بلال جان نا شہادت، سریاب ئٹ انقلاب اس ودی کرے
تحریر: مش یار بلوچ
دی بلوچستان پوسٹ
سنگت آک ہر دیوان ئٹی اندا ہیت ءِ کریرہ کہ سریاب ءِ بش کبو، سریاب ءِ جوڑ کبو، گڑا اسہ سوچ اس بریک کہ سریاب ءِ امر شعوری بنیاد آ جوڑ کین و امر مزاحمت ءِ زندہ کین۔ دا ہیت ٹی ہر سنگت تینا صلہ ءِ تس گڑاس پاریر خواننگ ٹی مونا ہتین تا، گڑاس پاریر تحریک ٹی اوار کین تا۔ دا کل صلہ تیان گڈ اسہ فیصلہ اس دا مس کہ داسہ تحریک نا ہر ہڑتال و دھرنا ءِ سریاب آن بناء کین۔
دا فیصلہ آن گڈ اولیکو ریلی ماہل بلوچ نا وخت آ منہ سنگت ڈگری کالج آن شروع کریر، او دھرنا ئٹ منہ سنگت اوار ئسر، دا دھرنا مونی ہنیسہ کرے و مخلوق بھاز مریسہ کرے۔ دا دھرنا ٹی گچین ءُ جوزہ اس ئس ہر اسٹ اس کہ دھرنا نا مخلوق ءِ خناکہ دو بڑزا وکٹری نشان تسکہ گدرینگاکہ، دا نشان ٹی او کلہو تسر کہ نن نمتون اوار اُن۔
دا گڑا تے سنگتاک خنار او تینا ارٹمی فیصلہ غا بسر کہ نن مُست تینا ریلی تے ریڈ زون آ کشانہ و اخس دے و نن دھرنا تسونہ ننا راج نا چنا و ورناک اوڑے متنو، ننا راج نا وارث آک سریاب ٹی تولوک ءُ، نن ءِ داسہ دا راج نا ہر چنا چنا ءِ جوڑ کروئی ءِ۔
دا فیصلہ ٹی ئسر کہ بلال جان سریاب ٹی گچین ءُ انقلاب اس ایس۔
اونا دڑ، دے ئنا قصہ غاک کل جتا ءُ
مخنگٹ کرے شنک تینے ہنا ءُ
کہ نن خنبو آجو نا دے تے سفا ءُ
اونا ڈکھ و ویلاتا بدلک نما ءُ
سریاب ٹی مزاحمت ہمو وکت زندہ مس ولے دا مزاحمت اسہ چپ ءُ مزاحمت اس ئس۔ سریاب تینٹ اسہ مزاحمت نا جاگہ ئسے، دا مزاحمت ءِ ہر بندغ پوہ متنے کہ سریاب ٹی ہر ہمو ورنا دشمن ئِ ہر کنڈ آن خلیسہ ہنان ءِ۔ شہید نظام جان نا دلیری سریاب کن مثل جوڑ مس، اندن شہید فیضان شاہوانی و شہید ظہور نا کڑد و فلسفہ ارے گڑا سریاب نا ہر ورنا نا مزاحمت جتا ءُ اس ایتک۔
و داسہ سریاب تینا مزاحمت ءِ دے پہ دے آن پوسکنو دروشم اٹ ہتنگ ءِ۔ بلال جان نا دروشم ٹی اسہ گچیں ءُ انقلابی ءُ رنگ اس بش کرے۔ دا دکّ دشمن نا مغز ءِ پورہ شَل کرے، دشمن اندن مس کہ اودے متئو کنے ہراکان دکّ اس خلکر۔
بقول ہیڑ شہناز؛ نن دشمن ءِ ہموکان شَل، و دک کلین ہراکان اودے گمان ہم مف۔ اندن اینو بلال جان دشمن پورہ شَل کرے۔
او دا پیغام تس کہ نن ہر اُرا، ہر لمہ ہیڑ بے وس و خڑینکی خنان، گڑا ننا دتر لار کریکہ، او ولدا نن تینا زمین تون مہر و فکر محسوس کرین گڑا نن تینا تہٹی طوفان اس خنان، او طوفان دا دروشم اٹ مونا بس۔
دشمن دا دک آن انداخس ہلاہوش مس کہ بلال جان نا پیرانگا لمہ، ایلم و سیال تے زوراکی ئٹ بیگواہ کرے۔ ٹپ آتیان گنوک آ دشمن بلال جان استا اُرا غا چھاپہ خلیسہ اونا لمہ ءِ سڑدرا کرے و اونا پژہ غاتے ہلیسہ اودے کرے ولے دا پاش ءِ کہ دشمن ٹپی اس، دکّ اس ترند ءُ لگانے تا کہ پیرانگا زالبول تیا ہم دو بٹک۔
سریاب تینٹ جوڑ مریسہ ءِ، ہر ورنا نا شہادت ننے فکر و شعور تس، ہر دلیرا ورنا کلہو تس کہ دشمن ءِ نیست و نابود کروئی ءِ۔ لمہ وطن ٹی ظلم و زوراکی برداشت کروئی اَف، اودے سبخ و کلہو اس ایتن کہ او یات تخے۔
اندا محسوس مریک کہ بلال جان نا دلیری عمل سریاب ٹی پوسکون جوزہ اس ودی کرے۔ دا جوزہ سریاب ٹی انقلاب اس بش کرے۔ دا انقلابی انگا شہادت سریاب ءِ مونا درے، سریاب داسہ ہمو طوفان جوڑ مننگ ءِ ہرادے دشمن داسہ توننگ کپک۔ دا اسہ پوسکنو سوج اس بش کرے ہر چنا، ورنا، بھلا بلال جان نا فدائی آ عمل ءِ تینا محفل اٹ نازیفک، اودے فخر ٹی سلام کیک و پائک بلال جان سریاب ءِ بس کریس ہناس۔ او تینا دلیری ءِ ہر چنا ٹی ودی کرے۔ تینا فرض ءِ ادا کریس۔
قصہ ءِ ڈیہہ ئنا استار نا
آماچ نا کنا دلدار نا
شہید بلال جان ءِ تخن استار شان
گچین ءُ رنگ اس ایسونے آماچ ٹی
شیئر اس ناز ئٹی پان نیکن
قربان نن مریں بلال جان نیکن
دھرتی ئس نما دا ہانل
سائے تسونے دھرتی آ
اینو آماچ نے مہر ٹی نازیفک
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