پنجگور ئٹ جمعہ نا دے سم کاری نا اسہ تدینی اسیٹی مُسہ ورنا کسکر۔
کہوک آتا چاہنداری اللہ بخش نا مار نیاز بلوچ، عبدین نا مار زاکر بلوچ، و علی جان نا مار امر علی نا پِن تیٹ کننگانے۔
ہندی حوالکار تا ردئٹ سم کاری نا تدینی پنجگور نا اسہ علاقہ اسیٹ مس ہراڑے سلہہ بند بندغ آتا سم کاری نا سوب آن مُسہ ورنا ہند آ ساہ تسر۔
ہندی کڑدہ تا دعویٰ ءِ کہ دا تدینی ٹی ریاستی مُخ تف ڈیٹھ اسکواڈ آک اوار ءُ۔
یاتی مرے بلوچستان ئٹ ”ڈیتھ اسکواڈ“ نا اصطلاح بلوچ راست دوست کڑدہ، بندغ حق آتا جہدکار و ہندی سیاسی ٹولی تا پارہ غان کاریم ئٹ ہتنگک۔ دا کڑدہ تا دعویٰ ءِ کہ دن انگا ٹولیک ساڑی ءُ ہرا ریاستی ادارہ تا مُخ تفی ٹی کارروائی کیرہ۔