طالبان حکومت نا ترجمان ذبیح اللّٰہ مجاہد پارے کہ سعودی عرب نا وسیلہ ئٹ مُسہ پاکستانی فوجی ءِ روچئی نا وخت آ جیل آن یلہ کننگانے۔
ذبیح اللّٰہ پارینے کہ فوجی تے دوانزدہ اکتوبر آ جاندمی افغانستان ئٹ ڈیورنڈ لائن آ طالبان نا سرکاری فوج نا “بیر ہلنگ” آتا وخت دزگیر کننگاسس۔
طالبان حکومت نا بنجائی ترجمان پین پارے کہ ‘امارت اسلامیہ پارے کہ او بندی تے ایلو ڈیہہ تیتون جوان انگا تعلقداری تے برجا تخنگ نا سوب آن یلہ کننگا’۔ او پارے کہ جنگ ئنا وخت پاکستانی لشکر افغان نا پارہ غان اسہ ہم فوجی اس بندی کتو۔
طالبان حکومت نا پارہ غان شینک مروک آ بیان ئٹ پاننگانے کہ ‘امارت اسلامیہ افغانستان کل ڈیہہ تیتون جوان انگا تعلقداری نا پالیسی آ زور شاغنگ نا رد ئٹ روچئی نا توہ ئنا بننگ نا اعزاز ئٹ ہرا کہ رحمت و بخشش نا توہ ءِ و ایلمی ڈیہہ سعودی عرب نا پارہ غان مذاکراتی ٹولی نا خواست ئٹ دو شمبے نا دے کابل سر مروک مُسہ پاکستانی فوجی تے یلہ کننگا۔