بلوچستان نا ضلع نوشکی ٹی کاؤنٹر ٹیررازم ڈیپارٹمنٹ (سی ٹی ڈی) نا اسہ پین کارروائی ئس دروغ پاننگانے۔ ہرا ٹی مُسہ بندغ نا چاہنداری مالو آن بیگواہ مروک بندغ آتیان مسونے۔
سی ٹی ڈی نا شینک کروک اسہ بیان ئسے نا رد ئٹ تدوکا نن نوشکی نا علاقہ زرین جنگل ئٹ شکبر بندغ تا بر خلاف کارروائی نا وخت آ گمانی وڑ ئٹ چار بلوچ سلاء دوست بندغ خلنگانو۔ سی ٹی ڈی نا پاننگ ءِ کہ پن کروک بندغ آک ٹارگٹ کلنگ، بمب تراک و اِرا فروری آ نوشکی ایف سی ہیڈ کوارٹر آ مروک جلہو ٹی اوار مسنو۔
سی ٹی ڈی کوالخواک دعویٰ کرینو کہ کارروائی نا وخت آ اوفتیان سلاء و گولہ بارود ہم خننگانے اندن شکبر بندغ تا جون تے خاران اسپتال آ سر کننگانے۔
ٹی بی پی ءِ پٹ و پول آن سماء تما کہ پن کروک بندغ تیان اِرٹ نا تعلقداری نوشکی آن ءِ اندن مسٹمی نا تعلقداری خضدار نا علاقہ زہری آن ءِ ہرافتے جتاء وخت ئٹ زوراکی ئٹ بیگواہ کننگاسس۔ دا ہیت نا پک جون تا دروشم (پژہ، بوٹ و دے ئنا وے لگنگ آن جون تا پیہنی) تیان مریک کہ پن کروک بندغ آک دزگیر ئٹ مسنو۔
خون مروک بندغ تیان اسٹ نا چاہنداری فرید ولد میر عبدالرزاق بادینی ہند نوشکی نا پن ئٹ مسونے ہرادے 28 ستمبر 2022 آ کوئٹہ آن زوراکی ئٹ بیگواہ کننگا و ارٹمی بندغ نا چاہنداری سلال ولد حاجی عبدالباقی بادینی ہند نوشکی نا پن ئٹ مسونے ہرادے 6 اکتوبر 2022 آ کوئٹہ نا علاقہ بروری ریلوے کالونی آن اُرا غا چھاپہ خلیسہ زوراکی ئٹ بیگواہ کننگاسس اندن مسٹمی بندغ نا چاہنداری تابش وسیم ہند زہری نا پن ئٹ مسونے ہرادے 9 جون 2021 آ خضدار علی اسپتال آن زوراکی ئٹ بیگواہ کننگاسس۔
یاتی مرے سلال بادینی ءِ داڑان مالو 5 مارچ 2022 آ لاہور آن زوراکی ئٹ بیگواہ کننگاسس ہرادے اگست ئٹ یلہ کننگا اندن ارٹمی وار سلال ءِ دروغ نا مونتس ئٹ خلنگا۔ پن کروک ورنا تون اوار اسہ پین ورنا ہارون ولد شاہنواز بادینی ءِ بیگواہ کننگاسس ہرا داسکان یلہ متنے۔
سی ٹی ڈی و دروغ نا مونتس آک:
بلوچستان ئٹ سی ٹی ڈی نا کارروائی تے شکبر پاننگانے اندن کہی کاروائیک میڈیا و زیمی مروک خاہوت آتا کنڈ آن دروغ پاننگانو واہم حکومتی وزیر و کوالخواک دا کارروائی تا دفاع ءِ کرینو۔
برجاء منہ وخت ئٹ بلوچ راج دوست و بندغی حق آتا تنظیم آک سی ٹی ڈی آ دوبہ خلیرہ کہ ہنوک آ وخت ٹی بلوچستان ئٹ ہرا کاریم تے پاکستانی فوج و ڈھکوک ادارہ آک کریرہ ہمو کاریم تے اینو سی ٹی ڈی کننگ ءِ۔ دا ہیت نا درشانی ءِ بلوچستان نیشنل پارٹی نا راہشون و اسمبلی نا باسک سردار اختر مینگل ہم کرینے۔
اِرا دے مالو سی ٹی ڈی مستونگ نا علاقہ کابو ٹی آپریشن نا وخت آ چار شکبر ءُ بندغ خلنگ نا دعویٰ کرے ہرافتیان اِرٹ نا چاہنداری مالو آن بیگواہ مروک بندغ تیان مس ہرانا پک وائس فار بلوچ مسنگ پرسنز کرے۔
داکان مالو اکتوبر 2022 ٹی سی ٹی ڈی نصیر آباد ئٹ کارروائی نا وخت چار بلوچ آجوئی خواہوک ءِ خلنگ نا دعویٰ کرے او بندغ تا چاہنداری ہم مالو آن بیگواہ مروک بندغ تیان مس ہرافتے جتاء وخت ئٹ بیگواہ کننگاسس۔
اندن داڑان مالو برجاء سال جولائی ٹی پاکستانی لشکر زیارت نا خڑک آ اسہ مونتس اسیٹ بلوچ لبریشن آرمی آن تعلقداری تخوک 9 بندغ ءِ خلنگ نا دعوی کریسس واہم اوکان گڈ اوفتا چاہنداری مالو آن بیگواہ مروک بندغ تیان مسوسس۔
زیارت تدینی نا بر خلاف بلوچ بیگواہ بندغ تا خاہوت آک پنجاہ دے اسکان گورنر ہاؤس نا مونا تولوک برانز کریر ہرا بنجائی وزیر رانا ثناءاللہ نا باوری کننگ آن گڈ ایسر مس، ہراڑے برانزی تے کمیٹی باور کرفے کہ زوراکی نا بیگواہی تے توننگ کن گام ارفنگو و بیگواہ مروک بندغ آک دروغ نا مونتس ٹی خون مفرور۔
برجاء تدینی تیان گڈ بیگواہ بندغ تا خاہوت آتا خُلیس ئٹ ودکی مسونے اندن بندغی حق آتا تنظیم آتون اوار سیاسی ٹولیک ہم حکومت آ تنقید کننگ ءُ۔