انصاف نا خون – ٹی بی پی سرگپ
پاکستان سپریم کورٹ نا جسٹس اطہر من اللہ بیدس عدالت خون ءِ راہبند و بنداوی بندغی حق آتا ترند لتاڑ گوندسہ تربت ئٹ لمہ باوہ نا مونا حیات بلوچ ءِ کسفوک بلوچستان فرنٹیئر کور نا کارندہ شادی اللہ نا مرک ئنا سزا نا برخلاف تروکا خواست ءِ منتو۔ واہم سپریم کورٹ نا مُسہ باسکی بینچ دو یک نا رد ئٹ ودکی فیصلہ شینک کریسہ ڈوہدار نا مرک ئنا سزا ءِ عمر قید ئٹ بدل کرینے۔
کراچی یونیورسٹی نا خوانندہ حیات بلوچ ءِ 13 اگست 2020 آ تربت نا علاقہ آبسر ئٹ اونا لمہ باوہ نا مونا ایف سی کارندہ شادی اللہ ہشت سُم خلیسہ کسفیسس۔ حیات بلوچ نا بے ڈوہ آ خون بلوچستان ئٹ ترند السی ردعمل ودی کرے، ہرا ریاستی تادی نا برخلاف اسہ مزاحمت اس ودی کرے ہرا اینو ہم جتا دروشم آتیٹ برجاء ءِ۔ واہم السی مزاحمت و عدالتی فیصلہ تیان پر ہم بلوچستان ئٹ سیاسی باسک آک و زوراکی ئٹ بیگواہ بندغ آتا بیدس عدالت خون تا لڑ ایسر مننگ کتو۔
حیات بلوچ نا خون ءِ پنچ سال پورو مسنے، ولے دا سال تیٹ پولیس نا دروغ نا مونتس تا پِن آ سد آ بلوچ ورناک بیدس عدالت کسفنگانو۔ بلوچستان ئٹ ہر بھلا تدینی آن پد بلوچ ورنا تے کسفسہ اوفتا جونک بیابان تیٹ خسنگ نا عمل دائسکان برجاء ءِ۔ ریاستی بیدادی نا دن انگا تدینی تا برخلاف بش مروکا توار آک طاغت نا زور آ ایسر کننگسہ ءُ، اندن ایلو پارہ غان اندا علاقہ تیٹ ایمنی و دیمروی نا دعویٰ ہم مریسہ ءِ۔
بلوچستان ئٹ عدالت آتا فیصلہ غاک عملی دروشم ئٹ ہچبر نافذ متور۔ مقتدر طاغت آتا زور آ انصاف ءِ کسفسہ تینا فیصلہ تے الس آ مسلط کریسہ بسنے۔ زوتیٹ بلوچستان نا حالیت آتا بدل مننگ نا ہچو آثار خننگپک۔ واہم عدالتی انصاف نا مفننگ آن پد ہم حیات بلوچ و ایلو ورنا تیکن بلوچستان آن توار بش مریسہ کرو۔