بلوچستان نا علاقہ بولان نا ہند ڈھاڈر ئٹ پولیس تھانہ آ مروک بمب جلہو نا ذمہ واری ءِ بلوچ لبریشن آرمی ارفے۔
پولیس نا رد ئٹ تدوکا نن یک بجہ نا وخت نادرست بندغ آک ڈھاڈر تھانہ آ چغلی بمب ئٹ جلہو کریر ہراڑان اسہ کارندہ ئس کسک۔
پولیس کوالخواہ تا پاننگ ئس کہ کہوک آ پولیس کارندہ عابد حسین سولنگی بھاگ شار نا ہندی اس ئس۔
تھانہ آ مروک جلہو آن گڈ پولیس علاقہ ٹی ہن و بر ءِ بند کریسس۔
بلوچ لبریشن آرمی نا ترجمان جیئند بلوچ تینا شینک کروک بیان اسیٹ دا جلہو نا ذمہ واری ءِ ارفیسہ پارے بلوچ لبریشن آرمی نا سرمچار آک تدوکا نن بولان نا علاقہ ڈھاڈر ٹی پولیس تھانہ ءِ چغلی بمب جلہو ئٹ ٹک کریر، تراک نا سوب آن اسہ پولیس کارندہ ئس مرگ نا گواچی مس، اندن تھانہ ءِ بھاز نسخان رسینگا۔
ترجمان پارے کہ بلوچ جہدکار تا بر خلاف پولیس نا قوضہ گیر پاکستانی لشکر تون مخ تفی نا سوب آن پولیس تھانہ آ جلہو کننگا۔ نن پولیس ءِ ہر وار خبڑدار کرینن کہ او بلوچ تحریک نا بر خلاف کاریم کننگ آن مُر مریر، نہ تو جلہو تا کچ ئٹ ودکی کننگو۔