مسہ صوبہ ٹی بس سروس بناء مسونے ولے بلوچستان ٹی حکومت چپ ءِ – بلوچستان بس فیڈریشن

بلوچستان نا ٹرانسپورٹر آتا ہفت جون آن صوبہ و ملک ئنا ایلوم شار آتے کن بس سروس بناء کننگ نا پڑو کننگان ءِ۔

جنرل سیکرٹری بلوچستان بس فیڈریشن اختر محمد نا پاننگ نا رد ئٹ بلوچستان نا ٹرانسپورٹر آتا اجلاس کوئٹہ ٹی کننگا ہراٹی فیصلہ کننگا کہ بلوچستان ٹی 7 جون آن لس مخلوق نا ٹرانسپورٹ بناء مرو۔

او پارے کہ کوئٹہ ٹی لوکل بس سروس تون اوار، صوبہ ٹی و ملک نا ایلو شار آتیکن ٹرانسپورٹ بناء کننگو۔

اختر محمد پارے کہ مسہ صوبہ ئٹ بس سروس بناء مسونے ولے بلوچستان ٹی مخلوق چپ ءِ، اگہ بالی جہاز و ریل آک ہننگ کیرا گڑا بس سروس آ آنتے پابندی مرے؟

اونا پاننگ ئس کہ ننا کوشست مرو کہ بس سروس بناء مننگ تون اوار کورونا آن بچینگ کن تیوا جانجوڑی آسراتیک تننگ مریر۔

ای بنگونٹ
نوشت: یارجان زیب

دی بلوچستان پوسٹ

ای بنگونٹ شارٹ پدا اسے جنگ اسے نا بنا مسونے انت دا ہیت راست ءِ اگہ راست ءِ تو دا وار یا تو میڑ مف یا گڑا دا میڑ آن پد ہچو جنگ اس۔ بلوچستان نا سرزمین وختی آن جنگ آتا باتی تروکے ہراڑے ہر اسے برمش اس تینا لمہ ءِ توار کیک ءُ زار زار ہوغک دا توار آک عرش آ تو سرمریرہ ولے فرش آ فرعون جوڑ آ سیاست نا پجاری تا خف آ اوتا توار اسل سرمفک دانا سوب ہم اندا دے کہ اسے دے اس جہد کننگ آن ہچ اس دو بفک جہد مسلسل ہر مشکل نا حل و پختہ غا جوزہ ہر منزل کن المی ءِ۔

تاریخ نا پنہ غاتیٹی اینو کہی برمش تا پن آک اندن زندہ سلوک  ءُ ولے افسوز کہ اوتیکن جہد کروک ءُ کس متنے۔ اینو اگہ شعور ودی مسونے تو دا شعور و دا سوچ ءِ مونی دروئی ءِ ہراٹی ہر سختی آن پد منزل خڑک خننگو ءِ۔ دا سیاست نا ویل اس اف، ناکہ دا ویل ءِ سیاسی جوڑ کننگے۔ معصوم ءُ پری ئسے نا حق اکن بش مروکا دا جنگ ءِ میڑ کننگ تاریخ تون اوار اوار بلوچستان تون غداری آن کم مفروئے اینو اگہ اسے برمش سے کن بش مسرے پگہ پین برمش سے تون دا وڑ ظلم مفروئے۔

تاریخ اٙٹ بلوچستان نا سینہ دتر چُر و پنہ غاک ہم دتر ٹی نوشتہ ءُ، اسے کنڈا سیاسی نمائندہ غاکو تو ایلو پارہ غا سخت جان آ باشعور آ مخلوق ءِ ننا ہرا انصاف کن مونی سلوک ءِ تو اسے تاریخی ءُ جہد اسے ہراکن کمک و ہمت نا بھاز خواست ءِ۔ داجنگ ءِ کٹنگ کن سخت جان مننگ نا ضرورت ءِ، تاریخ ءِ پاننگ نا ضرورت ءِ کہ نن انت اُن و ننا ہیڑ لمہ غاتا کس اگہ ہُور اس ہم بڑزا کرے تو اودے مِشتا کرون۔

بھاز آ بندغ آک بیان ہم تننگ افس انتیکہ اوتے تینا پیسہ و 80 لکھ ئنا لاری تا خیال بریک کہ دن مف اوہم ننے آن ہنور، بے شک حق اکن جنگ زور خوائک و ہر سختی آن پد آسانی ءِ۔ اینو بلوچستان نا کہی ضلع غاتیٹی بندغ آتا نا حق خون مننگ ءِ ولے سیاسی و چاگردی بندغ آک چُپی نا روچہ ءِ تخانو انتیکہ اوتیا دا دیک بتا نو ہرادے او دا ویل آتا نیامٹ تمار تو اوتیکن ہم توار چست کروکو کس اس نظر بفرو ءِ۔

مقافات ءِ عمل ءِ، امر کروس اندن خنوسک و ننا مونا دنو کہی مثال اریر ولے مخلوق سرپند مننگ خواپک ہرا اسے ویل اسے آن کم اف۔ تاریخ نا پنہ غاک بلوچ ءِ ہرا عزت و بہادری نا شان اٹ نازیفیرہ مننگ کیک دا کل ئنا جہد ہمو کل تاریخ ءِ اسے وار ولدا زندہ کہ ولے اگہ دن متو تو ننے ماضی اٹ زندہ مننگ نا ہچو حق اس مفرو ءِ و ولدا ہر جاگہ تینا تدوکا بہادی نا کسہ غاتے پاننگ آن مست تینا دا حال ئنا چُپی، بے عقلی و بے سمائی نا باروٹ سوچن ہراکے ننے کہی صد سال پدی بٹوئے۔ مننگ کیک ننا ہیت آک سخت مرور ولے حقیقت اندن ءِ۔

