زوراکی ئٹ بیگواہ کننگوک بیگواہ میر تاج محمد سرپرہ نا زہیفہ صالحہ مری نا پاننگ ئس کہ کنا ارغ میر تاج محمد سرپرہ ءِ ریاستی ادارہ آک 19 جولائی 2020 آ کراچی آن بیگواہ کننگاسس ، او دائسکان بیگواہ ءِ و اینو اسکان ، کنا ارغ نا قسمت و جا نا درست ءِ ۔ دڑد بھاز کڑمب ءِ ، ولے انصاف نا توار پین ہم ترند ءِ ۔ ای چھپ مفروٹ ۔
ہمو وخت بلوچ وائس فار جسٹس میر تاج محمد سرپرہ نا رکھوک آجوئی نا خواست کریسہ پارے کہ ریاست اسہ منصوبہ سے تون بلوچ بندغی مڈی تے لغت تننگ ءِ ، بلوچ راج نا باشعور بندغ تے میڑیسہ زوراکی ئٹ بیگواہ کننگیک یا خون کننگیک، ریاستی ادارہ آتا دوتیان بلوچ خوانندہ سیاسی و راجی باسک ، ٹیچرز ، ادیب ، دانشور بلکن کاروباری بندغ آک ہم رکھوک افس ، میر تاج محمد سرپرہ اسہ قبائلی راہشون تون اوار اوار اسہ سیاسی ، راجی و کاروباری بندغ ئسر اوفتے بے سوب زوراکی ئٹ ٹک کننگ بنیاتی بندغی حق آتا سخت بر خلاف ءِ نن خواست کینہ کہ بلوچستان ٹی بندغی حق آتے لتاڑنگ نا لڑ ءِ بند کریسہ میر تاج محمد سرپرہ تون اوار غٹ بیگواہ بندغ تے آجو کننگے ۔