بلوچستان نا دارالحکومت کوئٹہ نا خڑک علاقہ ہنہ اوڑک سورینج ئٹ پولیس تھانہ نا ہد و حویل ئٹ نادرست سلاء بند بندغ آک حبیب اللہ کول مائن کمپنی نا چار ملازم ءِ برمتہ کریر۔
ہندی مخلوق نا ردئٹ تدوکا نن سلاء بند بندغ آک پیہار و مزورکار آتیان مائن منیجر شیر بہادر نا اُرا نا معلومداری ءِ کریر۔
سلاء بند بندغ آک اونا اُراغا ہنار و مائن منیجر تون اوار چار بندغ ءِ برمتہ کریر۔ پولیس نا ردئٹ برمتہ مروک آتیٹ اِرا مائننگ انجینئر ہم اوار ءُ۔
تدینی آن گڈ پاکستانی فورسز کارندہ آک علاقہ ءِ گیڑ کریسہ ڈوہدار آتا پٹ و پول ءِ بناء کرینو ولے دائسکان ہچو سرسہبی اس دوئی کننگ کتنو۔
بلوچستان نا جتا علاقہ آتیان داکان مالو ہم کولا کانڑ مزور کار و منیجر آتے برمتہ کننگانے و اوفتے مرگ ئنا گواچی کننگ نا تدینیک ہم تدوک وخت ئٹ رپورٹ مسونو۔