دی بلوچستان پوسٹ نیوز ڈیسک ءِ رسینگوک حوال آتا رد ئٹ بلوچستان نا جتا علاقہ تیٹ سڑک نا ویل آتیٹ پنچ بندغ ٹپی مسر۔

حوال آتا رد ئٹ بارکھان روڈ آ نزر زکریانی پیٹرول پمپ آن خڑک موٹر سائیکل ترندی تون ہننگ نا سوب آن توننگ مفرنگ آ تما ہراڑان ماسٹر عبدالکریم ولد صوفی جمعہ خان قوم گھورچانی بھاز ٹپی مس، اودے رکنی سیول ہسپتال آ دننگا۔

ایلو پارہ غان گوادر بلوچ ہوٹل نا مونا سڑک نا ویل ئٹی اسہ بندغ اس ٹپی مس۔ اودے بے سمائی نا حالیت ئٹ جی ڈی اے ہسپتال آ دننگا۔ حوال آتا رد ئٹ اونا تعلقداری گھٹی ڈور آن ءِ۔

اندن پشین کوئٹہ بھلا سڑک آ جلوگیر یارو نا ہند آ کار و تیل دروکا ٹرالر اسٹ ایلو تون ڈک لگار ہراڑان مسہ بندغ ٹپی مسر۔ ٹپی تے کچلاک نا پرائیویٹ ہسپتال آ دننگا۔ موٹر وے و کچلاک پولیس ہند آ سر مسر و شکست نا بابت پٹ و پول ءِ بناء کریر۔.

ہزارہ ڈیموکریٹک پارٹی نا چیئرمین عبدالخالق ہزارہ کرونا نا گواچی مس، دا سوب اودے کراچی آ دننگا۔

گوازی، ربیدگ و سیل سوات نا مشیر عبدالخالق ہزارہ (کووڈ 19) کورونا وائرس نا گواچی مس، طبیعت خراب مننگ آ اودے کراچی آ دننگان ءِ۔

ترجمان ہزارہ ڈیموکریٹک پارٹی نا رد ئٹ صوبئی گوازی، ربیدگ و سیل سوات نا مشیر و ہزارہ ڈیموکریٹک پارٹی نا راہشون عبدالخالق ہزارہ ہم کرونا وائرس نا گواچی مس۔ درو طبیعت خراب مننگ آ اودے کراچی ساؤتھ ہسپتال ءِ دننگا۔

اندن حوال آتا رد ئٹ ضلع مستونگ ٹی کرونا وائرس نا پین یانزدہ کیس مونا بسونو۔

پی آر او نواب غوث بخش رئیسانی ہسپتال نا دا بابت پاننگ ءِ کہ 21 بندغ نا ٹیسٹ آک ہلنگاسس ہرافتیٹ دئے موٹروے افسر آتا ہم ٹیسٹ اوار ئس۔ ہلوک نمونہ غاتیان یانزدہ بندغ ئٹ کرونا وائرس پک مسونے و نوہ بندغ نا رزلٹ منفی ٹی بسونے اندن اسہ بندغ ئسے نا رزلٹ ءِ بروئی ءِ۔

اندن دو شمبے نا دے 29 بندغ نا ٹیسٹ آک کننگاسر اوفتا ہم رزلٹ بروئی ءِ۔

ﺍﻓﺴﺎﻧﮧ
ڈﯾﻮﺍ

نوشت: حمید ﻋﺰﯾﺰ ﺁﺑﺎﺩﯼ

دی بلوچستان پوسٹ

ﭼﻠﮧ ﻧﺎ ﻣﺮﻏﻨﺎ ﻧﻦ ﺍﭦ  ﺗﯿﻮﯼ ﺩﺷﺖ ﻭ ﺩﯾﺎﻣﺎﻥ ﭨﯽ  ڈﮐﮫ ﺩﮌﺩ ﺁ ﺗﺎ ﮔﻨﺪﺍﺭ ﺁ ﻏﻢ  ﺗﺎ ﻣﺌﻮﻥ ﺍﻧﮕﺎ ﮔﺪﺍﻥ ﺑﺶ ﺍﺱ۔ ﺍﻧﺪﺍﺋﯽ ﻧﺎ ﺑﯿﻢ ﮨﺮﺍﺳﭧ ءِ ﻣﺮﻏﻨﻮ ﭼﭙﯽ ﺳﮯ ﻧﺎ ﮔﻮﺍﭼﯽ ﮐﺮﯾﻨﮯ، ﻧﮧ ﺗﮏ ﻧﮧ ﺗﻮﺍﺭ۔۔۔۔۔۔ ﺑﯿﺮﮦ ﮐﭽﮏ ﺁﺗﺎ ﮨﻮﺁﻟﻨﮓ۔۔۔ ﺩﺍ ﮨﻮﺁﻟﮧ ﻏﺎﮎ ﻏﻢ ﻭ ﮔﮍﺗﯽ ﻧﺎ ﭘﮍﻭ ءِ ﭘﯿﻦ  ﺯﯾﺎﺕ ﮐﻨﻨﮓ ﺍﺳﺮ۔

