بی وائی سی تون راج ئنا مہر
نوشتکار: پروفیسر بُرزِش بلوچ
دی بلوچستان پوسٹ
بلوچ یکجہتی کمیٹی نا نیمہ غان بیست و چھار جون آ مروکا شٹر ڈاؤن ہڑتال، بیرہ اسہ ہڑتال ئس الو بلکن بلوچ راج ئکن اُمیت و روشناہی، دژمن کن بربادی نا علامت ئس ہرادے ای تو پاو دژمن بھاز جوان وڑئٹ خَنا و محسوس کرے ولے ای انت پاؤ یا ہرا لوز آتیٹ بلوچ راج ئنا مہر ءِ نُما مون آ تخیو ، اگہ تیخو تو ہرا لوز آتو تخیو؟ انتئے کہ ای ہرا مہر ءِ راج ئنا خناٹ و تینا است آ ماراٹ، اگہ او بھلا انگا مہر لس ہنگا لوز آتیتون درشان کیو گڑا بلوچ راج ئنا مہر ئتون نا انصافی ئس مرو ۔
ہڑتال آن اسہ دے مُست بلوچ یکجہتی کمیٹی نا سنگت آک پمفلٹ بشخنگ کن بازار نا نیمہ غا پیشتمار گُڑا راج سنگت آتے خننگ تون اسہ ہندُنو خوشی ئس بنا کرے کس پائے عئید نا نوک ءِ خنانو ہر اسٹ ءِ خنوس گل و بال ئس و خوئشی ئٹ ہندا گپ کریسہ پاریکہ اے ماہ رنگ نا بندغ آک بسونو۔
ایلو نیمہ غان کوزہ گیر نا کرایہ والا فوجیک ہم بازار ئٹ ٹیلاپ کریرہ، او اُرارہ کہ نوا ننے بلوچ خنے ننا خننگان خلیس نا گواچی مرے ولے راج دافتے خننگتون اسہ ہندنو نفرتی ءُ نگاہ سیئٹ اُراکہ ہرانا اسل کچ اف۔
او خنا کہ بلوچ راج تینا جہدکار آ ایلم و شیرزالا ہیڑ تیتون اخس مہر کیک و اوفتے اخس شرف ایتک و کنے آن اخس نفرت کیک
ای تو پاو بلوچ راج ئنا مہر بی وائی سی تون لَکھ سِتا کڑزک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