مستونگ نا راجدوست پیر کماش ملک فیض محمد دہوار نا سیاسی و سماجی آ مسڑ ڈاکٹر عائشہ فیض شال ئٹ اسہ پریس کانفرنس اسیٹی پارے کہ بلوچستان نا جنگول آک دہشت گرد افس بلوچستان نا آزاتی نا سپاہی کو و گوریلہ جنگول آکو۔ دا تینا راج ئنا آزاتی نا جنگ ءِ کننگ ئٹی ءُ۔
دا ہیت ءِ او دوشمبے نا دے شال پریس کلب ئٹی پریس کانفرنس کریسہ پارے۔ ڈاکٹر عائشہ فیض بلوچستان نا مسکوہی مزاحمتی جہد و بلوچ نیاڑی تا کرد ئنا بابت ئٹ مثیل تریسہ پارے کہ ہفتاد نا دہ یک ئٹی بلوچ جنگول آتا مہمانداری ءِ بلوچ نیاڑیک تینا ارا تیٹی کریرہ۔
او پارے کہ سرمچار آک ہراتم بھلو وخت ئسے کن مش تیٹی مسرہ گرا نیاڑیک تینا اراتیٹی اوفتا مہمانداری ءِ کریرہ انتئے کہ مش تیٹی اوفتا کُن خور نا بے آسراتیک ئسر۔ او پارے کہ اگہ اسہ سرمچار اس ناجوڑ مسونے گڑا ڈاکٹر آک تینا اراتیٹی خوائفسہ اوفتے دارو درمان ہم کرینو۔
ڈاکٹر عائشہ فیض پارے کہ دا غیرتی آ بلوچ آتا کسہ غاک ءُ۔ او پارے کہ بلوچ آک ریاست کوزہ مروک آ تینا ریاست قلات ءِ پدی خوارہ۔ انتئے کہ اونا رد ئٹ قلات نا زوراکی ئٹ اوار کننگ نا وخت بلوچ آتا منشا متنے۔
او پارے کہ ہندن کہ قلات زوراکی ئٹ ننا منشا نا برخلاف پلنگانے، داسا ننے پدی ہلوئی ءِ تا و ہر حالیت ئٹ ننے پدی بکار ءِ انتئے کہ دا ننا گلزمین ءِ۔
او پارے کہ بلوچ راج و بلوچ نیاڑیک جیرت والا ءُ بلکن بلوچ نیاڑیک ہفتاد نا دہ یک ئٹی آزاتی نا جنگ ئٹی بشخ ہلنگ بنا کرینو۔ او پارے کہ مزاحمت کار آتا خذمت کننگ ہم بلوچ نیاڑی تا جوزہ جیرت و بلوچستان نا آزاتی نا جنگ ئنا بشخ اس مننگ نا درشانی مسونے۔
ڈاکٹر عائشہ فیض پارے کہ کنا باوہ تینا گڈیکو دے تیٹ پارے کہ چڑت خلپبو کہ ڈھکوکائی جوڑ مروک آ لشکر ننا ڈیہہ ءِ آجو کیک۔
او پارے کہ مرک ئنا وخت آ لیپ ئٹی مننگ آن پد ہم او قلات نا آجوئی و ڈیہہ ئنا فکر ئٹی مسونے۔
اونا رد ئٹ قلات نا مخلوق ءِ ہمپفنگانے و زوراکی و ریفنگ ئٹ اوفتیان اوفتا ڈغار ءِ پلنگانے۔ ہندا سوب آن او پدی مزاحمتی جدوجہد نا ہیت ءِ کیرہ۔
ڈاکٹر عائشہ فیض پارے کہ بشیر زیب و ڈاکٹر اللہ نزر آزاتی نا جنگ ءِ کننگ ءُ۔ دا بلوچستان نا جنگول سپاہی، دلیر آ جنگول و ریپبلک آف بلوچستان نا لشکر و گوریلہ جنگول آک ءُ۔ دا ننا دلیر آ ایلمک ءُ کہ تینا ڈیہہ ئنا جنگ ءِ کریسہ ءُ۔
او پارے کہ جنگول آتے دہشتگرد پاننگ جوان اف۔ جنگ آتیٹی ہڑتوما پارہ غان لشکر آک اسہ ایلو تون جنگ کیرہ۔ اگہ اسٹ ئسے دہشت گرد پاننگک تو ایلو کنڈ ئنا تے ہم دہشت گرد پاننگے۔
او پارے کہ مزاحمتی تنظیم آک پڑو کریسہ واپری کروک و ایلو مخلوق ءِ پارینو کہ داڑے اوفتا جنگ مننگ ئٹی ءِ۔ اونا رد ئٹ واپار، واپاری کروک، پنجاب نا لس اولس مزور آتے پاننگانے کہ دانگ بفس کہ داڑے جنگ برجا ءِ۔
ڈاکٹر عائشہ فیض سرکاری وزیر داخلہ نا کاروان آ جلہو ءِ نیمون جوڑ کریسہ باغ آتے بن تننگ و مخلوق ءِ ہمپفنگ نا ہیت ءِ رد پارے۔ او پارے کہ دا وڑ ئنا جنجال آتیان مخلوق نا ویل آج گیشتر مرور و ریاست نا برخلاف نفرت ودو۔
او پارے کہ اگہ کھڈکوچہ نا مخلوق ءِ ہمپفنگا و اوفتا باغ آک ہشفنگار گڑا ہمو وخت نریمہ نیاڑیک مزاحمت کننگ آ بےوس مرور ہرانا زمواری ریاست نا زی آ مرو۔ او پارے کہ مخلوق تینا خلق و کوچہ تے اسل یلہ کپک و تینا باغ آتے ہشنگ نا ہچبر موکل تفک۔
ڈاکٹر عائشہ فیض پارے کہ بلوچستان نا جہد اینو نا اف بلکن بھلو وخت ئسے تون گنڈوک ءِ۔ او پارے کہ ریاست قلات نا زوراکی ئٹ اواری آن گڈ مزاحمت برجا ءِ
یات سلے کہ ملک فیض محمد یوسفزئی (دہوار) بلوچستان نا بنائی سیاسی و راجی تحریک آتا گچین آ رہشون آتیتون اوار مسونے۔ او میر عبدالعزیز کرد، میر یوسف عزیز مگسی و ایلو بلوچ رہشون آتا سنگتی ٹی انجمن اتحاد بلوچاں نا سیاسی جدوجہد ئٹی اوار مسونے۔ ہندا سوب آن بلوچستان نا سیاسی پڑ آ سیاسی حق آتیکن جہد کرینے۔ داکان پد قلات اسٹیٹ نیشنل پارٹی نا سیاسی کاریم تیٹی ہم اوار مسونے و بلوچ سیاسی جہد ءِ سوگو کننگ کن تینا گچینو کڑد اس سر تسونے۔