صوبہ سندھ خاص کر کراچی ٹی غٹ بندوبست ءُ رکھوک گام گیج آتیان بیدس کرونا وائرس بھلا جیل آ سر مس۔ اولیکو وار جیل آن بھاز آ کیس آک مونی بسونو۔ دا وخت اسکان 40 کیزی تون اوار اوار 3 ڈیوٹی تروکا بندغاک کرونا وائرس نا آماچ مسونو۔

کیزی تا پاننگے کہ اِرا دے مُست اسے کیزی سیٹی کرونا وائرس نا نشانیک خننگار گُڑا ہمو کیزی نا ٹیسٹ کننگا ہراڑان اوٹی دا ناجوڑی پک مس۔ اوکان پد جیل انتظامیہ زوت آن زوت ہمو کیز خانہ نا کیزی تے جتا جتا کریسہ ٹیسٹ آتے تا کرفیر ہراڑان بھازا کیزی تیٹی دا ناجوڑی پک مس۔

داڑتون اوار اوار ہمو کیز خانہ غا ڈیوٹی تروکاتا ہم ٹیسٹ کننگا گڑا اوفتیٹی ہم کرونا وائرس پک مس۔

حوال نا رد ئٹ دا وخت اسکان 40 قیدی تون اوار 3 ڈیوٹی تروکاتیٹی دا ناجوڑی پک مسونے۔ داڑان پد ہفتہ نا دے 400 کیزی تا ٹیسٹ کننگانے ہرافتا رپورٹ ءِ اینو یک شمبے نا دے بروئی ءِ۔

جیل ٹی وائرس نا بننگ آن پد سینئر سپریڈنٹ محمد حسن سہتو تون اوار پین چندی افسر آتا ٹیسٹ کننگانے ہرافتا رپورٹ جوان مسونے۔

بلوچ خوانندہ تیا جلہو

دی بلوچستان پوسٹ سرگپ

وائس فار بلوچ مسنگ پرسنز نا وائس چیئرمین ماما قدیر بلوچ 15مئی آ بلوچ بیگواہ مخلوق نا بابت پن تا پوسکنو لڑ اس شینک کرینے۔

اسہ ٹویٹ اسیٹی او پارے کہ تدوکا 24 گھنٹہ نا نیامٹ بلوچستان نا جتا علاقہ آتیان کم و وَد یانزدہ بندغ دزگیر کریسہ بیگواہ کننگانو۔ او دا زوراکی نا بیگواہی تیٹ پاکستان نا طاغت تخوک ڈھکوک ادارہ انٹر سروسز انٹیلیجنس (آئی آئس آئی) ءِ پِن کرینے۔

ماما قدیر نا شینک کروک لڑ آن گڈ ٹی بی پی جمعہ نا دے اسکان پین یانزدہ بندغ نا زوراکی نا بیگواہی رپورٹ کرے۔ ہراڑا جمعی کچ ہفت دے ئٹ خلیفوک ہد ئسے اسکان 22 بندغ اسکان سر مریک۔

دا زوراکی نا بیگواہی تیٹ پاش آ اسٹی دا تیوہ بندغ آتا عمر ءِ، دا تیوہ غا ورناک خوانندہ ءُ، و داڑان ہم زیات فریشان کروک گڑا دا کہ بے ڈس کننگوک آتیان کم و وَد 3یونیورسٹی ئٹ بیچلر و ایم فل نا خوانندہ ءُ۔

12مئی آ بہاؤالدین ذکریا یونیورسٹی نا خوانندہ ناصر بلوچ و لوامز یونیورسٹی اوتھل نا خوانندہ جہانزیب بلوچ ءِ اوفتا بنماسی ضلع کیچ آن مننگ کروک وڑئٹ قانود نا پاسداری کرفوک ادارہ آک دزگیر کریسہ بے گواہ کریر۔

اسہ دے ئسے آن گڈ علامہ اقبال اوپن یونیورسٹی اسلام آباد ئٹ ایم فل نا خوانندہ ثناء بلوچ ءِ سلاء بند بندغاک سلاء نا زور آ دزگیر کریسہ تینتون دریر۔ اونا خاہوت پاکستانی لشکر ءِ ڈودار پن کرینے۔

ثناء بلوچ نا زوراکی نا بیگواہی اونا سیال و سنگت، بلوچ خوانندہ و بلوچستان نا ادبی مخلوق ئٹ است ہسونی و سوختئی اس ودی کرینے۔ ثناء بلوچ تینا بنماسی علاقہ خاران ئٹ اسہ ادبی تنظیم اس مُستی دننگ ئس۔ ”نصیر کبدانی لبزانکی دیوان“ نا پن ئٹ چاہنگوک ادبی تنظیم بلوچی بولی نا دیمروی و شابیتی کن کاریم کننگ ئس۔

