لمئی بولی

نوشت: صباء نور بلوچ

دی بلوچستان پوسٹ

براہوئی ننا لمئی بولی و بلوچی ننا راجی بولی ءِ، و بلوچ ننا راج ءِ۔ اینو جہان ٹی ہفت ہزار بولی پاننگرہ۔ بھازا چاہندار آتا خیال ئٹ دا ہفت ہزار بولی ئٹی بیرہ مُسٹ و نیم ہزار نا خڑک اندن ءُ بولی ارے ہرافتا اسہ سدی آن پد پِن و نشان چُٹک۔ اگاں اینو زمانہ ٹی اریس تو چِل و دو لکھ بندغ براہوئی ہیت کیرہ۔ چار لکھ پاکستان ٹی ایلو اِرا لکھ اوغانستان، ایران، ترکستان ئٹی پاننگرہ۔ اگاں اریس تو بلوچستان ئٹی مچے بھاز کاریم ئٹ ہتنگک۔ دا ننا لمئی بولی ءِ۔ ننے براہوئی کتاب خوانوئی ءِ، براہوئی بولی ءِ چُٹنگ آن بچفن انتیکہ براہوئی بولی پاکستان نا بیست و ہفت میکو بولی ءِ۔

اگاں لمئی بولی ءِ ہم نن کپن تو او ہم ایسر مریک۔ بولی ہیت کننگ آن زندہ سلیک۔ ہراتم نن تینا بولی ءِ ہراڑے پانا او آخوبت کن زندہ سلیک، اودے کس چُٹفنگ کننگ کپک۔ انتیکہ بولی تہذیب نا بشخ ئصے۔ ایلو بولی نا کسفنگ نا مطلب دادے کہ جہان نا تہذیب نا اسہ بشخ اس کسک۔ جہان نا تہذیبی زیبائی رنگ رنگی ءِ، بولی تا پاننگ اندا زیبائی نا اسہ بشخ ئسے۔ دانا اُست خوش و افسوز آ مثیال دادے کہ کہوک آ بولی تیان اسٹ ایاپینکو (Ayapaneco) بولی ءِ، جہندمی کنڈ نا دا متکنا کہوک آ بولی نا بیرہ اِرا بندغ پاروک ءُ دا جہان ٹی بچانو۔

ننے تینا لمئی بولی ءِ اہمیت ایتوئی ءِ، زیات آن زیات کہ ننا براہوئی بولی ہم دا بولی آنبار ایسر مف۔

 لوڑی چائے پوغ تہ چائے

نوشت: امبر بلوچ

دی بلوچستان پوسٹ

بلوچ راج نا زی آ پاکستان، چین و ایران نا زوراکی ہمو دے آن برجاء ءِ و ترند مسنے کہ ہرادے اوتا وطن ءِ مسہ ہند آ انگریز نا بدنیتی نا دو آن بشخ بانٹ کننگا ولے یاتی مرے کہ دا زوراکی تیٹی پین ودکی ہترنگ بیرہ بلوچستان نا قدرتی مڈی تا لٹ پل کن برجا ءِ نہ کہ مذہب یا فرقہ کن۔

نن داہیت نا سرپند مننگ کن، ایران، پاکستان و پنجابی فوج نا زی آ نظر شاغن تو ہڑ دو نیمہ غان اسلامی ملک و مسلمان پاننگرہ، داڑان بیدس کہ دانا کہ چانڑدہ سد سال مالو نا مذہبی دیر ئسرہ؟ مگہ گواچن اندادے کہ اوک داسا سیاسی  بنماس آ لٹ پل کیرہ ولے نشان تننگک کہ اوک مسلمان، اسلام  نا پنٹ بلوچ راج نا مڈی تے لٹ پل کیرہ، تو داہیت ئٹی راستکی افک۔ نن پاننگ کینہ کہ گواچن اٹ دا ملک آک قومیت و توفک نا زورا  دا ڈغار کہ بلوچستان پاننگک اونا زی آ حکومت و حکمرانی کرسہ بننگُر یا  نن پاننگ کینہ کہ بلوچستان  نا مڈی تا لٹ پل و جغرافیائی سیم کننگ سیاسی و راجی ویل ئسے نہ کہ فرقہ وارانہ  یا مذہبی۔

