پاکستانی لشکر بلوچ راجی مُچی نا تیاری تیٹ اختہ کراچی تون اوار کوئٹہ غان جلسہ نا بست و بند کروک آتے دزگیر کریسہ نادرست ہند آ درے ہرافتیٹ بلوچ یکجہتی کمیٹی و بی ایس او نا باسک آک دائسکان مونا ہتنگتنو۔
پاکستانی لشکر نا دو آن جلسہ غان اِرا دے مالو کراچی پولیس اسہ اُرا ئسے آ چھاپہ خلیسہ بلوچ یکجہتی کمیٹی کراچی نا ذمہ وار بالاچ بلوچ ءِ بیدادی آن پد تینتون دریسس، اسہ ہفتہ اس تدینگ آن پد ہم بالاچ بلوچ مونا ہتنگتنے۔
بالاچ بلوچ نا کراچی آن دزگیری آ بلوچ یکجہتی کمیٹی پارینے کہ بالاچ بلوچ ءِ گوادر جلسہ نا کاریم تا سوب پولیس و سادہ وردی بینوک ڈھکوک ادارہ تا کارندہ غاک دزگیر کریسر ہراڑان پد بالاچ نا بابت اونا خاہوت و بی وائی سی ءِ ہچو حوال فراوان کننگتنے۔
ارٹمیکو پارہ غان گوادر جلسہ غان اِرا دے مالو پاکستانی لشکر بھلو کچ اسیٹی کوئٹہ نا اسہ ہند ئسے آ چھاپہ خلیسہ بلوچ اسٹوڈنٹس آرگنائزیشن نا اسہ ٹولی ئسے نا چیئرمین جیئند بلوچ و اونا سنگت شیرباز ءِ دزگیر کریسہ نادرست ہند آ دریسس۔
دا بابت جیئند بلوچ نا زائیفہ رضوانہ بلوچ پارے کہ اونا اَرغ ءِ گوادر ئٹ اڈ تروک جلسہ نا تیاری تا سوب دزگیر کننگا واہم او ہمو دے آن بیگواہ ءِ و مونا ہتنگتنے۔
گوادر ئٹ بلوچ یکجہتی کمیٹی نا راجی مچی جلسہ نا سوب دائسکان درزن آ بندغ آک دزگیر کننگانو ہرافتیٹ کیہیک دائسکان ہچو عدالت و پولیس تھانہ اسیٹی مونا ہتنگتنو۔
بلوچ یکجہتی کمیٹی نا ردئٹ ریاستی فورسز آتا پارہ غان اوفتا گوادر جلسہ ءِ لتاڑنگ نا کوشست ئٹ دائسکان اسہ ہزار آن زیات سنگت و بست و بند کروک بندغ آتے دزگیر کننگانے اندن دزگیر مروک آتیٹ کیہی تا ڈس ئنا بابت ہم ننے ہچو حوال فراوان کننگتنے۔