بلوچستان نا ضلع شیرانی ٹی طوفانی پر ڈیہہ ءِ بھس کرے، سدا تا مال و ساہدار آتا کہنگ آن بندغ آتے لکھ آتا نسخان تون مون تروئی تما۔

علاقئیک زیمی مروک آتا مالی کمک نا خواست ءِ کننگو۔

گیشتر حوال تا رد ئٹ ضلع شیرانی ئٹ تدوکا دے طوفانی پر کلی سرلکی و ایلوفتیٹ بھس کرینے، شیرانی نا علاقہ کلی سرلکی، حافظ بازگل، ملا شیر محمد، امین اللہ، مراد خان، لعل محمد، کلی لنڈیان نا سلیمان خان، گلزار، حسن خان و کلی استشی ٹی حافظ تیمور سخی جان، سید شاہ، حکیم، کلی خژوبی ٹی غلام، دوسمال محمد، حضرت خان، اختر شاہ، نظر محمد نا سد آتا مال و ساہدار تا کہنگ آن لکھ آ رپئی تا نسخان مسونے۔

پشتون قوم پرست جماعت پختونخوا ملی عوامی پارٹی نا سینیئر راہشون مسکوئی سینیٹر عثمان خان کاکڑ برین ہیمبرج آن گڈ تمیسہ ٹپی مس۔

پارٹی راہشون مسکوئی صوبائی وزیر عبدالرحیم زیارتوال نا رد ئٹ پنچ شنبہ نا دے عثمان کاکڑ کوئٹہ ٹی ئس کہ اونا دماغ نا رغ آک ترخار۔ برین ہیمبرج نا دا جلہو ٹی او تینے سنبھالنگ کننگ کتو و تمیسہ ٹپی مس۔ اونا کاٹم ٹپی مسونے.

عثمان کاکڑ دمدستی تون کوئٹہ نا علاقہ پشین سٹاپ نا اسپتال و ولدا کوئٹہ نا پنی نیورو سرجن ڈاکٹر نقیب اللہ نا کلینک آ دننگا ہراڑے ڈاکٹر نقیب اللہ، ڈاکٹر راز محمد کاکڑ، ڈاکٹر امان اللہ کاکڑ، ڈاکٹر فیض ترین و ڈاکٹر مناف ترین آنبرنگا ڈاکٹر تا ٹیم اودے آپریشن کریر۔

پارٹی راہشون نا رد ئٹ آپریشن آن گڈ عثمان کاکڑ سٹی انٹرنیشنل اسپتال آ دننگا ہراڑے اودے وینٹی لیٹر تے ٹی تخانو۔

عبدالرحیم زیارتوال پارے کہ پارٹی نا سینیئر راہشون نا حالیت خلیس نا ہد اسکان ءِ، او کومہ ٹی ءِ و آپریشن آن گڈ بیرہ اسہ وار نت آتے سریفینے۔

بلوچستان نا ضلع قلعہ سیف اللہ آن تعلقداری تخوکا عثمان خان کاکڑ پشتونخواملی عوامی پارٹی نا بنجائی سیکرٹری و صوبائی صدر ءِ۔ او عملی سیاست نا بناء ءِ مسہ دہائی مست پختونخوا میپ ئٹ اوار مننگ آن کرے و ہمو وخت آن انداڑے سلوک ءِ۔

محمود خان اچکزئی آن گڈ عثمان کاکڑ پشتونخوا میپ نا کل آن جواننگا راہشون پاننگک۔

عثمان کاکڑ 1987 ٹی کوئٹہ نا لاء کالج آن وکالت نا ڈگری ءِ دوئی کرینے۔ زمانہ طالب علمی ٹی ہم او پختونخوا میپ نا خوانندہ تنظیم پشتونخوا سٹوڈنٹس آرگنائزیشن تو اوار ئس۔

عثمان کاکڑ 2015 آن مارچ 2021 اسکان سینیٹ آف پاکستان نا باسک ئس۔ 2018 ٹی مسلم لیگ ن و ایلو جماعت آتا اتحاد آتون سینیٹ نا ڈپٹی چیئرمین نا جاغہ ہلنگ کن گچین کاری ٹی سلیس و سرسہب متو۔

پشتون تحفظ موومنٹ نا حامی عثمان کاکڑ ءِ سینیٹ ٹی ملٹری اسٹیبشلمنٹ نا سخت ناقد نا وڑ ئٹ پن دوئی ءِ۔

پاکستان ئٹ کورونا وائرس آن 46 بندغ مرگ نا گواچی مسونو، ہراڑان گڈ کہوک آتا کچ21 ہزار 874 مسونے،پاکستان ٹی کورونا نا پک مروکا کیس آتا کچ 9 لکھ 45 ہزار 184 مسونے۔

نیشنل کمانڈ اینڈ آپریشن سینٹر نا  پوسکونا حساب نا رد ئٹ تدوکا دے 24 گھنٹہ نا نیام ئٹی اسہ ہزار 119 پوسکنو کیسز رپورٹ مسونے، پنجاب ٹی 3 لکھ 44 ہزار 474، سندھ ئٹی  3 لکھ 29 ہزار 279، خیبر پختونخوا ٹی اسہ لکھ 36 ہزار 474،کیس رپورٹ مسونو۔

اندن بلوچستان ٹی 26 ہزار 409، گلگت بلتستان ٹی 5 ہزار 745، اسلام آباد ٹی 82 ہزار 253 اندن آزاد کشمیر ٹی 19ہزار 844 کیس  رپورٹ مسونو۔

