تیوی بلوچستان اٹ کینسر نا ناجوڑی تینا بیدادی تے برجاء تخانے۔ زوت تدوکا سال آتیٹ دا ناجوڑی نا سوب آن بھلو کچ اسیٹی مخلوق دا کوڑی ءِ یلہ کرینے۔ کینسر آن کذیت کروک آتیٹ بھلو کچ اس چنا و ورنا تا ءِ۔
اینو شال آن تعلقدار چنک سن سلطان احمد دا کوڑی ءِ یلہ کرے۔ سلطان احمد گدروک سال آتیان کینسر نا جانجوڑی تون جنگ تننگ ئس۔
سلطان احمد براہوئی بولی نا شاعر اعجاز سنگت نا چنُکا ایلم ءِ۔ اعجاز سنگت شال ادبی دیوان نا صدر ءِ۔
کینسر نا مرض نا گواچی مروک آتا علاج کن بلوچستان اٹ ہچو ہسپتال اس اف۔ مخلوق ناجوڑ آتے تینا کمک تینٹ کوئٹہ و کراچی نا ہسپتال آتیٹ علاج کریفک۔ بھاز وخت اندن مریک کہ ناجوڑ نا خاہوت علاج کرفنگ کن وس تخپک۔