ﻃﻮﻓﺎﻧﯽ ﺁ ﺗﮩﻮ ﮨﻢ ﺗﯿﻨﺎ ﮐﺎﭨﻢ ﺁ ﻣِﺶ ﺷﺎﻏﻨﮓ ﺍﺱ ، ﻭﻟﮯ ﺩﺍ ﻣﺞ ﻭ ﺩﻧﺰﭦ ﮨﻢ ﺍﻣﯿﺖ ﺧﺎﻥ ﻧﺎ ڈﯾﻮﺍ  ﺗﯿﻨﺎ ﭨﻤﮑﮧ ءِ ﺑﺮﺟﺎ ﺗﺨﺎ ﺳﺲ۔ ﺩﺍ ڈﯾﻮﺍ ﺍﻭﻧﺎ ﺑﺎﻭﮦ ﭘﯿﺮﮦ ﻏﺎﺗﺎ ﻭﺧﺖ ﺁﻥ ﺗﯿﻨﺎ ﺭﻭژﻧﺎﺋﯽ ءِ ﺍﺳﮧ ﺩﻭ ﺁ ﺗﺎﻻﻥ ﮐﺮﺳﺎ ﺑﻨﻨﮓ ءِ، ﻧﻮﺍ ﮐﺲ ﺩﺍ ڈﺭﯼ ءِ ﺧﻠﻮ ﮐﮧ ﺩﺍ ﺧﻠﻖ ﺍﭦ ﺯﻧﺪﮦ ﺍﻭ ﺑﻨﺪﻍ ﮨﻢ ﺍﻑ۔۔۔ ﯾﺎ ﺩﺍ ﺩﺷﺖ ﭘﯿﻦ ﺧﺮﻣﺎﺋﯽ ﻣﻒ۔۔۔۔ ؟

 ﺩﺍ ﮔﮓ ﺗﮩﺎﺭ ﺁ ﺷﻮﮔﯿﺮﯼ ﺁ ﻧﻦ ﺍﻭﻧﺎ ڈﻟﮧ ﻏﺎ ﺧﻦ ﺗﮯ ﺍﺳﮧ ﺧﯿﺴﻦ ﺍﻭ ﺧﻤﺎﺭﺱ ﺑﺸﺨﺎﺳﺲ، ﺍﻭﻧﺎ ﭘﺮﻭﮐﺎ ﺧﻦ  ﺗﮧ ﭨﯽ ﺍﺳﮧ ﭘﻮﺳﮑﻨﻮ ﺯﻧﺪ ﺍﺳﮯ ﻧﺎ ﺳﮩﺐ ﮔﺮﻭﺷﮏ ﺗﺴﮑﮧ۔۔ ﺍﻭ ڈﯾﻮﺍ ﻧﺎ ﺭﻭژﻧﺎﺋﯽ ﭨﯽ ﺁﺧﺒﺖ ﻧﺎ  ﮨﻨﯿﻦ ﺁ ﺯﻧﺪ ﺧﻨﺎﮐﮧ ، ﺍﻭ ﻧﺎ ﺍﻣﯿﺘﯽ ءِ ﻧﺖ ﺁ ﻟﺘﺮ ﮐﺮﺳﺎ ﮔﺮﺑﺎﻡ ﮐﻦ ﮨﺮﻭﮎ ﺍﺱ، ﮨﻤﻮ ﮔﺮﺑﺎﻡ ﮨﺮﺍﮌﮐﻦ ﺍﻭﻧﺎ ﺑﺎﻭﮦ ﭘﯿﺮﮦ ڈﯾﻮﺍ ﭨﯽ ﺧﯿﺪﻭ ﺩﺗﺮ ﻧﺎ ﺗﯿﻞ ﺷﺎﻏﺴﺎ  ﺍﻭﺩﮮ ﺭﻭﺷﻦ ﺗﺨﺎﺳﺮ ﮨﻤﻮ ﺭﻭژﻧﺎﺋﯽ ﮨﺮﺍﮐﮧ ﺍﺳﮧ ﭘﻮﺳﮑﻨﻮ ﺯﻧﺪ ﺳﮯ ﻧﺎ ﭘﮍﻭﺋﮯ ﮐﮯ۔۔، ﮨﻤﻮ ﺯﻧﺪ ﮨﺮﺍﭨﯽ ﻧﺖ ﺷﭙﺎﺩﯼ ﺑﮯﮔڈﺭﯼ، ﻣﺤﺘﺎﺟﯽ ﻧﺎ ڈﺱ ﻭ ﻧﺸﺎﻥ ﻣﻒ۔