اگہ ہمو بلوچ نا بدخواہ آک پارہ کہ دے کہی ہلنگ ئٹ بلوچ شیعہ سنی نا پنٹ خلنگک تو اوک ورندی تننگ کیرہ کہ پاکستان سنی ملک ئسے، بلوچ آک ہم سنی فرقہ غان تعلق تخرہ ایڑے، بلوچ راج مرے کہ پشتون اوتا نسل کشی انتکہ مننگ ءِ او دے پہ دے اوٹی ودکی خننگک؟ دہن کہ نن اول ہم درشان کرین کہ دا سیاسی و راجی ویل ئسے تو دادے سیاسی بنماس آ چائنگہ و دا ویل نا توننگ کہ گام ہرفنگہ، نہ کہ مذہبی بنماس، بلوچ ملا  چاہے دے کہی ہلینگ نا مرے کہ دے ٹک نا اونا کاریم سیاست افک اوک تینے دین اسکان توررہ۔ سیاست اوتا کاریم افک، نہ اوک سیاست آن بلد اریر، اگہ  بلد سرپند مروسر تو اوک شیعہ سنی کتوسہ بلکہ پاریرہ ظالم زوراک آک۔

اگہ نن خوڑتی اٹ ظلم زوراکی نا زی آ نظر شاغن تو زیات بلوچ نا نسل کش سنی کننگ ءِ ہرادے پاکستان پنجابی ہنوکا ہفتاد سال آن برجاء تخانے۔ اگہ نن داسنا سیم نا تدینی غا ہم غور کین تو لس مخلوق ءِ خلوک آک سنی فرقہ و بلوچ راج آن تعلق تخرہ۔ ہندی مخلوق نا ردٹ راشد درازئی، یاتری درازئی، شمسر سیم نا چوکی نا کماش عبدالوحید درازئی، اسلم درازئی، حاجی شریف درازئی و پین پین۔ ہندن دے ٹک ئٹی لس بلوچ ءِ برمتہ کروک آک شفیق مینگل، شکیل درانی، ثناء اللہ زہری، میر قمبر خان مینگل، بجار شمبے زئی، سرفراز بگٹی، راشد پٹھان و پین پین تا پنٹ چائنگرہ۔ دا پاکستان نا تالی چٹ آک مچ  سنی و بلوچ اُر، ولے بلوچ  ءِ خلیرہ۔ دانا مطلب دا پیشتمک کہ پاکستان مرے کہ ایران دافتا رند ئٹ حکومت آ تا دو ءِ نہ کہ مذہب و فرقہ نا۔ اوک تینا حکومت آتا، بلوچستان و بلوچستان ئٹی رہنگوک آ راج  بلوچ، پشتون، ہزارہ، عیسائی و بخال راج نا زی آ  زوراکی کن مونا ہیسنو و لس مخلوق ءِ چادہ کننگ کن وارس اسلام اسلام کیرہ وارس مسلمان مسلمان و وارس شیعہ سنی، وہابی، بریلوی انتیکہ اوتا ایجنسیک دا سرپند مریرہ کہ لس مخلوق مذہب نا پنا زوت رد ہلیک۔ لہٰذا دا پنٹ اوتے ریفسہ، اصل تینا بلوچستان نا لُٹ پل والا کاریم ءِ مونا دننگ کہ داپنتے مونا ہترسہ کارمز کننگہ تو جوان وڑٹ اوتا حکومت آک برجاء سلیرہ انتیکہ لس مخلوق اسٹ ایلو نا زنچک ئٹی ہلیرہ۔

اگہ دہن مفروسس تو اسلام یا مسلمانیت نا زیات بے شرفی و لس مسلمان تا نسل کشی ءِ چین کننگ ءِ ولے پاکستان کہ تینے ریاست مدینہ پائک، ایران تینے جنت نا خواجہ اسلام نا ٹھیکیدار پائک یا ہندن ترکی اسلامی ریاست نا خلیفہ پاننگ نا تغ ءِ خنک ولے ہرمسٹ چین نا کُٹ ئٹی تولوک ءُ، اوڑان پیسہ فنڈ سامان ہلیرہ ولے اسہ دے ہم اوتا دوی ٹھپ مرے کہ پارکہ چین مسلمان تا زی آ زوراکی ءِ تورہ؟ پین تو پین خنشیف آ پاکستان اونا بُت آ وزیراعظم عمران خان آن دا بابت صحافی اس سوج ہم کرے تو اوتا ورندی ئسک کہ چین ننے زر ایتک تو نن امر اسلام یا مسلمان تا ہیتے اوڑان ہرفن کہ اوتا انتکہ خلیسہ؟ دا مثال یا ثبوت د ا ہیت نا شاہدی آن پک مریک کہ داڑے مڈی تا جنگ ءِ۔ ولے ایلو نا وخت ءِ برباد کننگ کن وختس مذہب نا پنٹ، دین نا تو وختس غیر مذہب یا بخال عیسائی یہودی نا پن ایترہ۔