اونا زوراکی نا بیگواہی نا دیگر تون بلوچ خوانندہ غاک است ہسونی و سوختئی ٹی خننگار، ہرافک تینا برانز نا درشانی ءِ راجی حوالکاری نا ویب سائٹ ٹوئٹر آ کننگ ئسر، ہراٹی بلوچ خوانندہ غاتیا ریاستی ادارہ تا پارہ غان کریک ڈاؤن آ نغد کاری مننگ ئس۔

پاکستان ئٹ نن نیمہ اسکان #SaveSanaBaloch نا پن ئٹ ہیش ٹیگ بڑز ٹرینڈ مریسہ کرے۔

تیوی بلوچستان ئٹ بلوچ خوانندہ تا زوراکی تون بیگواہی تیٹ ودکی آ بندغی حق آتا ادارہ غاتا چپی، اوفتا غیر ذمہ داری و اوفتا بے پامی نا درشانی ءِ۔ ہفت دے ئٹی 22بندغ بیگواہ کننگانو، ولے دائسکان ہچو علاقئی یا جہانی تنظیم ئسے نا پارہ غا دا بابت ہیت ارفنگتنے۔

بلوچستان نا دارالحکومت کوئٹہ ٹی سمارٹ لاک ڈاون و دفعہ 144 آن چپ ہننگ آ 81 دکان بند و 27 بندغ دزگیر کننگار۔ داڑان بیدس 72 گاڑی تے چالان کننگا۔ سمنگلی و ایب کیب ٹی دے ئنا ہشری تیٹی 200 باہ ملنگ نا پیکٹ بشخنگا۔

ایدیشنل ڈپٹی کمشنر کوئٹہ (اے ڈی سی) و فوکل پرسن احساس ایمرجنسی کیش پروگرام ثانیہ صافی نا رد ئٹ صوبئی دارالحکومت اسپیشل مجسٹریٹس نا پارہ غان شار نا جتا علاقہ تیٹی سمارٹ لاک ڈاون آن چپ ہننگ آ 81 دکان بند کننگار۔ داڑان بیدس 231 گاڑی چیک پٹنگار ہرافتیٹی 72 گاڑی تے چالان کننگا۔ شار ٹی لاک ڈاون و دفعہ 144 آن چپ ہننگ آن 27 بندغ دزگیر کننگانو۔

او پارے کہ کوئٹہ نا جتا علاقہ تیٹی 24500 ارغ بشخنگار بلکن سمنگلی روڈ و ایب کیب ٹی باہ ملنگ نا 200 پیکٹ  ہشر کروک بندغ تیا بشخنگانو۔

اوفتا پاننگے کہ ریپڈرسپانس ٹیم نا پارہ غان ہفتہ نا دے 1147 بندغ تا اسکریننگ مس ہرافتیٹی 261 نا سیمپلز آک ہلنگار، ضلعی نا بست بندی کوالخوا تا ہڈ تروک پی سی ایس آئی آر سینٹر ٹی کورنٹائن ٹی 7 بندغ ءِ اراغا مون تسر۔

ای و مُرید

نوشت: حفیظ شہزاد

دی بلوچستان پوسٹ

جہان نا رنگ آتون پند خلیسہ دے اس پیرس نا نقشہ دے اس ایران نا سیل سوات، دے اس مصر نا زیباہی دے اس عرب نا ریکاک۔ دے اس افغان نا جنگ دے اس روس نا نزوری، دے اس چین نا دیوال دے اس ہند نہ دِلی۔۔۔

کسہ تون مشغول دے پدے رنگاک کنا تہٹی مین ہلنگ ئسر۔ جاگس ناول اسیتون اختہ حانلی آ داستان تون شہہ کن پراد کننگ

جاگس خلقی رنگاتون سُر ہلنگ۔

تینا ڈے انا رنگاتیان بے سما گام خلنگ ئٹی امریکہ نا بلڈنگ آتا کچ ءُ سوچ۔۔۔۔۔۔۔

تینے گُم گار کریسوٹ کہ کنے ہم اسے خاک اس ارے ہرانا سربُن شام فلسطین عراق سوریہ نہ ظُلم دڑد اتون بناء مریک۔ تینے پُہہ متوٹہ کہ ای ہم ہمو خاک آن ہراٹی لمہ تا کوک پراد آک جہان ئٹ آسڑد نہ وڑ تالان مننگ ئٹی ءُ۔۔۔۔۔۔