ﺍﻣﯿﺖ ﺧﺎﻥ ﺗﯿﻨﺎ ﻣﺎﺭﮮ ﺗﻮﺍﺭ ﮐﯿﮏ، ﺗﯿﻨﺎ ﮐﯿﺐ ﺁ ﺗﻮﻟﻔﮏ ﭘﺎﺋﮏ۔۔۔۔ ﺍﮮ ﮐﻨﺎ ﻓﺮﺯﻧﺪ، ﺩﺍ ﮨﯿﺖ ﮔﻮﺍﭼﻨﯽ ﮐﮧ ﺩﺍ ﻣﺮﻏﻨﺎ ﺗﮩﺎﺭﺁ ﻧﻦ ﺍﭦ ﻧﺎ ﺍﯾﻠﻤﮏ ﺍﯾﻨﻮ ﺍﺳﮑﺎﻥ ﮐﻮﺭﮔﻢ ﺍﻭ ﭼﻨﺪﯾﮏ ﺷﺮﯾﺪﮦ۔۔۔ ﺗﯿﻮﯼ ﺧﺎﮨﻮﺕ ﻟﻨﮕﮭﮍﯼ ﻭ ﺑﮯ ﺧﻮﺭﺍﮐﯽ ﻧﺎ ﺳﺒﺐ ﺁﻥ ﻣﺌﻮﻥ ﺍﻧﮕﺎ ﺯﮌﺩﻭﺋﯽ ﺍﻭﻓﺘﮯ ﮔﻮﺭ ﻧﺎ ﮔﻠﯽ ﺍﺳﮑﺎﻥ ﺳﺮ ﮐﺮﯾﻨﮯ۔

ﻣﺎﺭ ڈﻏﺎﺭﮮ ﮐﻮﻧڈﺳﺎ ﺑﺎﻭﮦ ﻧﺎ ﮔپ ﺁﺗﮯ ﻣﺎﺧﻮﻝ ﺍﻭ ﻃﺐ ﺳﮯ ﺗﻮﻥ ﺑﺤﺎﺯ ﺗﮩﮑﯿﺮﭦ ﺧﻒ ﺗﻮﺭﯾﮑﮧ۔۔ ﻣﺎﺭ ﺗﯿﻨﺎ ﺧﻦ ﺗﮯ ﺑﮍﺯﺍ ﮐﺮﮮ ﭘﺎﺭﮮ۔۔ ﺩﺍ ﻣﺌﻮﻥ ﺍﻧﮕﺎ ﻃﻮﻓﺎﻥ ﺍﭦ  ﺍﯼ ﺍﻧﺖ ﮐﻨﻨﮓ ﮐﯿﻮﮦ۔۔۔۔؟ ﮐﭽﮏ ﺁﺗﺎ ﮨﻮﺁﻟﻨﮓ ﻭﺧﺖ ﻭ ﭘﺎﺱ ﺗﻮﻥ ﺍﻭﺍﺭ ﺍﻭﺍﺭﭘﯿﻦ ﺯﯾﺎﺕ ﻣﻨﻨﮓ ءِ، ﮨﺮﺍﮐﮧ ﺩﺷﺖ ﻭ ﺩﯾﺎﻣﺎﻥ ﻧﺎ ﺧﻠﻘﺖ ﮐﻦ، ﺍﺳﮧ ﮔﻨﺪﮦ ﺍﻭ ﺷﺮﮎ ﭘﺎﻝ ﺳﮯ ﮔﻤﺎﻥ ﺍﻧﺪﻥ ءِ ﮐﮧ ﺑﺮﻭﮐﺎ ﭘﺎﺱ ﺗﯿﻦ ﺗﻮﻥ ﭘﯿﻦ ﺗﺒﺎﮨﯽ ﻧﺎ ﺳﺎﺯ ﻭ ﺳﺎﻣﺎﻥ ﺗﺪ ﮐﯿﮏ۔۔۔ ﺍﺑﺎﺟﺎﻥ،  ﺩﺍ ﻃﻮﻓﺎﻥ ﻧﺎ ﻣﻮﻥ ﺗﻨﻨﮏ ﮐﻦ ﻧﻦ ﺗﻮﻥ ﺍﻧﺖ ﺍﺯﺑﺎﺏ ﺍﺭﮮ۔۔۔۔؟ ﻃﻮﻓﺎﻥ ﺗﺮﻧﺪﮮ، ﺍﻭﻧﺎ ﺟﮩﻠﻮ ﺳﮭﺒﺮ۔۔۔۔۔

ﺑﺎﻭﮦ ﺗﯿﻨﺎ ﻣﻮﻝ ءِ  ﺗﯿﻨﺎ ﻣﻮﻥ ﺁﻥ ﻣﻠﺴﺎ ﭘﺎﺭﮮ۔۔، ﻧﺎ ﮔﭗ ﺁﮎ ﺑﺴﭧ ﮔﻮﺍﭼﻨﯽ ﺍﻭ ﻭﻟﮯ ﻧﯽ ﯾﺎﺕ ﺗﺦ ﮐﮧ  ﻧﻦ ﺗﻮﻥ ﮨﻤﻮ ﺍﺯﺑﺎﺏ ﺗﺪﮮ ﮨﺮﺍ ﺩﮮ ﮨﭽﻮ ﺗﮩﻮ ﻃﻮﻓﺎﻥ ﺍﺱ ﭘﺮﻏﻨﮓ ﮐﭙﮏ ﻧﮧ، ﺍﻭ ﺍﺯﺑﺎﺏ ء ﻧﻨﮯ ﺁﻥ ﮐﺲ ﭘﻠﻨﮓ ﮐﯿﮏ، ﺩﺍ ﮨﻨﻮﺩﮮ ﮐﮧ ﭘﯿﮍﯼ ﺗﯿﺎﻥ ﻧﻨﮯ ﺍﺳﮑﺎﻥ ﺳﺮ ﻣﺴﻮﻧﮯ۔

