شمالی امریکہ نا ملک کینیڈا ٹی نا درست بندغ آک بھارت نا خواہوک سکھ ئنا خون ءِ کریر ۔
شابیتی حوال تا ردئٹ کینیڈا نا شار ونیپیگ ٹی نا درست بندغ آک سم کاری کریسہ بھارت آن پنجاب نا جتائی نا خواست کننگوک بھارتی سرکار نا خواہوک سکھ راہشون دول سنگھ (سکھا دونیکے) نا خون کننگا ۔
پیشن ملکی میڈیا رپورٹ آتا ردئٹ سکھدول سنگھ بھارت ٹی غٹ آن زیات خواہوک بندغ نا فہرست ئٹ اوار ئس، بھارتی ایجنسی این آئی اے ہم دافتا برخلاف وارنٹ شینک کریسس ۔
ایلو پارہ غان بھارتی میڈیا کسفنگوک سنگھ بھارت ٹی خواہوک گینگ باسک قرار تریسہ پارے کہ اودے اینو کینیڈا نا شار ونیپیگ ٹی کسفنگانے ۔
پیشن ملکی میڈیا رپورٹ آتا ردئٹ سکھدول سنگھ نا تعلق بھارتی پنجاب آن ئس ، سکھدول سنگھ 2017 آن کینیڈا ٹی ہندی ئس ۔
دا تدینی اسہ اندنو وخت ئسیٹ مونا بسونے ہراتم کینیڈا ٹی اسہ سکھ راہشون ہردیپ سنگھ نجر نا خون آ بھارت و کینیڈا نا نیام ئٹ سفارتی گشیدگی برجاء ءِ ۔
اوکان مالو کینیڈین وزیراعظم جسٹن ٹروڈو نا پارہ غان بیان ئٹ پاننگاسس کہ کینیڈا ٹی کسفنگوک سکھ راہشون ہردیپ سنگھ نجر نا خون ٹی بھارتی ڈھکوک ایجنسی ” را “ تون اوار مننگ نا وے منوک رد ثبوت رسینگانے ۔
دا بیان آن گڈ کینیڈا بھارتی ایجنسی ” را “ نا راہشون ءِ ملک بدر کننگاسس اندن بھارت کینیڈا نا دوبہ ءِ وے منیسہ جوابی کاروائی ٹی سینیئر کینیڈین سفارتکار ءِ ملک ءِ الینگ نا حکم تننگاسس ۔
کینیڈا ٹی سکھ راہشون ہردیپ سنگھ نجر نا خون آن گڈ بھارت و کینیڈا نا نیام ئٹ ودی مروک کشیدگی آن گڈ بھارت تینا شاری تیکن ایڈوائزری برجاء کننگاسس ہرادے کینیڈا آن توننگانے ۔
ایلو پارہ غان تدوکا دے کینیڈا ٹی سکھ و مسلم راہشون آک حکومت آن خواست کریسہ پاریسس کہ او اوفتا برادری نا برخلاف مننگ کروک بھش بش کننگ ءِ توننگ کن گیشتر گام ارفر ۔
یاتی مرے کی ہردیپ سنگھ ءِ 18 جون 2023 ٹی کینیڈا ئٹ گوردوارہ نا پیشن خون کننگاسس ۔