بلوچ اسٹوڈنٹس آرگنائزیشن (پجار) نا سروکی ٹی سی ٹی ڈی نا دو آن دزگیر مروک ورنا تا خون نا برخلاف بلوچستان نا بنجائی شار کوئٹہ پریس کلب نا مونا برانز کننگا۔
برانزیک تدوکا دے نوشکی ٹی کاؤنٹر ٹیررازم ڈیپارٹمنٹ نا کنڈ آن دروغ نا مونتس ئٹ بیران مروک براہوئی بولی نا شاعر تابش وسیم ولد شریف زہری، فرید ولد میر عبدالرزاق بادینی، سلال ولد حاجی عبدالباقی بادینی نا خون تا بر خلاف برانز ریکارڈ کریر۔
برانزی تیٹ وائس فار بلوچ مسنگ پرسنز نا راہشون آک و ایلو سیاسی خوانندہ تنظیم تا باسک آک اوار مسر۔
دا وخت آ برانز کروک آتون ہیت کریسہ تران کروک آتا پاننگ ئس کہ ریاستی دہشت گردی تینا بڑزی ئٹ ءِ۔ بندغ تا لس خون بلوچستان ئٹ اینو ہم چرجوئی تون برجاء ءِ آئین و عدالت آک بلوچستان ئٹ بے سہب مسنو اندن بلوچ نسل کشی کن ریاستی مشینری ترندی ئٹ کاریم کننگ ءِ۔
اوفک پاریر کہ تدوکا دے نوشکی ٹی سی ٹی ڈی ہرا بندغ تے مونتس ئٹ خلنگ نا دعوی کریسس اوفتیان فرید ولد میر عبدالرزاق بادینی ہند نوشکی ءِ 28 ستمبر 2022 آ کوئٹہ آن زوراکی ئٹ بیگواہ کننگاسس، سلال ولد حاجی عبدالباقی بادینی ہند نوشکی ءِ 6 اکتوبر 2022 آ کوئٹہ نا علاقہ بروری روڈ ریلوے کالونی آن اُرا غا چھاپہ خلیسہ زوراکی ئٹ بیگواہ کننگاسس، اندا وڑ خضدار زہری نا ہندی تابش وسیم ءِ 9 جون 2021 آ بیگواہی نا گواچی کننگاسس۔
فورسز دا ورنا تے بھلو وخت اسکان دزگیر ئٹ تخنگ و بے دادی آن گڈ خون کریسہ جون تے خسا و دعوی کننگ ءِ کہ او سلاء بند تنظیم تا باسک آتے خلکونو ہرا دروغ ئسے۔
بی ایس او پجار نا راہشون تا پاننگ ئس کہ ورنا غا شاعر تابش وسیم اوفتا تنظیم نا باسک ئس اس او اوتھل ئٹ تنظیم نا ذمہ واری تے ایسری تسکہ۔ تابش وسیم و ایلو ورنا تا خون بلوچ خوانندہ جہد نا برخلاف ریاستی پالیسی تا چرجوئی ءِ، تنظیمی سنگت آتا قربانی تے اسُل گیرام کپرون۔
دا وخت آ بی ایس او پجار نا کماش زبیر بلوچ نا پاننگ ئس کہ تابش وسیم ءِ دے ئٹ اونا باوہ نا مونان ارفنگا و تابش وسیم کن تیوہ بلوچستان ئٹ برانز کریسس ولے 17 تُو آن گڈ اودے خون کریسہ خسنگ و مونتس نا پِن تننگ مسخرہ آن کم اف۔ نن خون مننگ ئٹ ایسر مفرون ننا ہیت ءِ بنوئی تمو۔
ایلو پارہ غا بلوچ یکجہتی کمیٹی تینا اسہ بیان اسیٹ نشتر اسپتال ٹی گمانی وڑ ئٹ جشوک جون تا، نوشکی و مستونگ ئٹ دروغ نا مونتس تا بر خلاف کوئٹہ بروری روڈ بی ایم سی آن ہاکی چوک اسکان دپدرشانی کننگ نا پڑو کرینے۔ بیان ئٹ الس آن ساڑی مننگ نا خواست کریسہ پاننگا کہ الس آن خواست کینہ کہ او دا زوراکی تا بر خلاف السی مزاحمت تون ہمکوپہ مریر و برانز ئٹ ساڑی مریر۔