ﻣﺎﺭ ﺣﯿﺮﺍﻥ ﻣﺮﺳﺎ ﺳﻮﺝ ﮐﺮﮮ ﭘﺎﺭﮮ، ﺍﻭ ﮨﺮﺍ ﮨﺘﯿﺎﺭﮮ ﮐﮧ  ﻃﻮﻓﺎﻥ ﻧﺎ ﮔﻮﺍﭼﯽﻣﻔﮏ۔

ﺍﻣﯿﺖ ﺧﺎﻥ ﭘﺮ ﺍﻣﯿﺖ ﺍﻭ ﺩﺭﻭﺷﻢ ﺳﮯ ﺗﻮﻥ  ﭘﺎﺭﮮ، ﺍﻭ ﮨﻤﻮ ڈﯾﻮﺍ ءِ ﮐﮧ ﻧﻦ ﺗﻮﻥ ﺑﺎﻭﮦ ﭘﯿﺮﮦ ﻏﺎﻥ ﺑﺮﺳﺎ ﺑﻨﻨﮓ ءِ، ﺍﯾﻨﻮ ﺩﺍ  ڈﯾﻮﺍ ﺍﻣﯿﺖ ﺧﺎﻥ ﺗﻮﻥ ﺧﻮﻧﺪﯼ ء، ﻧﯽ ﮨﻢ ﺍﻣﯿﺖ  ﻧﺎ ﻣﺎﺭ ﺍﺱ ﮐﻨﮯ ﺁﻥ ﭘﺪ ﺍﻣﯿﺖ ﻧﺎ ڈﯾﻮﺍ ءِ ﮔﻞ ﮐﻨﻨﮓ ﮐﻦ ﮨﻠﭙﯿﺲ، ﺩﺋﮯ ﭨﮏ ﺿﺮﻭﺭ ﺍﯾﺘﮏ۔۔۔۔۔ ﺩﺍ ﮐﻨﺎ ﺍﻣﯿﺖ ءِ۔

براہوئی بولی اٹ افسانہ نوشتہ کننگ و مٹ کننگ نا پڑ آ کاریم کروک عامر فیاض نا کتاب ‘قطب نا کُنڈ آ’ آماچ ادبی دیوان – بلوچستان نا پارہ غان شینک مس۔

قطب نا کنڈا عامر فیاض نا افسانہ غاتا ارٹمیکو کتاب ءِ داکان مالو افسانہ غاتیا تالان کتاب ‘باریم’ شینک مسونے و اندن ‘گچین آ افسانہ’ نا پن ئٹ ہم اونا کتاب اس شینک مسونے ہراٹی او جتا براہوئی افسانہ غاتے مچ کرینے کتابی دروشم تسونے۔

‘قطب نا کنڈ آ’ نا شینک مننگ آ بلوچستان ادبی فورم عامر فیاض ءِ است ئنا ہب ئٹ مبارک باتی تسونے۔

عامر فیاض براہوئی افسانہ نگاری ٹی بلوچستان یونیورسٹی آن ایم فل کرینے و ادبی تنظیم آتون ہم سیالی تخانے۔

پنی آ ادیب و شاعر غمخوار حیات ‘قطب نا کُنڈ آ’ تینا خیال تا درشانی ءِ کتاب نا پد پنہ غا ‘عامر فیاض و براہوئی افسانہ نا ردوم’ نا سرحال تون کریسہ نوشتہ کرینے کہ دا خوشی نا گپ ئسے کہ براہوئی ٹی افسانہ نا پڑا دے پہ دے آن پینگنی و سوبری بننگ ءِ۔ داتی ہچو شک اس اف کہ پوسکنا پدریچ براہوئی افسانہ ءِ گچین ردوم اس بشخنگ ءِ و عامر فیاض ہم براہوئی افسانہ نگار تا ہندا پدریچ و ردوم اٹ ساڑی ءِ۔ ہرافک افسانہ ءِ ونا پوسکنا فنی، تکنیکی دروشم و سرہال تون اوار مون مستی دننگو۔

غمخوار حیات مُستی نوشتہ کیک کہ عامر فیاض تینا پوسکنا تجربہ غاتون اوار مون مستی برسہ ءِ، اونا دا افسانہ غاک اونا مالو نا افسانہ تے آن فنی، فکری اعتبار اٹ جتا ءُ ولے عامر فیاض نا افسانہ تے آ تاک اسکان سرجمو تنقیدی جاچ اس مون آ بتنے اونا افسانہ نگاری نا نزوری جوان وڑ اٹ درشان مننگ کپک۔

انتئے کہ عامر فیاض کوشست کیک کہ کسہ ءِ ایسر کیو ولے کسہ داسکان اوڑان ایسر مننگ اف۔ ولے اونا کسہ جدت آن، اساطیر، گدروکا وخت نا پارہ غا ہنسہ مالو نا بیان کروک آ کسہ تا وڑ خننگک۔ اونا افسانہ تیت جاگہ جاگہ تصوف نا درک ہم مریک و اونا کڑدار تیٹ عشق ووجدان تون اوار تینا محبوب اسکان رسائی کہ بے جاراتی اس خننگک ہرا بے جاراتی افسانہ نگار نا جند، اونا کڑدار و خوانوک اسے جاندمی پارہ غان قطب نا کنڈا دیک، ولے اونا کڑدارک عشق اٹ داسکان گنوک افس، دا کردار تا گنوکی اونا افسانہ ٹی اتنئے بتنے داڑکن نمے اونا دا کتاب ٹی ساڑی ہر اسہ افسانہ ءِ باز خوڑتی ٹی خوانوئی مریک۔

