برطانیہ نا میری ٹائم ٹریڈ آپریشنز ایجنسی (یو کے ایم ٹی او) چار شمبے نا دے پارے کہ ہرمز نا شاجو آن گدرینگوک اسہ تیل ڈہوکو جہاز ئسے نادرست ءُ پروجیکٹائل اسیٹ ٹک کننگانے ہراڑان پد جہاز ئٹی خاخر لگا۔ ولدا خاخر ءِ کسفیر و جہاز نا کل بندغ آک بچوک ءُ۔ چاگڑدی پراگندہی نا دائسکان ہچو حوال اس افک۔
دا رپوٹ ہندنو وخت ئسے ٹی مون آ بسک ہراتم آ کہ ہرمز نا شاجو ٹی دیری جہاز آتا ہن و بر نا سفارتی کوشست آک برجا ءُ۔ ہنوکا دے تیٹ ایران و عمان شاجو ٹی منا دیہی ءُ راہداری جوڑ کننگ و بارودی سرنگ آتا اوار صاف کننگ نا کاروائی تا زی آ ہیت و گپ کننگ ئٹی ءُ۔
ایلو پارہ غان واشنگٹن ایران نا زی آ زرگزرانی رکھ آتیٹ ودوکی کرینے۔ ڈونلڈ ٹرمپ نا پاننگ ءِ کہ ہرمز نا شاجو نا جہانی دیر تیٹی کڈ کروک آ دیری آ شئورہ و سرنگ آتے صاف کننگانے۔
فروری نا ایسری ٹی امریکہ و اسرائیل نا ایران نا زی آ جلہو آن مہالؤ جہان نا کم و ود بیست درسد تیل و قدرتی گیس (ایل این جی) نا ڈوہنگ ہرمز نا شاجو نا کسر ئٹ مسکہ، واہم شش تو نا وخت ئٹی جہاز آتا ہن و بر ئٹی بھاز کمبوتی بسونے۔
ایران شار شمبے نا دے نا مروک آ جلہو نا زمواری ءِ ارفتنے، اگہ کہ ساڑی دے تیٹ او امریکہ نا زرگزرانی زورگیری نا ورندی ٹی خبردار کریسس کہ اونا بنداوی ساخت ءِ نسخان نا خلیس مس گڑا او رد عمل ترو۔