حوال تا رِد ئٹ بلوچستان نا علاقہ خاران آن پین اِرا بندغ ءِ پاکستانی لشکر دزگیر کریسہ نادروست ءُ جاگہ ئسے آ درے۔
گیشتر حوال تا رِد ئٹ بیگواہ مروک بندغ آتا چاہنداری فیض محمد بادینی نا مارک یوسف بادینی و پرویز بادینی نا پن ئٹ مسونے۔
حوال تا رد ئٹ بیگواہ مروک آتیٹ یوسف بادینی ہرا کہ خاران بازار چیف چوک نا خڑک برنج سودا کیک، اودے ایف سی کارندہ آک صہب ئنا ایف سی کیمپ ئٹی برنج سر کننگ کہ پاریر وا مسہ تو اوار کاریم کروک اسہ مار ئسے تون ایف سی کیمپ آ ہنا ہراڑے فورسز اودے دزگیر کرے وا ایلو سنگت ءِ تا یلہ کرے۔
اندن اوکان گڈ فورسز خاران کلان مولوی مجید مسجد نا خڑک یوسف بادینی نا اُراغا چھاپہ خلک اُرا ٹی گڑا تے دانگ اینگ کرے پرغا اوکان گڈ ایلو ایلم پرویز بادینی ءِ ہم دزگیر کریسہ بیگواہ کرے۔
یاتی مرے کہ خاران ٹی بیست و چار گھنٹہ نا نیام ئٹی زورٹ بیگواہ مروک آتا پنج کیس رپورٹ مسونو تدوکا شام پاکستانی لشکر مسہ بندغ ءِ دزگیر کریسہ نادروست ءُ جاگہ ئسے آ درینے، بیگواہ مروکا ورنا تا چاہنداری پذیر احمد نا مار جابر یلانزئی، محمد حسین نا مار نجیب اللہ یلانزئی و عبدالرحیم نا مار شفقت یلانزئی نا پن تیٹ مسونو۔