افسانہ
چیہانٹ آن چیہانٹ اسکان

نوشت: حسن ناصر

گوربام نا وخت ئس، آسمان نا سینہ غا جمر آک خیسنی کریسر۔ او بے تاغت حویلی ٹی داکا ایڑسکان کاہک، اے کا داڑسکان۔ او ہبکہ…. ہندن لگک کہ او اسہ بھلو وہم و بھیم اسے ٹی اختہ ءِ۔ ڈغار اوڑکن تین۔ اونا کننگ کن ئس۔ اونا گد وار وار آ تلوسی ٹی اونا کاٹم آن تماکہ و او گد ءِ تینا کاٹم آ کرسا اونا پلو ءِ باٹی کریکہ۔ آسمان نا پارہ غا ہُراکہ تین تون تینٹ مُرمٹاکہ۔ وار اس کاٹم آن گد ءِ شیف کرسا کاٹم پیشن دوتے بڑز کریکہ و دعا کرسا اسہ بھلو آڑسندہ اس کشاکہ…. یا خدانی رحم کیس، ننا زی آ، ننا خاہوت و تیوی آ خلق آ۔

اینو او تینا رنگ ءِ ہم گوہاسس۔ اونا رنگ پوشکن ہڑسینگاسس او چنا ءِ اسکول کن تیار کننگ آن مست کنے آن سوج کرے کہ اینو ننا چنا اُرا ٹی ننا خن تا مون آ مرے، اینو اسکول آن چھٹی کے ولے ای اودے پاریٹ؛ انتئے چھٹی کے۔ ای زور شاغاٹ کہ او کاہک اونا خواننگ انتئے خراب مرے۔ او اسکول آ مون تننگ آن مست اسہ بانگو اس اونا دارہ ایرہ غان ہڑسا۔ اونا تیوی غا ہوش پام چناڑتون ئس، او ندر سدخہ مرسا اودے اسکول کن مون تس۔ اونا مون تننگ آن گڈ اونا تلوسہ ئی پین گیشتر مس۔ ای سہب انا سے اونا تلوسہ ئی ءِ خننگ ئسٹ، اونا دا تلوسہ ئی کنے فریشان کرے کہ اینو گل خاتون ءِ انت مس کہ او اینو دن بے تاغت ءِ۔

دے زوال نا وخت پاس ءِ خڑک کریسس۔ داسہ اونا تلوسہ ئی پین گیشتر مس۔ او ہبکہ مرسا بش مسکہ درگہ نا پلک ءِ ملاکہ ہُراکہ و پدا بسکہ۔ ای داسہ اونا بے تاغتی و تلوسہ ئی ءِ پین سگنگ کتوٹ۔ اخیر اوڑان سوج کریٹ خیر ءِ، نا لمہ اینو دن بے تاغت چرخ کیسہ۔ تلوسہ ئی ٹی وار اس دانگ کاسہ وار اس اینگ، وار اس ہبکہ آسمان نا پارہ غا ہُرسہ تین تون تینٹ ہیت کیسہ، انت ویل اس ہلکنے نے۔ او کنا پارہ غا ہرسا؛ غریب اینو نا دے اٹی اسہ عجب ءُ خوف و بھیم اس تخوک ءِ…. اینو سہب انا بانگ آ بومب انا توار کنا خف تیا تما اینو او شوم پال ننا خلق اٹ ہند کرینے۔ دا اسہ بھلو آفت اسے نا کلہو ءِ ایتک ای۔ اودے تسلی ترسا او غریب دانا وہم ءِ۔ اینو نا دے ہم ہڑدے آنبار ہمودے ٹک ہمو ڈغار، ہمو خدا۔ انت شرک پال اس ہرفینُس۔ آخا غریب اینو کچک آک ہم ہوہالنگ ءُ…. کنے ہول ہرفنگ ءِ کہ اینو ننا خلق آ خدا رحم کے۔ اینو دے انا روشنائی پین وڑ ءِ۔ دے سوانیزہ غاٹے۔ دے اٹ اسہ بھلو باسنی اسے ہندن لگک کہ اسہ بھلو آفت اس ڈغار نا کیدنگ کن بننگ ءِ۔

ای اودے حوصلہ ترسا ہناٹ کہ دانا وہم ءِ خدا خیر کیک ہچ ءُ ہیت اس اف۔ اونا اسہ ہیت ئس…. نہ ….نہ…. کچک آتا غو ¿کہ ئِ بنپیسہ….؟ اینو خلق اٹ بھلو گلہ سگ اس مچ مسنے ننا خلق انا چندی باتی تے دتر چر کرینو۔ داسہ کنے مار اکن گڑتی ہرفنگ ءِ کہ او اسکول آن بروءِ تو کچک آک اودے نسخان ترور۔ ہندا ہیت اتو اسہ وار ولدا بش مس درگہ نا کنڈ آ ہنا۔ وا بس غریب بشہ نی انتئے دن بے غم تولوک اُس دن، نہ کہ دا کچک آک کنا مارءِ نسخان ترور۔ ای مچے ترندی ٹی؛ انت سہب سبا ءِ مڑدان نائے دندان نسنگ اس ہرفینس اونا چھٹی نا وخت ارے۔ نم نیاڑیک تو چڑہ شرک پال کیرے مگہ کنا چنا اف۔