ہرانگ ہنا سعودی نا اسلام یا عرب آتا؟ ہنوکا چانڑدہ سد سال آن یہودی کافر کافر کریرہ اینو یہودی نا خنب ئٹی تولوکو؟ کسس ورندی تننگ کیک، اینو ایران یا پاکستان پارہ کہ یہودی ءِ منپنہ ولے اوک پاننگ کیرہ انت چین اسلامی یا مسلمان ملک ئسے؟ کہ اونا ربڑ نا دارودرمان آن ہلیس، ربڑ نا برنج و بیدہ نمکن بریک ولے کافر یہودی ءِ؟ پاننگ نا مطلب داکہ ہرکس تینا مسخت کن مذہب و فرقہ ءِ کارمز کیک تو بلوچ راج یا ایلو مظلوم آ راج آتے سرپند مروئی تمک کہ اوک تینا گُٹ آن مذہب فرقہ نا  لعنت ءِ کشر، تینے مظلوم ءُ راج اس سرپند مریر۔ بلوچ، پشتون یا ایلو بلوچستان ئٹی باوہ پیرہ غان رہینگوکا راج آک  بلوچستان نا ویلے سیاسی و بست بندی بنماد آ مونا دیر۔ او مذہبی مخلوق ملا تینے دین نماز روچہ اسکان تورر، توفک ہرفنگ یا مخلوق ءِ اسٹ ایلو آن مذہبی نفرت نا بنماس آ سیم کننگان مر مریر۔ انتیکہ بلوچستان و بلوچ راج نا ویل نا مرکننگ سیاست اٹ مریک نہ کہ مذہب و فرقہ نا بنماس آ۔ براہوئی ٹی پارہ کہ لوڑی چاہے پوغ تا چاہے۔ لہٰذا بلوچستان نا آجوئی اودے اسہ ہندا کننگ یا اوار شاغنگ بیرہ سیاست نا کسرٹ دوئی مریک۔ سیاست اٹی مذہب نا پترینگ پین زیات ویل و سیم درسیم نا سوب جوڑ مرسہ ناسور مریک، دنکہ اینو اودے ناسور کننگ نا کوشست پاکستان نا پلو آن زیات برجاء ءِ۔

جہان تینا مطلب نا ءِ اگہ جوان خوڑتی اٹ اُرن تو بلوچ راج  ہزار آتا حساب اٹ و زیات پاکستان نا فوج نا دوتیان خلنگانے خلنگک، بیگواہ مسنے و مننگک، بلوچ بے اُرا کننگانے، بیروزگار کننگانے ولے مجال مرے کہ جہان نا ملک آک جوانو گپ اس کیر یا پاکستان ءِ چَخ کیر؟ ولے اونا مقابلہ ئٹی ایران نا زوراکی حساب ہم مننگ نا لائخ اف ولے جہان ہر نیمہ غا غرنگ نا بناء ءِ کرینے انتیکہ داڑے اوتا مفاد ءِ اگہ بلوچ نا دتر تون مہر مروسس تو پاکستان ئٹی بلوچ نا وہوکا دتر پین رنگ ئسے یا ہندن خیسنے دنکہ دے کہی ہلینگ نا بلوچ نا؟ دا ہیت نا مثال نا مطلب دا کسس سرپند مف کہ ایران ئٹی بلوچ نا خلنگ جوانو عمل ئسے، دا ہمون خراب ءِ امرکہ پاکستان ئٹی ءِ بلکہ نن پاننگ کینہ انسان تو انسان اسہ سہدارسینا ساہ ءِ ہلنگ ہم زوراکی ئسے داڑان پرہیز کننگہ ولے داڑے ہیت مفادات نا ءِ جہان نا ہراڑے مفاد مسک اوک ہمو ہیت ءِ کیرہ۔

تو بلوچ راج سیاسی مخلوق نا ذمہ واری ءِ کہ بلوچستان نا ایلو مظلوم آ راج تون ہم کوپہ مرسہ تینا آجوئی کن سیاسی گام ہرفر و جہان ءِ ہم بیوس کیر کہ اوتا آجوئی و وطن  نا ہیت ءِ ہر اسٹ کے۔ بلوچ راج نا دا ہم ذمہ واری ءِ کہ پاکستان نا ودی کروک آ مذہبی دہشت گرداتا بلوچستان ئٹی لغام شاغر ہراکہ بلوچ نا آجوئی نا کسر ئٹی دشمن آن زیات دشمن جوڑ مسنو۔ آجو بلوچستان نا ہزار آ سال تیان ساڑی بیرک نا ہندا چانڑدہ سال نا بروکا اسلام نا مذہبی  بیرک ءِ جھک کننگ بلوچ کن سوج ئسے؟ اونا ذمہ واری پین زیات مریک کہ تینا آستونک نا مذہبی دوشہ آتیان سنبھال کیر، اوتا پارکہ نما کاریم سیاست افک نہ نما کاریم ءِ تینے پخیر و پنڈنگ اسکان توبو، اللہ اللہ کبو مذہبی نفرت ودی کپبو بلکن بلوچ نا آجوئی کن دعا خواہبو؟

