بیگواہ بلوچ خوانندہ راہشون ذاکر مجید نا مرغنا بیگواہی و یلہ مننگ نا بابت کوئٹہ پریس کلب ئٹ سیمینار اس اڈ تننگا ہرا ٹی جتاء فکر ئنا بندغ تیتون اوار بھلو کچ اسیٹ ورنا و بیگواہ بندغ تا خاہوت آک اوار مسر۔ سیمینار ئٹ بیگواہ ذاکر مجید نا لُمہ ہم اوار مس و ساڑی مروک آک تران کریر۔
تران کروک آک پاریر کہ ذاکر مجید اسہ خوانندہ راہشون و بلوچستان ئٹ تیوہ غاتیان زیات چاہنگوک آ راہشون تیٹ حساب مریک۔ او اسہ سیاسی باسک ئسے نا دروشم ئٹ بلوچستان نا کنڈ کنڈ ئٹ ہنیسہ الس ءِ چاہنداری تسکہ و اوفتا حق و ریاستی ناانصافی تا بابت شعور تالان کریکہ ولے بد بختی آن اودے تدوک 14 سال آن زندان ئٹ بند کننگانے و اودے بے بندغی اذیت تننگک۔ ذاکر نا بابت دائسکان ریاستی ادارہ غاک چپ ءُ۔ ذاکر نا لُمہ و ہیڑ گودی فرزانہ تدوکا 14 سال آتیان اونا یلہ مننگ کن جہد کننگ ءُ ولے ریاستی ادارہ غاک ذاکر نا بابت معلومداری تننگ ئٹ بے سہب ءُ۔
اوفک پاریر کہ زوراکی نا بیگواہی ہرا اسہ بے بندغی عمل ئسے۔ جہانی و ملکی قانود ئٹ اسہ بندغ ئسے زوراکی ئٹ بیگواہ کننگ بھاز بھلو ڈوہ ئسے۔ بلکن بلوچستان جہان نا ہمو اسٹ انگا ڈیہہ ءِ ہراڑے قانود نا رکھوک آک قانود ءِ لتاڑیرہ۔ سکیورٹی فورسز آتا پارہ غان تدوکا بیست سال ئٹ ہزار آتا کچ ئٹی بلوچ ورنا تے زوراکی ئٹ بیگواہی نا گواچی کننگا، کیہی جشوک جونک خسنگار، ہزار آ ورناک کیہی سال آتیان زندان تیٹ اذیت آتون مون تننگ ءُ۔ زوراکی نا بیگواہی تا دا بھیم بش کروک آ لڑ دے پہ دے آن ودیسہ ءِ و اینو دا ٹی ترندی خننگک۔ بلوچ خوانندہ و معصوم بلوچ ورنا تے بیدس اسہ ڈوہ ئسے آن برمتہ کریسہ زوراکی ئٹ بیگواہی نا گواچی کننگک۔
تران کروک آک پاریر کہ زوراکی نا بیگواہی تا دا عمل نہ بیرہ زوراکی ئٹ بیگواہ بندغ تے اسکان ءِ بلکن دا عمل آن تیوہ ءُ اسہ خاہوت اس اشتماعی بے دادی تا گواچی مریک۔ بلوچستان نا ہزار آ خاہوت آک دا وخت تینا دوستخواہ تا یلہ مننگ کن اُننگ ءُ۔ کیہی لُمہ غاک سال آتیان تینا مار تا یلہ مننگ کن سڑک آتیا درپدر خڑینک شولنگ ءُ۔ کیہی اُرا تا اسٹ انگا ذمہ وار آک بیگواہ ءُ و بلوچ خاہوت آک ذہنی و مالی سختی تا گواچی ءُ۔ ریاستی ادارہ تا پارہ غان زوراکی نا بیگواہی تے سیاسی اسپر ئسے نا دروشم ئٹ کاریم ئٹ ہتنگک۔ دا عمل آن تیوہ غا چاگڑد ئٹ اسہ بھیم اس تالان مسنے۔ ہیت کروک آ توار تے دا بے بندغی عمل نا وسیلہ ئٹ چپ کرفنگک۔ و ولدا بیگواہ بندغ تا خاہوت آتے اسہ وڑ ئسے نا ہم قانودی حق تننگپک۔
ساڑی مروک آک پاریر کہ ذاکر مجید تون اوار کیہی بلوچ خوانندہ غاک تدوکا دہ سال آن زوراکی ئٹ بیگواہ ءُ و بے دادی تون مون تننگ ءُ۔ ذاکر مجید بلوچستان ئٹ بلوچ خوانندہ راہشون مننگ تون اوار بلوچ راج اکن اسہ سوگوْ ءُ توار اس ہم ئس ہرادے چپ کرفنگ کن ریاستی ادارہ غاک ذاکر مجید ءِ تدوکا 14 سال آن زوراکی ئٹ بیگواہ کریسہ اودے ازیت تننگ ءُ۔ ذاکر مجید نا زوراکی نا بیگواہی ءِ 14 سال پوروْ مسنے۔ ذاکر مجید نا لُمہ 14 آن تینا جغر نا ٹکر نا یلہ مننگ کن درپدر ءِ۔
اینو 08 جون آ ذاکر مجید نا زوراکی ئٹ بیگواہی نا بابت اسہ سیمینار اس اڈ تننگا ہرا ٹی جتاء فکر آتیان تعلقداری تخوک بندغ آک اوار مسر و زوراکی نا بیگواہی تا دا بے بندغی و بے قانودی عمل ءِ ایسر کننگ نا خواست کریر۔ سیمینار ئٹ ایڈووکیٹ عمران بلوچ، بیگواہ ذاکر مجید نا لُمہ، ایڈووکیٹ شاہ زیب، پروفیسر لالا منیر، بیگواہ آصف و رشید نا ایڑ سائرہ بلوچ تون اوار ایلو بیگواہ بندغ تا خاہوت آک تران کریر و ذاکر تون اوار غٹ بیگواہ بلوچ بندی تا یلہ کننگ نا خواست کریر۔