او کنا پارہ غا خار اٹی اُرا…. امر کیو آخر لمہ اُٹ  خنانُٹ اکن تے۔ کنا تو او است آن خرّانے ای امر گڑتی کپر۔ او مرمٹسا …. کنے تو ہندن لگک کہ دا ڈغار دتر کن ملاس ءِ…. ننا خلق آ اسہ بھلو ٹک اس تمنگ والا ءِ۔

ای مچے پین زیات ترند مرسا…. تمے دنّان تیا نا انت شرک پال اس ہرفینُس کنا دھڑکو تیان او خار اٹی کنا ماس آن بش مس۔ داسہ اونا ہیت آک کنے ہم سوچنگ آ بیوس کریر۔ اونا دن تلوسہ ئی و ہبکہ مننگ آن ای ہم وہم انا گواچی مسٹ۔ داسہ کنا صبر ہم تینا ہنر آن بے ہنر مس۔ ایکا کچک آتا غپارہ نا توار آسمان ءِ کاٹم آ ہرفیسس ای ہم چست مسٹ داسہ ہڑدوسر نا بے تاغتی گیشتر مس۔ ای بش مسٹ کہ کاو تینا چنا ءِ تینٹ اتیو ہنداڑتون اسہ ترند ءُ چیہانٹ اس کنا خف تیان کنا است اٹ لگسا کنا جون اٹ اسہ عجیب ءُ لڑزہ اس شاغا، کنے ہندن لگاکہ کس کنا روح ءِ کنا جون آن کشنگ ءِ….

 ای لپڑزہ مرسا پیشن پیش تماٹ اسہ بھلو مج دنز لوڑ اس تیوی آ خلق ءِ پلویڑ کریسس۔ دا دنز مج اٹ کنا مار انا دروشم کلہی سیٹ خننگاکہ۔ اسہ بھلو گلہ سگ اس اودے پلویڑ کریسس۔ ہر پارہ غان کچک آک اوڑا بابٹنگ ئسر۔ اونا دروشم ہناسس ہس آنبار ہڑسینگاسس، اونا خن تے ٹی اسہ بھلو بھیم و خلیس اس تالان ئس۔ او تینا رکھ اکن تینا بستہ ءِ دانگ اینگ خساکہ ولے دا نہارک دا معصوم نا بستہ ءِ ٹکر ٹکر کریسر اونا کتاب آک ہندا لوڑ اٹ پنہ پنہ تالان ئسر۔

او ہراتم کنے خنا تو اسہ وار ولدا اسہ ترند ءُ چیہانٹ اس چست کرے۔ ابا…. کنے دا کچک آتیان بچف۔

داسہ ای اونا کنڈ آ رُم کیوہ او کنا کنڈ آ، دا نہار تا نیام اٹ نن کلہی سیٹ تینا ساہ ءِ اسہ ایلو آسر کرین، او اسہ وار اتو بس کنا بانکر اٹ، کنا سینہ غا ہندن لچا۔ ای پاریٹ کہ کنا سینہ کپ مرے، ای اودے تینا است اٹ جاگہ ترسا دا دنیا نا ظلم زوراکی و ڈکھ ویل آتا سیخا ءِ ہم اوڑا تمنگ کن الیپر۔ کچک آک ہڑدوسر آ بابٹنگ ئسر…. ہنداڑتون اونا لمہ ہم مادری آ جوش اٹ چیہانٹ خلسا ننا کنڈ آ رُم کرے۔ نن ہڑدوسر تینا چنانا بچفنگ نا جہد اٹ۔ ای دانگ اینگ چک خلکٹ کہ دا ٹاک نیمروچ اٹ نوا ننا دا ترند آ چیہانٹ کس آ سرمرے و او ننا کمک کن برے۔ ولے ننا دا چیہانٹ آک خلق والا تے بش کننگ اٹ سرسہب متوس۔

ای فریشان کہ دا بندغ آتے انت مس انت انسانیت پاہو ہلک کہ ننا دا بے وسی و تلوسہ ئی آ چیہانٹ آتیان تو آسمان کپ مننگ ءِ دا ڈغار والاتیا ننا توار انتئے سرمفک۔ ہستین نہار آتا راج ءِ ٹاک نیمروچ روشنا غا دے اٹ انسان آتا خاچنگ کنے تہہ آن کُننگ ئسکہ۔ ای تینا دوتے دانگ اینگ خساٹہ۔ دا نہار آتا دنّانک کنا جون اٹ پیہسا کنے دتر چُر کننگ ئسر۔ ہراتم نا ءِ ننا دتر نا تام اوفتا دوی آ لگاسس او پین ہڑی مننگ ئسر۔

