شفیق مینگل: بلوچستان نا اسہ متنازع کڑدار اس – ٹی بی پی سرگپ
8 جولائی پیشیم آ بلوچستان نا کل آن بھلا ضلع خضدار ئٹ شفیق مینگل نا اُرا غا کار بمب تراک آن پد کیہی سلہہ بند بندغ آتیتون گھنٹہ آتے اسکان برجاء مروک اسہ جلہو اس مس۔ دا جلہو نا زمہ واری ءِ بلوچ لبریشن آرمی (بی ایل اے) ارفے۔ بی ایل اے نا ردئٹ دا کاروائی ءِ اونا جند ندر کڑدہ، مجید بریگیڈ سر تسنے۔ 2011 آن پد شفیق مینگل آ مجید بریگیڈ نا دا ارٹمیکو جلہو ءِ۔ داڑان مُست 30 دسمبر 2011 آ کوئٹہ نا ارباب کرم خان روڈ آ تفوک اونا اُرا ءِ ”جند ندری“ جلہو اسیٹی ٹک کننگاسس، ہرا بی ایل اے نا جند ندر کڑدہ نا اولیکو کاروائی ئس۔
شفیق مینگل خضدار نا ہندی ئسے و پاکستان نا مسکوہی وفاقی وزیر و مسکوہی نگران وزیر اعلی بلوچستان نا مار ءِ۔ تدوکا کیہی سال آتیان اونا پِن بلوچستان نا کل آن متنازع کڑدار آتیٹ اوار مرسا بسنے۔ بلوچ راج دوست جماعت آک، بیگواہ بندغ تا خاہوت آک و بندغی حق آتا تنظیم آک اونا زی آ سلہہ بند ٹولی (ڈیتھ اسکواڈ) تا سروکی، زوراکی نا بیگواہی، بیدادی و سیاسی جہدکار آتا خون کون آ بھلا دوبہ غاتے خلسا بسنو۔ توتک نا اشتماعی قبر آتیان ہلیس شاہ نورانی درگاہ آ مروک خودکش تراک، بی ایس او آزاد نا ریلی آ سم کاری، خضدار یونیورسٹی نا دود و ربیدئی مجلس آ چغلی بمب تراک، وڈھ ئٹ لیویز کارندہ آتیا جلہو و اوفتا کسفنگ، داڑاسکان کہ جہانی دہشت گرد تنظیم آتا کمک کون آ کیہی متنازع تدینی تیٹ ہم شفیق مینگل نا پِن مونا برسا کرینے۔
واہم پاکستان پیپلز پارٹی زوتیٹ خضدار نا ہورک آ نشست آ اودے تینا امیت وار پِن کرینے۔ السی نغدکاری آن پد ہم اسہ بندغ ئسے پارٹی ٹکٹ تننگ بیرہ اسہ سیاسی فیصلہ اس اف، بلکہ بلوچستان نا مخلوق کن اسہ پاش ءُ کلہو اس ہم ارے کہ اوفتا خواہشت، مارشت و سیاسی حساسیت ءِ ہچو اہمیت اف۔ دا ڈول نا فیصلہ غاتے بیرہ گچین کاری حکمت عملی نا ردئٹ ہُننگ مفک، بلکہ دافتے ریاست، سیاسی جماعت و الس نا نیام ئٹ سیالی و باور نا شابیت آ تناظر ئٹ ہم ہُننگک۔
شفیق مینگل نا پِن بلوچ کڑدہ تیٹ ترند تنازعہ و دوبہ آتیتون ہلنگک، خاص وڑئٹ بلوچ زنک ایسری نا دوبہ غاک و توتک اشتماعی قبر آتا معاملہ تون اونا تعلقداری نا سوب آن او بلوچ چاگڑد نا پارہ غان ترند مخالفت تون مون تننگ ءِ۔ بلوچ چاگڑد دن انگا کڑدار آتے تینا اشتماعی شعور، دیہاڑی جہد و راجی مفاد آتا برخلاف تصور کیک، اندا خاطران او چرجوئی ئٹ السی ردعمل و سیاسی تنیائی نا گواچی ءِ۔
بلوچ مخلوق نا نظر ٹی دن انگا بندغ آک اسہ بندغ ئسے نا ویل افس بلکہ اسہ بھلو دیہاڑی و چاگڑدی تناظر نا بشخ ئسے ءُ، ہراڑے بندغی حق آک، پجار، انصاف و عزت نفس کون آ معاملہ غاک بنداوی اہمیت تخرہ۔ اندا سوب ءِ کہ شفیق مینگل کون آ متنازع کڑدار آتا برخلاف بلوچ چاگڑد ئٹ ترند سوختئی خننگک و اونا ساڑی گری ءِ بلوچستان نا سوگوی کن اسہ بھلو بھیم اس گوندرہ۔ السی مخ تفی آن بیدس اسہ ہم سیاسی و چاگڑدی کڑدار اس بیرہ وختی زہم تخنگ کیک۔
بی ایل اے نا پارہ غان شفیق مینگل ءِ ”غدارِ اعظم“ نا پِن تننگانے، ہرا دا ہیت ئنا شاہدی ءِ ایتک و گمان ارے کہ بروکا وخت ئٹ ہم اودے گیشتر بھلا یا سوگو جلہو آتیٹ ٹک کننگ مننگ کیک۔