کیچ، کوہلو: ایف سی کارندہ و ریاستی مخ تف سلہہ بند ٹولی نا سم کاری، اسہ بندغ اس مرگ ئنا گواچی، ایلم تو اوار چار بندغ ٹپی

بلوچستان نا ضلع کیچ و کوہلو ئٹ ایف سی کارندہ و ریاستی مخ تف سلہہ بند ٹولی نا سم کاری نا تدینی تیٹ اسہ بندغ اس کسک، ہندن نیاڑی تو اوار چار بندغ ٹپی مسر۔

شابیتی حوال آتا رد ئٹ ضلع کیچ نا علاقہ بل نگور، دشت ئٹ فرنٹیئر کور ( ایف سی ) نا گشتی پارٹی نا سم کاری آن اسہ بندغ اس کسک، ہندن اسہ ایلم ٹپی مس۔

ہندی حوالکار آتا رد ئٹ تدینی ہمو وخت مون آ بس ہراتم اِرا ایلم موٹر سائیکل آ سوار علاقہ آن گدرینگ ئسرہ۔ ہندا نیام ئٹ علاقہ ئٹ گشت کروک ایف سی کارندہ غاک اوفتا سم کاری کریر۔

سم کاری نا سوب ئٹ شاہجہان ولد بابل ہمو وخت کسک، ہندن او نا ایلم امام بخش ولد بابل سم لگنگ نا سوب ٹپی مس۔

تدینی آن گڈ ہڑتوم آ ایلم تے دمدستی اسپتال تربت آ سر کننگان۔ تدینی نا بابت ئٹ کالخواہ و ضلعی بست و بند نا پارہ غان دسکان ہچو موقف اس مون آ بتنے۔

داکان بیدس، کوہلو ئٹ اسہ گاڑی سے آ سم کاری نا سوب آن مُسہ بندغ ٹپی مسر۔ ٹپی تیٹ نیاڑی و چنا ہم اوار ءُ۔

ہندی حوالکار آتا رد ئٹ سم کاری نا تدینی ریاستی مخ تف سلہہ بند ٹولی نا پارہ غان مون آ بسونے، واہم دسکان تدینی تو تفوک پین شابیتی حوال مون آ بتنے۔