افغانستان نا صوبہ ننگرہار نا دارالحکومت جلال آباد ٹی سلاء بند بندغ آتا سم کاری آن ہندی ٹی وی نا مسہ زالبول باسک مرگ نا گواچی مسر۔

افغان میڈیا نا رد ئٹ جلال آباد ٹی سم کاری آن ارا جتا ویل آتیٹ ہرمسٹ انگا نیاڑی کسفنگا اندن ہرمسٹ انگا تا تعلقداری اسہ میڈیا گروپ آن ئس۔

حوال نا رد ئٹ ارا نیاڑی آ جلال آباد ٹی پولیس ڈسٹرکٹ (پی ڈی) ون ٹی دفتر آن ارا غا واپس ہننگ آ نادرست بندغ آک سم کاری کریر ہرانا سوب آن 2 نیاڑی  بیران مسر ہراتا چاہنداری سعدیہ و شہناز نا پن ئٹ مسونے۔

دا ویل ئنا منہ سائت گڈ جلال آباد نا پی ڈی 4 ٹی ہم دفتر آن اُرا غا واپس ہنیسہ اسہ پین نیاڑی ئسے آ سم کاری کننگا ہرانا سوب او ہند آ مرگ نا گواچی مس وہ اندن مسیٹمیکو  نیاڑی نا چاہنداری مرسل حبیبی نا پن ئٹ مسونے ۔

سم کاری نا ویل آتیٹ پین 2 کسر آن ہنوک نیاڑی ہم ٹپی مسونو ہراتا اسپتال ٹی دوا درمان برجاہ ء۔

افغان میڈیا نا رد ئٹ مسیٹمیکو نیاڑی ءِ کسفوک آ ڈودار دزگیر کننگانے ہراڑان سر و سوج برجا ءِ۔

ایلو کنڈان طالبان سم کاری نا ویل آتیٹ اوار مننگ آن نمن مسونے، اندن داسکان پین کس ہم  ذمہ واری ءِ ارفتنے۔

بلوچ اسٹوڈنٹس آرگنائزیشن نا بنجائی کمیٹی نا اِرا دے ئی مجلس چیئرمین ظریف رند بلوچ نا کماشی ٹی کراچی ٹی اڈ تننگا۔ سیکریٹری رپورٹ، علاقئی و جہان حالیت آتیا ہیت گپ، تنظیمی کاریم تیتون اوار اہم انگا ٹِک آتیا ہم گپ و تْران مس، بروک آ وخت نا کاریم تا رِدئٹ فیصلہ غاک کننگار۔

بلوچ اسٹوڈنٹس آرگنائزیشن نا بنجائی کمیٹی نا اِرا دے ئی مجلس 27،28 فروری آ چیئرمین ظریف رند بلوچ نا کماشی ٹی مس ہرانا کاروائی ءِ سیکریٹری جنرل چنگیز بلوچ مُستی درے۔

مجلس نا بناء شہدائے بلوچستان، شہدائے عالم انقلاب و شہدائے سراوان ایران نا یات ئٹ اِرا منٹ ئنا چُھپی تون مس۔

چیئرمین ظریف رند بلوچ مجلس نا بنائی تران ئٹی پارے کہ اینو اسہ وار ولدا سیاسی ردئٹ مُچیک تیوی ڈیہہ اکن اومیت نا رژنائی ئسے ہرا اسہ روشن ءُ وخت ئسے نا پارہ غا اشارہ کیرہ۔

او پارے کہ اینو بلوچستان تون اوار تیبہ جہان ٹی بش مروکا تحریک آک تنظیم تا ردئٹ راستی ءِ پاش کنّنگ ئٹی ءُ۔ جہان نا ہر نیمہ سیاسی زْرمبش نا گواچی ءِ، امریکہ، افریقہ و ایشیا آن ہلیس یورپ اسکان ننے مزور و محکوم آتا جہد ظلم و بے برابری آ تخوکا نظام ءِ بھلّو کچ اسیٹی سرفنگ ئٹی خننگک ہرا استحصالی بست و بند نا روتہ ءِ گُڈسہ تینا مزل آ سر مرو۔

