بلوچستان نا ضلع واشک آن زوراکی ئٹ بیگواہ مروک بندغ نا سم تیٹ بروے جون خننگا، ہرا کم و ود 25 دے مالو پاکستانی لشکر نا دو آن بیگواہ کننگاسس۔
تحصیل بسیمہ پتک قادرآباد آن تعلق تخوک سی و ہشت سالہ محمد اعظم ولد عبد الرحمٰن، ہرا ہندی سطح غا اسہ دکاندار و تاجر ئسے نا ڈول درست مسکہ، 11 ستمبر 2025 آ تینا دکان آن پاکستانی لشکر اودے دزگیر کریسہ نادرست ہند آ سر کریسوس۔
خن خنوک بندغ تا پاننگ ءِ کہ محمد اعظم ءِ پاکستانی لشکر نا گاڑی ئٹ شاغسہ دننگا، و اوکان گڈ اونا ہچو ڈس متنے واہم 6 اکتوبر 2025 آ تقریباً 25 دے آن گڈ او نا سم تیٹ اسٹ جون ضلع واشک نا گوورگی ناگ نا علاقہ غان خننگانے۔
ہندی بندغ تا پاننگ ءِ کہ دا تدینی بلوچستان ئٹ زوراکی ئٹ بیگواہی و عدالت آن چپ خون آتا لڑ ئسے۔
بلوچستان ئٹ تدوک اِرا دہائی آن زوراکی ئٹ بیگواہیک اسہ بیم بش کروک بندغی المیہ اس جوڑ مسنو۔ ہندی و جہانی رپورٹس آتا رد ئٹ، سد آتا کچ اٹ خاہوت آک اینو ہم تینا بندغ تا واپسی نا ودار ئٹی ءُ۔
بلوچستان نا جتا ضلع آتیٹ سد آتا کچ بندغ بیگواہ مننگ و اوکان گڈ اوفتا جون آتا ملنگ نا کیہی تدنیک رپورٹ مسنو۔