دا کچک آک تو ننا خلق انا اِرغ آتیا ولسا بسر مزہ کاٹم مسوسر اوفتے ننا نمک ہم خلنگ اَلو کہ او تینا خیر خواہ تیا جلہو کیر، سہدار تو سہدار ءِ بندغ نا بندغی چُٹا تو او ہم کل ءِ گیرام کیک نہار جوڑ مریک۔ داسہ ننا خنک آسمان نا پارہ غا توروک ئسر کہ اے حفیظ آ ذات نی ننا وار آ بَر…. داسہ ہر کنڈ آن دا نہارک ننے آ بابٹنگ ئسر…. ننا جون ٹھپی ٹوری دتر چُر۔ کنا چنانا لمہ نا گد ءِ ہم دا نہارک کپ کپ کریسر۔ داسہ نن تینا کمک تینٹ جت پت کرسا تینے دا کچک آتیان آجو کننگ نا جہد اٹ ولے دافک داسہ ہندن ہڑی مسوسر کہ دافک بندغ و بندغی نا دتر کن بیرہ ملاس تینا دنّان تے جیڑ کریسر۔

انت مشکل اٹ نن تینے اوفتا پلویڑ آن کشسا اُرا غا سر مسن۔ درگہ ءِ ای زو اس تفیٹ ولے اوفتا اسہ غپارہ ئس او تینے درگہ ٹی ہندن خلکرہ کہ داسہ ایسہ درگہ ننا تمے۔

اینو دا کسہ ءِ چل (40) سال آن زیات ءِ…. وخت انا نشانیک کنا مون آ کرنچ آتا دروشم اٹ پاش ءُ۔ کنا خُشک داسہ چاندی نا تار آن پر مسنو۔ زئیفہ کنا بھاز انگا انتظار ڈکھ گڑتی آن ہنانے کُب مسنے ولے ننا مادر پدری آ جوزہ غاک داسہ ہم ورنا ءُ داسہ ہم نن کِن او ہمو ہفت سال نا ننا چنا اصغر ءِ…. اینو مسہ سال مننگ ءِ او ننا خن تیان اودیم کورگم ءِ۔ اونا ہچ ءُ درک اس اف کہ او ہرا میدان مش جبل اٹ نہار آتون جنگ تننگ ءِ او زندہ ہم ارے یا اف….؟

ولے ننے اونا انتظار ہر ساہت کسفنگ ءِ، داسہ ہم ہراتم کچک آتا توار تہو اٹ تالان مریک تو اسہ وار ولدا ننا چل سال مست انا ٹھپ آک خازہ مریرہ۔ اسہ ترند ءُ چیہانٹ اس کنا خف تیا تمسا کناروح ءِ لڑزہ ٹی اتیک، ای اسہ وار ولدا تینا پیری ءِ گیرام کرسا تلوسہ ئی و بے تاغتی ٹی پیشن کن رم کیوہ پیشن ہچ اس خنپرہ تو کنا چنا نا ہمو دروشم کنا خن تا مون آ بریک۔ بے وسی و لاچاری آن کنا وجود تہہ آن ٹکر مریک ہراتم کنا خف تیا اونا ترند آ چیہانٹ تمک…. ابّا…. کنے دا کچک آتیان بچف۔

بلوچستان ٹی کرونا وائرس آن اسے ڈاکٹر اس کذیت کرے ہراڑان پد کہوک آتا کچ 47 مس۔

ڈاکٹر شاہ ولی ڈی ایچ کیو مستونگ ٹی چائلڈ اسپیشلسٹ نا وڑئٹ کاریم تے ایسری تننگ ئس اودے گدرینگوکا توہ کرونا مسس و اونا بی ایم سی آئسولیشن وارڈ ٹی علاج مننگ ئس۔

ڈی جی ہیلتھ بلوچستان ڈاکٹر سلیم ابڑو ہم ڈاکٹر شاہ ولی نا کہنگ ءِ پک کرے۔ تینا بیان ٹی افسوز نا درشانی کریسہ او ڈاکٹر شاہ ولی نا جانجوڑی شعبہ کے کاریم تیا خراج عقیدت تس۔

ڈاکٹر شاہ ولی نا کہنگ آن پد بلوچستان ٹی کرونا وائرس آن کہوکا تا کچ 47 مسونے۔ داسکان 4193 بندغ زیمی مسونو اندن 1471 جانجوڑ مسونو۔

عشق انت ئسے آہ ہُو ئسے
ہو ہو ئسے نہ نُو ئسے

عشقان تباہ بازاک اریر
نہ جنگ  دا  ٹی جُو ئسے

عشقٹ تفوک ہر بندغے
مجنون وڑو دا خُو ئسے

مجبورے کس نے ہکل ئس
تینا مِلی نا پُو ئسے

سررندٹ اینو عشق ئنا
رندیو نوا گیسو ئسے

پاش کے نوا تاثیر تہ
نُم پٹبو پُو پُو ئسے

عشقے خُدا عشقے رسول
کہ خوش تِخر ہر روح  ئسے

اللہ نا عشق انسان اتو
کس منیتو سیاہ رُو ئسے

عشق آل نہ اولاد کن
سمبالے کس بازُو ئسے

عشق مال ئتو دا سیال ئتو
پایان مفے اے کُو ئسے

دا عشق کسے اِلّے تو
چو چو ئسے بابو ئسے

دا عشقے اف ہچو بہا
مرجان نہ لُولُوئسے

عشقے ازل عشقے ابد
غیبیءُ داڑا دُوئسے

کس پُہہ متو عشقے اگہ
نی چاس تہ جاتُو ئسے

دے پائے عشقان پالیپر
دا زند ئنا مازُو ئسے

دا عشق ہنا نا پید مس
پَٹِک امر گُو گُو ئسے

تالان مس دا عشق ئنا
شیداؔ نا دا خوشبوئسے

شاہ بیگ شہدا