بلوچستان فزیوتھراپی ایسوسی ایشن نا بین برانزی کیمپ 9 دے آن کوئٹہ پریس کلب نا مونا برجاء ءِ۔ اینو بین برانزی کیمپ ئٹ مسکوہی صوبائی وزیر نیشنل پارٹی نا سروک رحمت صالح، صوبائی فنائنس سیکرٹری عبیدلاشاری، بی ایس او پجار نا بنجائی کمیٹی نا باسک ظریف دشتی و بنجائی سروک آک کیمپ آ بریسہ اواری نا درشانی کریر۔
غٹ خواست آتے جائز پاریسہ اوفتا پاننگ ئس کہ فزیوتھراپی فیلڈ اینو نا پوسکنا دور ئٹی باز اہمیت تخک۔ ننا چاگڑد ئٹی دنو باز بندغ ارے ہرا جانجوڑی نا پوسکنا وڑ و ڈول آتیان بے سواد مننگ نا سوب آن اسہ ویلی ءُ زند اس گدریفنگ ءُ۔
ودیک تینا خیال آتا درشانی کریسہ اوفتا پاننگ ئس کہ دا ورناک ہرا پنچ سال خواننگ و اسہ سال ہاؤس جاب کننگ آن گڈ روڈ آ تا زیبائی جوڑ مسنو دا ننا حکمران آ تیکن شکی مننگ نا ہند ئسے۔ اگہ اینو بندغ آک تینا نظر آن پڑدہ ہفیسہ ورنا تے ہُریر تو اوفتے المی دا مارشت مرو کہ داڑے مسکین، بے روزگاری، ڈگری مننگ و خوئندی مننگ نا ہچ اہمیت اف۔
اوفتا پاننگ ئس کہ نن نیشنل پارٹی نا کنڈ آن حکومت وخت آن خواست کینہ کہ دا ورنا تا جائز خواست آتے اخس زوت مننگ کیک ایسر کننگ مرے۔ نن دا غٹ خواست آتا مخ تفی ءِ کینہ و غٹ تلہ آ تیا خوانندہ آتا مخ تفی ءِ کینہ۔
سینئر فزیوتھراپسٹ ڈاکٹر صدام، ڈاکٹرمنصور، ڈاکٹر افنان و ڈاکٹر جہانگیر ہم بین برانزی کیمپ ئٹ بریسہ پاریر کہ فزیوتھراپی فیلڈ ئنا آخوبت ءِ رکھنگ کن غٹ خواست آتے منیفنگ اسکان اوار مرون و ساندہ مونا بننگ و غٹ تلہ آ تیا اوار مننگ نا یخین ہم تسر۔
عوامی ورکرز پارٹی پاکستان نا موہکش صوفی عبدالخالق بلوچ ہم برانزی کیمپ آ بریسہ اواری نا درشانی کرے۔ تینا خیال آتا درشانی کریسہ اونا پاننگ ئس کہ دا ملک ئٹ ساندہ تینا حق ءِ ہلنگ کن جہد کروئی تمک و نن نُما دا جہد ئٹ بریبر نا شریک دار اُن۔