سلہہ بند بندغ آک جتا انگا ہند آتیا روڈ ءِ تفیسہ چیک پوائنٹس ٹہفینو۔
بلوچستان نا علاقہ سوراب آن رسینگوک حوال آتا رد ئٹ گدر نا خڑک بھلو کچ اسیٹ سلہہ بند بندغ آک کسر ءِ تفینو، ہندن بسیمہ، پتک و زیک نا ہند آتیا ہم بھلو کچ اس سلہہ بند بندغ آک ساڑی ءُ۔
بھلا سلہہ تیتو سلہہ بند بندغ آک چیک پوائنٹس ٹہیفسا بھلا کسر تیا کنٹرول دوئی کرینو۔
حوال آتا رد ئٹ ہندا نیام ئٹ سلہہ بند بندغ و پاکستانی لشکر نا نیام ئٹ ترند مون تِس برجا ءِ، ہندن پن کروک ہند آتیا ترند سم کاری و تراک آتا توار ہم بننگ ئٹ بننگ ءِ۔
پولیس شاری تے پن کروک کسر تیٹ سفر کننگ آن تورینے، ہندن جنگ ئنا نیام ئٹ پاکستانی لشکر ءِ جانی نسخان رسینگ نا حوال آک رسینگانے۔
یاتی مرے کہ پن کروک علاقہ ئٹ بلوچ آزادی پسند سلہہ بند تنظیم آک ساڑی ءُ و داکان مالو ہم ناکہ بندی و پاکستانی لشکر آ جلہو کننگ ئٹ اوار مسنو، واہم اینو نا تدینی نا ذمہ واری ءِ دائسکان اسہ ہم تنظیم اس ارفتنے۔
ہندن درو کوئٹہ تفتان بھلا کسر N-40 آ تفتان و نوکنڈی نا نیامی علاقہ ئٹ نادرست سلہہ بند بندغ آک مُسہ تجارتی گاڑی ءِ خاخر تسر۔
ٹرانسپورٹ و تاجر برادری نا احوالکار آتا رد ئٹ سلہہ بند بندغ آک اسہ ٹرالر، اسہ 10 ویلر ٹرک و اسہ تیل ٹینکر ئسے تورفیر و پدان ہر مُسہ گاڑی ءِ خاخر تسر۔
بنائی احوال آتا رد ئٹ تدینی ئٹ ہچو جانی نسخان ئسے نا حوال مون آ بتنے، واہم ہر مُسہ تجارتی گاڑی تے خاخر تننگ نا سوب بھلو کچ اسیٹ مالی نسخان تو مون تِس مسونے۔