تیوہ پاکستان ئٹ اینو آن کورونا نا پابندی تیٹ خلکونی کننگانے، و کاروبار ہفتہ ٹی ارا دے ئنا جاگہ اسہ دے بند مرو اندن دفتر آتیٹ سد فیصد ساڑی  مننگ نا موکل مرو۔

تدوکا دے  سندھ حکومت ہم ہفتہ ٹی ارا دے کاروبار نا بند مننگ ءِ  ایسر کریسہ بیرہ اسہ دے کننگ نا پڑو کرینے، وزیراعلیٰ سندھ  پنت تسونے  کہ ڈرائیونگ لائسنس کن کورونا ویکسین المی کننگانے، ٹاسک فورس نا اجلاس ٹی مراد علی شاہ نا پاننگ ئس کہ اینو چھٹی آن ہشت جماعت نا کلاس آک 50 فیصد ساڑی تون اوار ملینگور ، کورونا حالیت ٹی جوان مننگ آ  پرائمری کلاسز 21 جون آن ملینگور۔

ایلو کنڈان نیشنل کمانڈ اینڈ آپریشن سینٹر نا پوسکنا حساب نا رد ئٹ کورونا وائرس آن 59 بندغ مرگ نا گواچی مسونو، ہراڑان گڈ کہوک آتا کچ  21 ہزار 782 مسونے، پاکستان ٹی کورونا نا پک مروکا کیس آتا کچ 9 لکھ 43 ہزار 27 مسونے ۔

تدوکا دے  24 گھنٹہ نا نیام ئٹی  838 پوسکنو کیس رپورٹ مسونو، پنجاب ٹی 3 لکھ 44 ہزار 196، سندھ میں 3 لکھ 28 ہزار 663، خیبر پختونخوا ٹی اسہ لکھ 36 ہزار 205، بلوچستان ٹی 26 ہزار 275، گلگت بلتستان ٹی 5 ہزار 727، اسلام آباد ٹی  82 ہزار 170 آ ندن آزاد کشمیر ٹی 19 ہزار 791 کیس  رپورٹ مسونو۔

تیوہ آ پاکستان ئٹ  داسکان اسہ  کروڑ 38 لکھ 92 ہزار 289 بندغ نا ٹیسٹ کننگانے، تدوکا 24 گھنٹہ نا نیام ئٹی  35 ہزار 39 پوسکنو ٹیسٹ کننگانے، داسکان 8 لکھ 80 ہزار 316 ناجوڑ درواخ مسونو اندن 2 ہزار 611 ناجوڑ نا حالیت بد ءِ۔

پاکستان ٹی کورونا آن اسہ دے ئٹی 59 بندغ مرگ نا گواچی مسونو اندن  بد آ وائرس آن کہوک آتا کچ وا 21 ہزار 782 مسونے، پنجاب ٹی 10 ہزار 548، سندھ ئٹی 5 ہزار 256، خیبر پختونخوا ٹی 4 ہزار 234، اسلام آباد ٹی 773، بلوچستان ٹی 294، گلگت بلتستان ٹی 108 و آزاد کشمیر ٹی 569 ناجوڑ  مرگ نا گواچی۔

حوال تا رد ئٹ یک جولائی آن فلوملز ٹرن اوور ٹیکس 1-25 فیصد مننگ آن 20 کلو نُت نا باچک 30 رپئی کبین مننگ نا گمان ءِ۔

پاکستان نا راجی اسمبلی ٹی ہتوکا مالی سال نا فنانس بل ٹی فلور ملز کن ٹرن اوور کیس ٹی تروکا اڑزانی ایسر کننگانے ہراڑان گڈ ٹیکس زیات مننگ آن 20 کلو نُت نا باچک نا  نرخ ئٹی 30 رپئی ودکی نا گمان ودی مسونے۔

بروکا مالی سال نا فنانس بل نا رد ئٹ  نُت نا جوڑ کننگ ٹی کاریم ٹی ہتوک  مشیزی نا امپورٹ آ سیلز ٹیکس نا بناء 10فیصد آن زیات مریسہ 17 فیصد و نت آن پیشتموکا چوکر آ سیلز ٹیکس نا بناء 7 فیصد آن ودیسہ 17 کننگانے، اندن اولیکو جولائی آن فلور ملز نا بننگ آ ٹرن اوور ٹیکس ریٹ 0.25 فیصد نا جاگہ آ 25-1 فیصد مسونے۔

ایلو کنڈان چیرمین فلور ملز ایسوسی ایشن عاصم رضا فنانس بل ٹی ایف بی آر نا بے سرپدی سوج یا پوہ مروکا ٹیکس ودکی نا پک مننگ و حالیت نا نشان تننگ کن وفاقی وزیر خزانہ ءِچھٹی رادہ کننگانے۔

چیئرمین فلور ملز ایسوسی ایشن چھٹی ٹی پارینے کہ فنانس بل ٹی مننگ کروکا ردی نا سوب آن فلور مل ءِ کم آن کم ٹرن و ٹیکس نا شیڈول آن پیشن کرو، برجا مالی سال ئٹی فلور ملز آ 25 – 0 فیصد ٹرن اوور ٹیکس ٹہفنگانے، اندن راجی اسمبلی ٹی نشان تروکا فنانس بل ٹی فلور ملر ساڑی شیڈول آن کشنگانے۔

یک جولائی آن فلور ملز آ ٹرن اوور ٹیکس 25 ۔1فیصد مرو، و ٹیکس ٹی ودکی نا وڑ ئٹ نت ئنا 20 کلو نا باچک پین 30 رپئی کبین مرو، وفاقی وزیر خزانہ فنانس بل ٹی مروکا ردی جوان کریسہ اودے کبین مننگ آن ترینے۔