بلوچستان نا ضلع کیچ ٹی پاکستانی فورسز نا کارندہ آتا دوتیان زوراکی نا وڑ بیگواہ کننگوک اسہ پین ورنا ئسے نا بےدادی نا گواچی مروک جون ئس خننگانے ۔
شابیتی احوال آتا ردئٹ کیچ نا علاقہ پیدارک ٹی ہندی بندغ آک اسہ ورنا ئسے نا جون دوئی کرینو، ہرادے چاہنداری کننگ کن ٹیچنگ اسپتال تربت آ دننگا۔
اسپتال ذرائع نا ردئٹ جون ئنا چاہنداری عثمان ولد مقبول، ہند پیدارک نا پن آن مسونے ۔
عثمان نا خاہوت نا ردئٹ اودے 24 اگست آ تربت آن پاکستانی فورسز نا کارندہ غاک دزگیر کریسہ تینتون دریسر و اینو اِرا دے آن گڈ اونا جون خننگانے ۔
خاہوت نا پاننگ ءِ کہ دا اولیکو تدینی اف ، عثمان داکان مالو 2019 ٹی ہم پیدارک آن زوراکی ئٹ بیگواہ کننگاسس و او اِرا سال آن گڈ آجو مسس، داسا اسہ وار پین زوراکی ئٹ بیگواہی نا گواچی مننگ آن گڈ اونا خون ءِ کریر ۔
چاہنداری آن گڈ خاہوت اسپتال آن عثمان نا جون ءِ دوئی کرینے ۔
یاتی مرے کہ برجاء تُو بلوچستان نا جتاء ضلع آتیان شش جون رسینگانو ہرا ہمو بندغ آتا ئسر ہرافتے پاکستانی فورسز دزگیر کریسہ بیگواہ کریسس ۔
اگست ٹی دائسکان 52 بندغ نا زوراکی ئٹ بیگواہی تا رپورٹ دوئی مسونے و 12 بیگواہ بندغ آجو مسونو ۔