اقوام متحدہ نا بندغی حق آتا کونسل نا پنجاہ و یکمی باقاعدہ سیشن نا 29 میکو نشست آن تران کریسہ بلوچ نیشنل موومنٹ نا کماش ڈاکٹر نسیم بلوچ بلوچستان ئٹ اقوام متحدہ نا فیکٹ فائنڈنگ مشن ءِ مون تننگ نا خواست کرینے۔
اقوام متحدہ نا بندغی حق آتا کونسل نا باقاعدہ پنجاہ و یکمی سیشن جینیوا ٹی ستمبر آن الیس7 اکتوبر اسکان برجاء ئس۔
ڈاکٹر نسیم بلوچ دا مجلس ئٹ گپ و تران کریسہ پارے کہ نن نما پام ءِ پاکستان نا کنڈ آن بلوچستان ئٹ لتاڑوک آ بندغی حق آتا سخت خلاف ورزی تا پارہ غا کننگ خوانا۔
او پارے کہ اوڑے زوراکی ئٹ بیگواہی و بیدس عدالت آن خونک کہی سال آتیان ہڑدے نا کاریم ءُ۔ داڑان بیدس اندا توہ تیٹ دا تدینی تیٹی ودکی بسونے۔ برجاء سال اگست نا توہ اسکان پاکستانی لشکر 505 بندغ ءِ زوراکی ئٹ بیگواہ اندن 147 بندغ ءِ کسفے۔ بلوچستان نا علاقہ زیارت ئٹ کاؤنٹر ٹیررازم ڈیپارٹمنٹ دروغ نا مونتس ئٹی 11 بندغ ءِ کسفے ہراڑان گڈ اوفتیان 6 بندغ نا چاہنداری زوراکی ئٹ بیگواہ مروک بندغ آتیان مس۔
او پین پارے کہ لاہور، پنجاب پاکستان ئٹی سد آن زیات جونک رسینگار، ہرافتا دائسکان چاہنداری متنے۔ وا ہم دا باور کننگک کہ او جون آک زوراکی ئٹ بیگواہ بندغ آتا ئسر۔ دا بابت ئٹ پک مروک آ رپورٹ آک اریر کہ پاکستانی سکیورٹی ایجنسی و اونا ڈیتھ اسکواڈ آک چنا و نیاڑی تے بیگواہ کریر۔
ڈاکٹر نسیم بلوچ پارے انتئے کہ بلوچستان میڈیا و بندغی حق آتا ادارہ تیکن پابند ءُ علاقہ ئسے اندا سوب آن اونگان نا بیم بش کروک آ حالیت نا باروٹ ہچو حوال ئس مونا بننگ اف۔
او پارے کہ پاکستان جہانی قانود و بندغی حق آتا زمہ واری تا ہچ وخت شرف ءِ کپک۔ بلوچستان ئٹی اونا کاروائی تا برخلاف زوت پام تننگ نا گرج ءِ۔ ڈوہدار آتے المی وڑ ئٹ انصاف نا کٹہرہ ٹی ہتوئی تمو، نن بلوچستان ئٹ بندغی حق آتا ترندی ئٹ برخلافی تا پٹ و پول کن بلوچستان ئٹی اقوام متحدہ نا فیکٹ فائنڈنگ مشن ءِ مون تننگ نا خواست کینہ۔