ننا راجی شہید آتا دتر نا بدل مزاحمتی جہد و ننا راجی مزل ءِ۔ ڈاکٹر ماہ رنگ بلوچ

ڈاکٹر ماہ رنگ بلوچ تینا شنگ کروک بیان ئٹی پارے کہ ای اینو داڑے اسہ ہیت ئس نُما کُل ئنا مونا پاش کیوہ کہ ہرا بندغ آک پاننگ ءُ کہ بلوچ راجی مچی ٹی شہید مروکا بندغ آتا دتر نا معاوضہ ہلنگ مرے، نن اوفتے سدھا غا لوز آتیٹ پانہ کہ ننا شہید آتا دتر داخس اڑزان اف کہ نن تینا شہید آتا دتر نا نا بدل ئٹ زر ہلین و نئے نن زر ہلیسہ بلوچ راجی شہید آتا بے شرفی ءِ کرون۔ ننا راجی شہید آتا دتر نا بدل دا مزاحمتی جہد و ننا راجی مزل ءِ۔ نن نہ بلوچ راجی مچی ٹی شہید مروکا تینا بندغ آتا دتر نا معاوضہ ہلون و نئے کس ءِ دُن کننگ نا موکل ایتون۔ ننا راجی شہید آتا دتر نا بدل پنچ دہ لکھ اف بلکہ جہد مسلسل، مزاحمتی جہد، راجی یکجہتی و راجی مزل ءِ۔

او پارے کہ داکان بیدس بلوچ راجی مچی نا کاروان ئٹ ٹپی مروکا سنگت آتا علاج کن ہم نن دا ریاست آن زر خواہوفن بلکہ داڑان چپ، نن تینا کمک تینٹ ئٹ غٹ ٹپی مروکا سنگت آتا علاج کرون۔ اگہ داڑکن ننے اُرا اُرا چندہ کروئی تما ہم نن کرون ولے دا ریاست آن اسل زر ہلوفن و ثابت کرون کہ بلوچ اسہ زندہ و دلیر ءُ راج اسے۔

ماہ رنگ بلوچ پارے کہ بلوچ راج، دا جہد سگ ءِ چکاسوک و مرغنو جہد اسے، ہراڑکن جہد مسلسل نا خواست ءِ و داٹی سرسوبی سوگو حوصلہ و قربانی نا جوزہ آتیان مرو۔ ننے باور ءِ کہ ہر گھام آ دا ریاست تون مون ایتون و دا جہد ءِ مونا درون و سرسوبی ننا ءِ۔