مستونگ نا باغ آک و ریاست نا علمداری – ٹی بی پی سر گپ
منا دے مہالو بلوچستان نا شرہ ئی سر وزیر سرفراز بگٹی کوئٹہ ٹی مستونگ نا مخلوق کن خرین آ توار تون تران کریسہ پارے اگہ باغ تیان پاکستانی لشکر نا زی آ جلہو کننگا گڑا باغ خواجہ تے جلہو کار تا دو ءِ سبک کروک تکنگو۔ سرفراز بگٹی نا رد ئٹ مستونگ نا اولس تون ارا کسر ءُ: ہمپ و لڈ کریسہ ‘آئی ڈی پیز’ مننگ کن تیار مریر یا گڑا اوفتا باغ تے کاٹ کریسہ چٹفنگو۔ دا بیان ہندنو وخت ئسے آ مون آ بسک کہ ہراتم بلوچستان نا گیشتر علاقہ تیٹ و بھلا کسر تیا سلہہ بند آزاتی دوست تخوک تنظیم آتا کاروائیک تیز مسنو۔ تینٹ مستونگ ئٹی ہم ہندا منہ ہفتہ و دا تو ئٹی پاکستانی لشکر آ پاش ءُ جلہو مسنو۔ داڑتون اوار حوال آتا رد ئٹ مستونگ و داپار ایپار ئٹی بلوچ لبریشن آرمی پبی پن ارفیسہ ءِ۔
مستونگ بلوچستان نا ہمو علاقہ تیٹی اوار ءِ ہرا بے کچ گچین ءُ جغرافیہ نا وڑٹ ارزشت تخوک ءُ ڈغار ئسے۔ دا کوئٹہ نا خڑک ئٹی ءِ و بلوچستان نا نیامیکو علاقہ تے اوار کروک آ کسر تیکن ہم بھاز اہمیت تخک۔ بلوچستان نا شرہ ئی آ سروزیر سرفراز بگٹی نا پارہ غان مستونگ نا اولس ءِ باغ آتے چٹفنگ یا ہمپ لڈ کننگ نا تڑی تننگ بیرہ اسہ ہندنو بیانیہ اس افک بلکن دا بلوچستان ئٹی ریاست نا ہمو پالیسی تا درشانی تے کیک کہ ہرافتا وسیلہ ئٹ سیکیورٹی نا بے سہبی تا باریم ءِ اولس نا کوپہ تیا بٹنگ نا کوشست کننگک۔ حکومت وار وار آ بلوچستان ئٹی تینا رٹ ئنا مننگ نا دعویٰ کیک ولے ریاست رٹ علمداری بیرہ کسر تیا فوجی تا مننگ، چیک پوسٹ خلنگ یا بھلو سلہہ تیٹ جوڑ مفک۔
بلوچستان ئٹی برجا آزاتی نا تحریک اسہ رد مفروک ءُ گواچن ئسے۔ ریاست نا جوڑ کروک آ پالیسیک، اسہ کش ئٹ لشکر کشی، بالی طاغت تا استعمال، دزگیری، چھاپہ و طاغت نا وسیلہ غاک دا شاہدی ایتے کہ ریاست دا تحریک ءِ نزور کننگ یا بے پن کننگ ئٹ بےسہب مسونے۔ اگہ حکومت دا تکک کہ باغ آتے بھس کننگ آن سلہہ بند تنظیم آتا کاریمک سلیرہ، گڑا سیکیورٹی نا رد ئٹ دا چٹ چنکو سوچ ئسے نا درشانی کیک۔ اینو باغ آک اریر، پگہ مشی ءُ علاقہ اس مننگ کیک، ایلوزدے اسہ خالی ءُ ماڑی اس، ہندن کسر اس، بازار یا کہ بھلو آباتی والا علاقہ اس۔ انت ہر ہمو جاگہ بھس کننگو ہراکان سلہہ بند کاروائی اس مننگ کیک۔۔۔؟