وطن زاد۔۔۔۔!
نوشتکار: جعفر قمبرانی
دی بلوچستان پوسٹ
لمہ، ای نا مار افٹ، ولے آؤ ای نی و نن کل دا ڈیہہ ئنا چناک اُن ہرا کیہی ہزار سال آتیان ننے تینا باہوٹ ئٹ کرینے۔
لمہ جیجا، ای دا چار لوز ءِ نیکن دا سوب آن نوشت کننگ اُٹ کہ نے آن شکایست کیو، نے نا پنت آتے یات ایتیو ہرافتیا ای اینو اسکان عمل کریسہ اُٹ کہ دروغ پاننگ رد ءُ عمل ئسے، راست ءِ ڈھکنگ نامڑدی ئسے ولے اینو ہمو پنت آتیا عمل کننگ نا وخت کنا مون آ کل آن بھلا اڑاند نی اُس، انتئے ؟
لمہ جان یات کر، دا نی الویس مگہ ہرا کنے چُنکی آن دا پنت تریسہ بسکہ کہ کنا چنا دروغ پاننگ بھاز خراب ءُ گڑا ئسے۔ نی پاریسہ کہ دروغ تو چٹ خراب ولے راست ءِ ڈھکنگ ہم جوان انگا بندغ آتا کاریم افک۔ کنے یات ءِ کہ نی اسہ وار کنا بھلا ہیڑ ءِ چپانٹ اس خلیسہ پاریس کہ دروغ انتئے تڑینس، نی اودے تیوہ غا دے سزا ٹی تخاس و او نا اِرغ دیر ءِ بند کریس۔ ہموکان پد ای راست ءِ تینا دوی نا پَچخ جوڑ کریسہ دروغ آن توبہ گار مسوٹ۔
لمہ نا چپانٹ، چِڑنگ و پنت آتا سیخا ٹی ہراتم ای بھلن مریسہ آلی بالی مسوٹ، چار لوز خواناٹ، یا دن پا کہ مِش و زار کریٹ۔ داسا کنا مون آ دروغ آک بھلن و راست ئنا بالاد ہم گیشتر مس۔ داسا دروغ ئنا داد آک بھلن ءُ و راست پاننگ نا سزا سگ آک پیشن۔۔۔!
داسا کنا راست بیرہ ٹِلی، فٹو و چداک التوس بلکن دنکہ نی چاسہ کہ ای ہندن ءُ ڈیہہ ئسے نا بھاتی اُٹ ہراٹی دروغ ئٹ تیوہ غا نظام چلنگک و اسہ راست آن تیوہ غا ڈغار اجمب کیک۔
لمہ، ای ہراتم دا ڈیہہ ئٹی بھلن مسوٹ تو خناٹ کہ راست پاروک آک گِر و پانچ مریسہ بے ڈس کننگرہ۔ ای خناٹ کہ ہمو راست پاروک آتے تارمہ غا کوٹی تیٹی بجلی نا تار آتیٹ کرنٹ تننگ مریک، زِیل آک پلاس پنی ءُ ازباب ئسے ئٹ چکنگ و کشنگ مریرہ، بدن نا سُو تے بدن آن خرما نا وڑئٹ جتا کننگک، خن و دروشم تیا تیزاب خسنگ مریک تانکہ خنک ہشنگسہ راست ءِ خمپس، خفک پتک ہلیسہ گواچن ءِ بمپس و دوی ہشنگہ تانکہ راست پیشن مف….!
ای خناٹ کہ کنا ڈیہہ ئنا ہمو زالبول ہرادے کنا تیوہ غا راج شرف ایتک ولے دژمن اودے راست پاننگ کن گم کریسہ زندان تیٹی خسِک، چندی تے بے ڈس کریسہ چُپ کرفک، تا ابد چُپ۔۔۔۔!!!
