اینو بلوچ یکجہتی کمیٹی نا کنڈ آن حکومت پاکستان و کینیڈین کمپنی بیرک گولڈ نا نیامٹ مروک گپ و تران نا بر خلاف کوئٹہ ٹی برانزکننگا ہرا ٹی بھلو کچ اسیٹ زالبول آک و جتاء تپہ تیان تعلقداری تخوک بندغ آک اوار مسر و ریکوڈک گپ و تران آ تینا خُلیس نا درشانیکریر۔
برانزیک تران کریسہ پاریر کہ ریکوڈک آن مالو ہم داڑے ہراتم بلوچستان نا مڈی تا سودا کننگانے تو دانا نتیجہ ٹی نہ بیرہ مڈی تا لٹ وپل مسنے بلکن دا سامراجی کمپنیک تیوہ بلوچستان ئٹ تینا گندہ غا مسخت آتے ہم ایسری تسنو و بلوچستان نا مڈی تیا کوزہ تون اواربندغ آتون ناروا سلوک، توار تے چُپ کرفنگ، ہندی بندغ آتے اوفتا پوریا تیان ہم نیست تخنگانے و ہندی بندغ آتون غلام تا وڑ سلوککننگانے۔ چاغی نا علاقہ ٹی سیندک دانا پاش ءُ مثیل ئسے ہراڑے ہندی بندغ آک پیشن ملکی بندغ و کوزہ گیر تا کنڈ آن زوراکی آ سلوکتون مون تننگ ءُ۔ سی پیک نا دروشم ئٹ ہم اینو بلوچ آک ترند بیم تون مون تننگ ءُ۔
تران کروک آک پاریر کہ اگہ دا مڈی تا سودا و لٹ و پل ئٹ ہندی بندغ تے گڑاس رسینگانے گڑا او بینگنی، غریبی، نیستی، خون و نسلکشی ءِ دافتیان بیدس پین ہچ ئس رسینگتنے۔ بلوچ مڈی تیان ایلو صوبہ غاک تو آباد مسر ولے بلوچستان اینو ہم بیابان ءِ ہراڑے بندغ تےبنداوی آسراتیک دوئی افس و بلوچ آتا لس خون برجاء ءِ۔
اوفک پاریر کہ بلوچ اسہ زندہ ءُ راج ئسے و اینو تینا ساحل و وسائل تا رکھ آن واخب ءِ۔ اگہ ریاست تینا ذمہ واری ءِ پوروْ کتو و بدلہ ٹیبلوچستان نا الس ئنا مڈی تے لٹ و پل کروک کاریم ءِ بس کتو گڑا بلوچستان نا الس تینا ڈغار و اونا مڈی تا رکھ ءِ تینا سیاسی جہد نادروشم ئٹ برجاء تخو و ہراتم اسکان ریاست دا مڈی تے بلوچستان نا الس ئنا دوٹی تختنے او تینا جہد ءِ برجاء تخور۔ اینو بلوچستان ءِاسہ کالونی ئسے نا وڑ ڈیل کننگک و ہراڑے لٹ و پل نا وار ئس دو بریک تو کل اسہ وار آ دو بٹیرہ ولے بلوچستان نا الس تینا طاغت و وسئنا رد ئٹ دافتا برخلاف جہد ءِ برجاء تخو۔