اوغانستان نا علاقہ ننگرہار اٹ بم تراک ئسے نا تدینی ئٹ نو چُنا بیران و چار ٹپی مسونو۔
حکام نا پاننگ ءِ کہ اوغانستان نا دے ٹکی صوبہ ننگرہار نا ضلع لالپوری ٹی بارودی مواد آتا تراک ئنا سوب آن نو چنا بیران و چار پین ٹپی مسونو۔
ننگرہار نا میڈیا دفتر آن اسہ بیان اسیٹی پاننگانے کہ پیشیم آن گڈ مکئی نا اسہ سٹال ئسے نا مونا تراک اس مس ہرانا دامون ایمون چناک مچ ئسر۔
تدینی نا اسی عینی شاہد اس مشال ریڈیو ءِ پارے کہ کہوک آتیٹی اسہ خاہوت نا پنچ چنا ئسر۔
ٹپی مروک آتے ننگرہار ریجنل ہسپتال آ دریر۔ ننگرہار ریجنل ہسپتال نا حکام آک پارینو کہ ٹپی مروک آتا حالیت خطرہ آن پیشن ءِ۔