پیشن نا ڈیہہ تیٹ باہوٹ مروک بندغ تا بارو ئٹ اقوام متحدہ نا ادارہ یو این ایچ آر سی 14 جون چار شمبے نا دے تینا پوسکنا رپورٹ ءِ شنگ کریسہ پارے کہ تیوہ جہان ئٹ 110 ملین بے اُرا ءُ بندغ ریکارڈ مسنو۔
رپورٹ نا رد ئٹ پیشن نا ڈیہہ تیٹ باہوٹ مروک بندغ تا کچ ئٹ داخس ودکی نا سوب اسٹ تو یوکرین نا جنگ و ایلو سوڈان ئٹ پوسکنا جیڑہ ءِ، ہرافتا سوب آن بھلو کچ اسیٹ بندغ آک تینا اُرا و ڈیہہ تے النگ آ بیوس مسنو۔ ہنوکا سال آن اینخو دا کچ ئٹ 19.1 ملین نا ودکی مسنے۔ و 2023 ٹی ہم کیہی بندغ آک تینا ڈیہہ تیان ہمپ ءَ لڈ کننگ ءُ۔
اقوام متحدہ نا رپورٹ ئٹ دا ہم پاننگا کہ امیر آ ڈیہہ تا جاگہ غا جہان نا غریب آ ڈیہک باہوٹی تا ذمہ واری ءِ ارفنگ ءُ۔
رپورٹ ئٹ پاننگا کہ 2022 نا سال ئنا ایسر اسکان تیوہ جہان ئٹ تقریباً 4.4 ملین بندغ بے اُرا و بے وطن ئسر، ہرا نا کچ ئٹ اینخو اِرا درسد اسکان ودکی مسنے۔
سال 2022 ٹی یوکرین نا جنگ کیہی بندغ آتا بے اُرا مننگ نا بنداوی سوب ئس انتئے کہ دا نا سوب ان باہوٹی تا سال 2021 ئٹ بیرہ 27,300 نا کچ ودیسہ سال ئنا ایسر اسکان 5.7 ملین اسکان سر مس۔ ارٹمیکو جہانی جنگ آن گڈ دا باہوٹی تا غٹ آن بھلا کچ ئس۔
داکان بیدس کولمبیا و پیرو دا حوال تسنو کہ جہانی رکھ کن وینزویلا آن ہم بھلو کچ اسیٹ بندغ آک سر مننگ ءُ۔ اسہ پین رپورٹ ئسے نا رد ئٹ ایران ئٹ ہم اوغان باہوٹی تا کچ ئٹ ودکی مسنے۔
رپورٹ نا رد ئٹ کیہی باہوٹیک تینا رزا و رکھوک وڑ ئٹ دوارہ تینا ڈیہہ تیا ہِننگ نا قابل مسنو ہرا اسہ بھلو اومیت ئسے۔
سال 2022 ٹی 339,000 آن زیات باہوٹی تینا رزا ئٹ 38 ڈیہہ تیٹ تینا اُرا تیا واپس ہنانو، اندن 5.7 ملین ڈیہہ تا تہٹی بے اُرا مروکو بندغ ایتھوپیا، میانمار و شام ئٹ تینا اُرا تیا واپس ہنانو۔