بلوچستان ٹی ساڑی آ تحریک آک ہم جہانی بدلی تون گنڈوک ءُ و بلوچ راج ءِ اینو نا جہان تون برابری آ ہتنگ ئٹی ءُ ہرا انقلابی جنز ئنا پیدواریک ءُ۔ دننگا وخت ئٹ اسہ سوگوْ ءُ لیڈرشپ اس ہر دیار ءِ دا بھلّا بحران آن کشّنگ کیک ہرا بے برابری و بے انصافی نا نظام نا بنماس آن دیر ہلوکے۔ مظلوم اُلس نا تنظیم سازی و محکوم راج آتیٹ  اسٹی بھلّا تبدیلی نا شڑط ءِ۔

چاگڑدی زند ئٹی تنظیم نا کڑدار آ ہیت کرسہ او پارے کہ سوگوْ تنظیم ئسے آن بیدس جبر ئتون جنگ کننگ مننگ کپک، ہرا وخت اسکان کہ چاگڑد نا ہر بشخ سیاسی ردئٹ واخب متنے، اے وخت اسکان اسہ آجو ءُ چاگڑد اسینا شون مفرنگ کپرو و نیم پورو مرو۔

او کیڈر آتا بابت پارے کہ اوفتے شعوری کاریم تے مونا دروئی ءِ۔ خوانندہ آتا بھلو وخت ئسے آن ظلم ئنا سوب آن بش مروک آ بے جاراتی ءِ سیاسی جوزہ ٹی مٹ کروئی تمو۔ راج ئنا خوار انگا حالیت اونا لیڈرشپ آ پاش کننگ ئٹی ءِ کہ کیڈر ساز ادارہ نا مننگ باشعور سیاسی راہشون ڈس ءِ ایتک۔

چیئرمین ظریف تنظیمی ادارہ غاتا اہمیت آ گپ کرسہ پارے کہ تنظیمی ادارہ غاتا برجاء غا جہد ئنا سوب آن تنظیم ئٹی شابیتی بریک ہرا کہ تنظیمی استحکام و بھلّا کاریم تیک بھاز لازم ءُ۔ گراؤنڈ نا زی آ تنظیمی بشخ آتا مونا بننگ تنظیمی کاریم ٹی بُڑزی ہتو و باسک آتا فکری ردوم و کاریم  کننگ نا زانت ءِ ودّفو۔

سیکریٹری رپورٹ ٹی تنظیمی کاریم و ساڑی آ حالیت آ چمشانک شاغنگا و سیاسی ردئٹ بھاز بدلی تے تیا شرہ کننگا۔ تنظیم نا شونداری ءِ تنظیم نا فکری راستی نا سوب پاننگا۔

سکریٹری رپورٹ ٹی پاننگا کہ اینو نا وخت ٹی بی ایس او نا بیانیہ نا راستی اونا بھلّا مسخت ءِ درشان کیک۔ بلوچ ڈغار نا حالیت نا رد ئٹ بی ایس او نا شون دے پہ دے بُڑزا برسہ کیک ہرا ننے تینا اہمیت آن واخب کرسہ کائک دا وڑ نا وخت ئٹ ننے تینا کاریم تون اوار اوار تینا اہمیت نا ہم اندازہ ءِ خلوئی ءِ۔

رپورٹ ٹی جہانی حالیت آتا ترندی ئٹ مٹ مروکا نشخہ غا ہم ہیت مس و رائٹ نا پر تشدد سیاست ٹی ودّنگ ءِ تیوی جہان ٹی پوسکنا سیاسی کُڑدہ بندی تیٹ ترندی بننگ و اقتدار نا خواجہ تپہ نا بے سہبی آ سرجمی ئٹ ہیت مس۔

بحث ٹی مونا پاننگا کہ کووڈ 19  آن معاشی عدم استحکام ئنا پاش مس ہرا سیاسی حالیت ءِ ہم زو اس مٹ کننگ نا پارہ غا درو ہراڑکن انقلابی طاغت آتا بیدار مننگ الّمی مرو۔ دا خاطر آن کہ اُلس نا بے جاراتی ءِ سیاسی دروشم اس تننگہ۔

بلوچ کلچر ڈے (دود و ربیدگ دے) ہر سال دو مارچ آ ہڈ تننگک۔ اینو دا دے ئنا رد ئٹ بلوچستان تون اوار تیوی جہان ئٹ مجلس و مچی تا ہڈتس برجاء ءِ ہرافتیٹ چنا بھلا تیتون زالبولک بشخ ہلنگو۔

بلوچ دود ربیدگ دے ئنا بناء 2010 آ مس۔ دا دے آ بلوچ مخلوق تینا ربیدگی پُچ آتے گوْر آ کریسہ بلوچ راج ئنا کُن و خور زند گدریفنگ نا دود و ربیدگ ءِ یات کیرہ۔

