بلوچستان نا ضلع کیچ نا علاقہ ہوشاب ئٹ زمان جان و عبدالحسن نا خاہوت ارٹمیکو دے ہم تینا برانز ءِ برجاء تخار، اینو اسہ ریلی اس ہوشاب بازار آن بنا مریسہ ہوشاب زیرو پوائنٹ آ ایسر مس، ہراڑے برانزیک فورسز آتا دو آن زوراکی ئٹ بیگواہی نا گواچی تینا بندغ آتا دمدستی یلہ کننگ نا خواست کریر۔
برانز کروک آک، ہرافتیٹ زالبول و شاری تا بھلو کچ اس اوار ئس، دوبہ خلکر کہ زمان جان و عبدالحسن ءِ ڈسٹرکٹ کونسل چیئرمین ہوتمان دروہ ئٹ خوائفسہ کاؤنٹر ٹیررازم ڈپارٹمنٹ نا دوٹی تس ہراڑان پد ہڑتوم آ ورناک مونا ہتنگتنو۔
خاہوت نا ردئٹ اینو اوفتا زوراکی ئٹ بیگواہی ءِ نو میکو دے ءِ ننے صبر کننگ کن پاننگاسس، ولے داسہ پین چپ مننگ کپنہ اگہ ننا چناک تے یلہ کننگتو گڑا نن تینا برانز ءِ برجاء تخون۔
ایلو پارہ غان تولوک برانز نا سوب ہوشاب زیرو پوائنٹ آ سی پیک کسر نا بند مننگ آن ہن و بر سلیسنے، و خاہوت نا پاننگ ءِ کہ اوفک ہمو وخت اسکان برانز ءِ ایسر کپرور ہراتم اسکان اوفتا بندغ آک بتنو۔
خاہوت کوالخواہ تیان خواست کرینے کہ اوفک دمدستی اوار تمر و اوفتا چنا تا آجوئی ءِ یخینی جوڑ کیر نئے گڑا، برانزیک تینا تحریک ءِ گیشتر ترند کننگ نا درشانی کرینو۔