لمہ، ہراتم ای راست پاروک آتے خناٹ کہ لاش جوڑ مریسہ پَٹ بیابان و گیاوان آتیٹی تموک ءُ و بدن ئٹ تا پُوک سریرہ۔ ای خناٹ کہ کنا ڈیہہ ئنا بابت راست پاروک آک زندہ ءُ ہم ہرا گندئی نا زند تدیفنگ آ بے وس ءُ۔ اوفتا با ئنا نا باخو ہم پلنگک، اوفتا زرگرانی حالیت آتے ہندن بدحال کننگک کہ تپسہ ارانگ کان امر کین۔
ولے لمہ جان، چندی تیان بیدس کس اس تا ہم راست پاننگ بس کپک۔ اوفتا حالیت ءِ خنیسہ کنا ہم پُٹ آک جک مریرہ، ای ہم اسہ وار سوچاٹ کہ راست پاننگ آن چُپ مننگ فائدہ ءِ و چُپی آن بڑزا دروغ نا فائدہ غاک بھاز ءُ دنکہ زند، زر، لاری و وڈّاہی۔۔۔!!
لمہ، ای دائسکان دروغ و راست نا کسر نا فیصلہ کتؤسٹ کہ خدا نا پارہ غان کنا دویک اِرٹ کننگار۔ یعنی خدا کنے نوشت کننگ نا طاغت ہم تس۔ کس پائے خدا کنے ہکل تریسہ پارے، داسا نی تران کیس یا نوشت، ولے نا کسر ءِ اسٹ مروئی ءِ۔ “دروغ یا گڑا راست”.
لمہ جان، کنے نا پنت آک یات بسر، ای ہمو کسر ءِ گچین کریٹ ہرا نا سبخ ءِ نی کنے تسوسہ۔ گڑا انتئے کنے داسا راست پاننگ کن تینا پجار ءِ ڈھکوئی تمک؟ انتئے کنے راست پاننگ کن ہر بندغ ڈوبارِک؟ انتئے نی و ننا خڑک ئنا ہر بندغ فریشان مریسہ کنے اسہ سر یلہ و کس مر ءُ بندغ اس تکک؟
کنا لمہ! نی پار مگہ راست پاننگ خدا نا پیغمبر آتا کاریم اف؟ مگہ اوفتے راست اکن زند و مرگ ئنا نیام کسر اس گچین کروئی متؤسس؟، مگہ کنا ڈیہہ ئنا دلیر آک خلیس آن راست ءِ راست پاتنو؟، نی مگہ پاتؤسہ کہ راست پابو تانکہ ہمو حالیت ئٹی ہم کہ کس اس زغم دوٹی نما لخ ئنا خلنگ کن سلوک مرے!
قربان، دن امر مریک کہ کنا ڈیہہ ئنا بھاتیک ہڑ جنجال ئٹی مرگ و بیگواہی نا گواچی مریر و ای تینا خن تے شیف کریسہ اوفتا حالیت ءِ پاننگ آن ہم تینا قلم ءِ کاریم ئٹ ہتپر۔۔۔!
دن امر مریک کہ ای بلوچ اس مریسہ نوری نصیر خان، خان کریم خان، حمل و شورش نا پدریچ مریسہ بھیم ئنا گواچی مریو؟، لمہ جان، ڈیہہ ئنا بزگی ءِ نی ہم امنا کریسہ ڈیہہ ءِ آجو خننگ نا حسرت تخسہ ولے داڑکن الواد ودی کننگ انتئے تپیسہ؟
لمہ جان، خدا ٹی اُر، اینو آن تینکن آخہ، ڈیہہ اکن ورنا و شیرزال ودی کر ہرا ڈیہہ ئٹ ساڑی خرما تیتون جیڑہ کریسہ ڈیہہ ئنا باہوٹ ئٹ کار نئے کہ زند ابد نا پاناد آ تولوک اُرا، خاہوت، زر، زلف، مال و جارات نا بابت ٹک خلیسہ زند تدیفر۔
لمہ، نن کل ڈیہہ ئنا اُن و ننا کل الواد آک ڈیہہ ئکن ودی مریرہ نن ڈیہہ ئنا باہوٹ ئٹ ودی مسونن و ننے ڈیہہ ئنا باہوٹ ئٹ کذیت کریسہ ڈیہہ ئکن ندر مروئی ءِ۔۔۔!
“باور کیس نن کل تینا ڈیہہ ئنا چناک اُن”
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