بلوچ دود ربیدگ دے ئنا بھلا مجلس آک بلوچستان نا بھلا شار آک کوئٹہ، گوادر تون اوار کراچی ئٹ ہڈ تننگرہ، زیملی مجلس آک دا مجلس آتا گچین آ بشخ پاننگرہ۔

وحید آجوئی نا چراغ

نوشت: ثناء بلوچ

دی بلوچستان پوسٹ

سوزہ رنگ مخوکا دروشم، چُنکا بالاد، نیم لاغر آ جوْن چلتن نا وڑ سوگوْ سلوک تینا بالاد آن مُرغنو سوچ تخوکا  وطن نا مڷ اینو آن منہ سال مُست تینا معصوم و دلیر آ سنگت، ہمسر، دلبر سلمان جان تون ہمرا دا بارن آ ڈغار آ دتر تے شولسہ ندر مسُر۔

ہرا وخت بلوچستان ملاسی آن چیہانٹ خلنگ ئس، نوری کمک خواٸنگ ٸس، نواب نوروز سنگت پٹنگ ٸس، ڈاکٹر اللہ نظر باشعور انگا سنگت آتے اسہ جاہ مُچ کننگ ٸس، نواب خیر بخش مری جنگجو پٹنگ ٸس۔ اندا وحید و دلیرا سلمان تینا خیسُن آ دتر ٸٹ ملاس آ ڈغار نا ملاسی ءِ دریر، نوری نا کمک، نواب نوروز نا سنگت، ڈاکٹر نا باشعور آ سنگت، و نواب خیر بخش مری نا جنگجو جوڑ مسر۔

ہرا وخت ظالم آک وحید جان نا بھلا ایلم کبیر جان ءِ بیگواہ کریر ہرا دائسکان ظالم تا زندان ٸٹ بھگت سنگھ نا ڈول آجوئی و انقلاب نا نعرہ ءِ خلیسہ ظالم تے دا کُلہو ءِ تننگ ءِ کہ کنا ایسری اُست خواہی وطن نا آجوئی یا شہادت ءِ۔ کبیر جان نا بیگوائی آن گُڈ وحید جان تینا ایلم نا جوزہ غاتے تینے ٹی ہتیسہ تینا سنگت تون ہمراہ خاک ءِ تینا سجدہ کریسا ظالم ءِ دا کلہو تسر کہ کبیر نا سیخاک نُما مون ئٹی ءُ نُم اخس کبیر خلورے؟ کبیر اسل کسپک او شہید سمیع نا دروشم ٸٹ زندہ ءِ، او زیبا غا ایلم سمیع نا زیبا غا جوْن ٸٹ زندہ ءِ، او لطیف نا جوزہ غاتیٹی زندہ ءِ، او گودی جویریہ نا راجی آ لوز آتیٹی زندہ ءِ، او ہر ورنا، پیر، کماش ٸٹی زندہ ءِ، او استاد اسلم نا فکر ٸٹی زندہ ءِ او مچ آ راج ٸٹی زندہ ءِ، او بلوچستان ٸٹی زندہ ءِ۔

وحید جان اسے خوانندہ ءُ ورنا اس ٸس۔ او بھاز مطالعہ کننگ نا سوب آن  پوہ مسکہ تینا کسر، مزاحمتی آ سفرے تینا راج ٸنا ڈُک آتے تینا ہیڑ تا بے وسی ءِ۔ اودے دا سما ٸس ننا ایسری مزل آجوئی ءِ نہ تو آجوئی آن بیدس ننا لُمہ غاتا ننگ ہیڑ تا غیرت سلامت مفرو و آجوئی بیدس دتر آن ملپک، آجوئی اسے تُغ ٸسے ہرادے ہر ورنا خنیسا بسونے ہرا نا تعبیر مننگ کن دتر بکارے و وحید تینا دلیر آ سنگت سلمان جان تون ہمراہ  ڈغارے دتر تریسا تینا دژمن ءِ دا کُلہو تسر دا ڈغار ننا ءِ نن ہر وخت تینا ڈغار کِن دتر تریسا کرون۔

ایسر ٸٹ شہید سنگت ثناء نا منہ لوز: “اوارن، اوارن تانکہ آجوئی اسکان اواران۔”

بلوچ اسٹوڈنٹس ایکشن کمیٹی نا بیان ردئٹ تدوکا دے ارٹمیکو بنجائی کونسل سیشن نا بابت مروک آ مرکزی کمیٹی نا مجلس ٹی سیشن نا تاریخ تخنگانے۔

تنظیم نا ارٹمیکو بنجائی کونسل سیشن مسکوئی وائس چیئرمین فیروز بلوچ بیاد شہید پروفیسر رزاق بلوچ، سنگت الیاس بلوچ 26، 27 و 28 مارچ آ کراچی ٹی ہڈ تننگو۔

