بلوچستان نا ضلع بولان ئٹ جعفر ایکسپریس ریل گاڑی ءِ اینو نادرست بندغ آک بمب تراک اٹ ٹِک کریر ہراڑان ریل گاڑی نا انجن تون اوار چار ڈبہ تمار۔
مشکاف نا ہند آ مروک تراک آن جعفر ایکسپریس نا کہی سواریک ٹپی مسر و ریل گاڑی و ریل لین ءِ نسخان رسینگا۔ تراک آن گڈ کمکی کاریم تا بناء کننگہ و ہند آ ایف سی و لیویز نا کارندہ غاک ہم سر مسر۔
دا تراک نا ذمہ داری ءِ بلوچ سلاء بند گل بلوچ لبریشن آرمی ارفینے۔ بی ایل اے نا ترجمان جیئند بلوچ بیان اس شینک کریسہ پارینے کہ بی ایل اے سرمچار آک سبی آن خڑک بولان نا علاقہ مشکاف نا ہند آ کوئٹہ آن پنجاب ہنوک آ ریل گاڑی جعفر ایکسپریس ءِ شورہ تیتون ٹِک کریر، ہرانا سوب جعفر ایکسپریس نا چار ڈبہ لین آن تمار۔
ترجمان مُستی پارے کہ دا ٹرین اٹ کوزہ گیر پاکستانی لشکر نا کارندہ غاک چھٹی کن تینا اُراتیکن ہننگ ئسر ہراتم بی ایل اے حوالکار ونگ نا ڈھکوک حوال آ سرمچار آک دا کاروائی ءِ ایسری تسر۔ تراک نا سوب آن دا چار ڈبہ تیٹ ساڑی کہی فوجی کارندہ غاک کسکر و ٹپی مسر۔
و ایسر اٹ ترجمان پارے کہ آزات وطن نا دوئی کننگ اسکان ننا کاروائیک برجاء مرور۔
اسہ پین حوال ئسے نا ردئٹ سبی نا علاقہ لونی ئٹ فورس تون سلاء بند جھڑپ اسیٹ فورسز نا اسہ کارندہ اس مرگ نا گواچی و ارٹ ٹپی مسونو اند ایلو پارہ غان اسہ ورنا اس تینا لمہ تون اوار بیران مسونے۔
سرکاری کوالخواء تا ردئٹ فورس ڈھکوک حوال تا ردئٹ لونی نا علاقہ اٹ اُرا ئسے آ کاروائی کرے ہراڑے سلاء بند جھڑپ اٹ فورس نا ایس ایم رانا محمد اسلم کسک و میجر انور کمال اور حوالدار رحمت اللہ ٹپی مسونو۔
ایلو پارہ غان بیران مروک بندغ نا چائنداری پرویز نا پن ئٹ مسونے اندن اونا لمہ ہم بیران مسونے۔