہ پارینے کہ سرمچار آک ریل ءِ ہمو وخت ٹک کریر ہراتم اوٹی کوزہ گیر پاکستانی لشکر سفر کریسہ ئس۔ تراک ئٹ کیہی کارندہ آک مرگ ئنا گواچی و ٹپی مسور۔
ترجمان پارے کہ بی آر جی دا جلہو نا ذمہ واری ءِ ارفک و دا ڈول ئنا جلہو آک بلوچستان نا آزادی اسکان برجاء مرور۔