بیان ٹی پاننگانے کہ بلوچ اسٹوڈنٹس ایکشن کمیٹی اسہ سوگوْ ءُ خوانندہ تنظیم ئسے ہرانا بنماس اسہ سوگوْ نظریہ و راہبند اسیتو تفوک ءِ۔ تنظیم تینا بناء آن ہلیس کہ اینو اسکان کل جمہوری اقدار ءِ مُستی دریسہ و ہر وخت تنظیمی دروشم ئٹ راہبند ءِ بڑز اوننگانے۔

بیان ئٹ مُستی پاننگانے کہ تنظیمی راہبند نا ردئٹ تنظیم ہر اِرا سال آن گڈ تینا بنجائی کونسل سیشن ہڈ تسونے و ہندا لڑ ءِ برجاء تخیسہ تنظیمی کابینہ ءِ اِرا سال پورو مننگ آ بنجائی کونسل سیشن نا پڑو کننگانے۔

تیوی جہان ئٹ امن سلامتی نا اومیت تون اوار بروکا سال 2021 ہم بلوچستان ئٹ روڈ شکست آتیٹی کمبوتی ہتنگ کتو، بلوچستان نا کسر تیا ویل آتا لڑ سلینگ کتو، جنوری نا توہ ئٹ برجائی تون اوار بلوچستان نا جتا کسر تیا 995 ویل مونا بسونو ہرافتے ٹی 1446 بندغ ٹپی و 106 بیران مسر۔

بلوچستان یوتھ اینڈ سول سوسائٹی نا پارہ غان برجاء مروکا روڈ شکست آتا گیشتری حوال آتا رد ئٹ بلوچستان ٹی جنوری نا توہ، 2021 ئٹ بلوچستان ئٹ 955 ویل مونا بسر ہرافتے ٹی 1446 بندغ ٹپی و 106 بیران مسر۔
بلوچستان یوتھ اینڈ سول سوسائٹی نا رد ئٹ ویل آک بلوچستان نا جتا آ شار و علاقہ تیٹی مسونو۔ کوئٹہ، مستونگ، کھڈ کوچہ، قلات، کان میتھرزئی پشین، بوستان، کچلاک، قلہ سیف اللہ، قلہ عبداللہ، چمن و مسلم باغ ئٹ 366 بیم بش کروک ءُ ویل مسر اندن ٹپی تا کچ 462 و 29 بیران مسر۔

خضدار، وڈھ، سوراب، باغبانہ لسبیلہ، وندر، اوتھل، گڈانی حب چوکی نوجوانی ٹی 564 ویل آتیٹی 566 بندغ ٹپی و 73 بیران مسر۔ ژوب، لورالائی ہرنائی، خانوزئی، شیرانی، موسی خیل و بدزئی ٹی 97 ویل آتیٹی 501 بندغ ٹپی و 41 بیران مسر۔

سبی، ڈیرہ مراد جمالی، ڈیرہ اللہ یار، ڈیرہ بگٹی، نصیر آباد، کوہلو، مچھ، بولان، جھل مگسی، رکنی، کولپور، و پیرغیب ئٹ 37 ویل آتیٹی 96 ٹپی و 12 مرک مسر۔ پنجگور، تربت، گوادر، تمپ، پسنی، مکران، کوسٹل ہائی وے، اورماڑہ جیونی ٹی 19 ویل آتیٹی 59 بندغ ٹپی و 6 بیران مسر۔

نوشکی، خاران، چاغی، دالبندین، نوکنڈی، تفتان، بسیمہ، اسماعیل یلانڈی احمد وال و یک مچھ ئٹ 92 ویل آتیٹی 95 ٹپی و 8 مرک مسر۔

برجاء آ تو فروری ٹی ہم منہ خاہوت زیمی مسر ہرافتے ٹی ارغ، زائیفہ و مسڑ بیران مسر، ہرافتا تعلقداری چمن آن اس۔ ایلو زیمی مروکا آ خاہوت لمہ، باوہ و مار بیران مسر و ارا چنا بھاز ٹپی مسر ہرافتا تعلقداری پنجاب آن اس۔ مسٹمی خاہوت باوہ و مار ہرتوم آک روڈ شکست ئٹی بیران مسر۔ ہرافتا تعلقداری کاسی قبیلہ غان اس، اسہ چنا اس ہرا جہان ئٹ بننگ آن مست روڈ شکست نا گواچی مس۔ اسہ پڈ ہر ءِ زالبول اس بیران مس ہرانا تعلقداری پنجگور آن اس، و اسہ پین خاہوت باوہ و مار ہڑتوم آک روڈ شکست ئٹی بیران مسر ہرافتا تعلقداری شیرانی آن اس۔

بلوچستان نیشنل پارٹی نا سر کماش و بنجائی اسمبلی باسک سردار اختر جان مینگل پارینے کہ بلوچستان نا حکومت تینا جوان انگا کاریم تیان تینٹ فریشان ءِ، ننے اوڑکن خواری کننگ نا خواست اف، جمعیت علماء اسلام تون اواری وڑ ڈول ٹہینگانے زوت ایلو پڑو کننگو، اِرا دے ودار کبو پی ڈی ایم نا ہدف مونا برو۔

دا ہیت آتا درشانی ءِ او پشتونخوامیپ نا سر کماش محمود خان اچکزئی نا اُرا غاہننگ نا وخت آ میڈیا تون ہیت کریسہ پارے۔ اوڑدئی ٹی محمود خان اچکزئی تون اوار پارٹی راہشون عثمان کاکڑ، رحیم زیارتوال، رضا محمد رضا و نصر اللہ زیرے ئسر و سردار اختر جان مینگل تون اوار بلوچستان اسمبلی نا باسک ثناء اللہ بلوچ، میرحمل کلمتی، بابو رحیم مینگل، نصیر شاہوانی ہم ساڑی ئسر۔

اوڑدئی ٹی سینٹ گچین کاری نا وخت آ پی ڈی ایم نا اوار انگا امیت وار آتا زی آ ہیت و گپ کننگا۔ محمود خان اچکزئی و سردار اختر مینگل پی ڈی ایم بلوچستان نا پڑ آ سینٹ امیت وار آتا اواری گمانی ءِ۔

پی ڈی ایم  تدوکا دے خیبر پختونخوا ٹی ہم اوار امیت وار آتا پڑو ءِ کرے۔ پی ڈی ایم نا بنجائی اجلاس ٹی صوبائی تلہ غا امیت وار آتا فیصلہ صوبہ ٹی ساڑی جماعت آتا راہشون آتا اوڑدئی آن گڈ سردار اختر جان مینگل میڈیا تون ہیت کریسہ پارے کہ بلوچستان حکومت تینا کروکا کاریم تیان تینٹ فریشان ءِ و حکومت ٹی اوار باسک آک ہم ڈکھیہ ءُ، داڑکن خواری نا خواست اف۔

او پارے کہ ہراڑ اسکان سینیٹ نا گچین کاری ٹی اوار مننگ نا ہیتءِ اوڑکن اِرا دے  ووار کبو، پی ڈی ایم نا ہدف تون اوار تیوہ آ گڑاک پاش مریرہ

او پارے کہ بلوچستان ٹی تیوہ آ سیاسی جماعت آک و قبائلی بندغ آک ننکن شرف نا لائخ ءُ، نن تینٹ سیاسی پارٹی تون تعلق تخینا پاش ءُ ہیت ئسے سینیٹ گچین کاری نا وخت آ تیوہ آ جماعت تون اوار اوڑدئیک برجاء مرور۔

فائل فوٹو

عوامی نیشنل پارٹی بلوچستان نا ترجمان اسد اچکزئی نا جون بلوچستان نا شار کوئٹہ نا علاقہ نوحصار آن خننگا۔

اسد خان اچکزئی ءِ 5 توہ مست بیگواہ کننگاسس۔ اسد خان اچکزئی عوامی نیشنل پارٹی بلوچستان نا صدر ایم پی اے اصغر خان اچکزئی نا الہ نا مار ئس و عوامی نیشنل پارٹی بلوچستان نا ترجمان ام ئس۔

اسد خان اچکزئی نا بیگوائی نا برخلاف نیشنل عوامی پارٹی اونا بیگوائی نا دے آن برانزی مچی کننگ و اوڑتون اوار غٹ بیگواہ غا بندغ آتے یلہ کننگ کن توار ارفنگ ئس۔

عوامی نیشنل پارٹی نا بنجائی کماش اسفند یار ولی خان بیگواہ غا اسد اچکزئی نا جون نا خننگ نا مذمت کریسہ پارینے کہ ریاست و حکومت نا ذمہ واری جوڑ مریک کہ وہ تینا اُلس و شاری تا رکھ ءِ کے۔

او مونی پارینے کہ پارٹی نا راہشون اسد اچکزئی 5 توہ بیگواہ ئس، ننا پارٹی ہر جاگہ اوڑکن توار ارفے و بلوچستان ہائی کورٹ اونا بیگوائی نا برخلاف پٹیشن ام داخل کرے ولے یلہ کننگ نا جاگہ غا اینو اونا جوْن خننگا۔