تینا ذات ءِ گیرام کریسوٹ کہ ای ہمو پاک آ راج آن تعلق تخیوہ ہرا اسے تاس دیر اکن سد سال وفاداری نا سند ءِ دوہی کرینے۔ تینا بولان تینا آماچ ءِ دُرست کتوٹا کہ ہرا کنا ڈے ئنا تیوہ غا باریم ءِ تینا کوپہ غاتیا بڈ کرینو چریفرہ تا۔

اسہ دے دُن مس کہ بُڑز انگا جوزہ تون مش تا تلار آتا نیام آن بولان نا دیرٹ، چلتن نا دامان اٹ راسکوہ نہ گوران آمون نا مُرغنی ٹی گاؤ کوہ نہ کیرہ غان کنا دوٹی اسے مُرید اس ہلک کنے کُل رنگ آتیان کشا کنے تینا وجودے نشان تس کنے کنا زات ءِ پوہ کرے۔

کنے تینا خاک ئتو وفاداری نا قصہ تے بنفے کنے آماچ نہ سپاہی تہ پارے کنے راسکوہ نا دڑداتے نشان ترسہ

کنا خنتے تفے ولدا  ملا۔۔۔۔۔۔

پنی آ شاعر و ادیب شاہین بارانزئی نا کتاب ’نرومب نا شکار‘ براہوئی اکیڈمی نا پارہ غان شینک مسونے ہراٹی متل، وسائت، چاچا و بجازی تا سرحال آ پٹ و پول کننگانے۔

شاہین بارانزئی براہوئی ادب نا بابت گچین ءُ پن اس تخک۔ اونا نوشت آک جتا جاگہ غاتیا شینک مریسہ کرینو ہرافتیٹ کتاب آتیا چمشانک شاغیسہ نغد کاری نا نوشت آک زیات پامداری دوئی کرینو۔ داڑان بیدس شاہین بارانزئی نا شاعری تینا جتاو رنگ اسیتون ہند دوئی کرینے۔

’نرومب نا شکار‘ نا شینک مننگ آ مخلوق خوشی نا درشانی کرینے و کتاب ءِ براہوئی بولی نا مڈی اٹ ودکی اس گوندنگ ءُ۔

بلوچستان نا علاقہ اوستہ محمد ٹی علی آباد روڈ آ دکان اسیٹی سُم کاری نا سوب آن مسہ بندغ ٹپی مسونو۔

گیشتر حوال تا رد ئٹ اوستہ محمد، مچی پل نا رہی آ گنڈیری نا دکان آ نا درست بندغ تا سمُ کاری آن مُسہ بندغ ٹپی مسونو۔

حوال تا رد ئٹ سم کاری قبائلی بدی داری نا سوب آن کننگانے۔ ہڑتوما کنڈ نا بندغ آک اسہ قبلہ ئسے آن ءُ و اوفتا جیڑہ زمین تا زی ئٹی ءِ۔

 سُم کاری نا سوب آن غلام شبیر، چھٹا خان و پسند رند بھاز ٹپی مسونو۔ ٹپی تے سیول ہسپتال اوستا محمد سرکننگا ہراڑے اوفتے دارو درمان کننگا۔

اسہ ٹپی آ غلام شبیر رند نا حالیت بد ءِ۔ اودے لاڑکانہ کن رادہ کننگا۔ ٹپیک گوٹھ باری شاخ نا ءُ۔ سم کاری نا ڈودار آک نرینگ ٹی سرسوب مسر، و مستی کاروائی شاری پولیس کننگ ئٹی ءِ۔

تدوکا بیست و چار گھنٹہ ٹی خلیجی ملک آتیٹ کورونا وائرس نا پوسکنو 5992 کیس پاش مسونو، زیمی تا کچ 118610 ءِ، دافتان 441 نا حالیت بد ءِ۔ وائرس آن کہوکا تا جمعی کچ 621 ءِ سرمسونے، کورونا وائرس نا 36311 ناجوڑ دراخ مسونو۔

الامارات الیوم نا پاننگے امارات ٹی جمعہ آ پوسکن پک مروکا 698 کیس ریکارڈ آ بسونو، زیمی تا کچ 21084 مسونے، دافتان 6930 دراخ مسونے اندن 208 وائرس آن کسکنو۔ اسیٹ نا حالیت بد ءِ۔

سکائی نیوز نا رد ئٹ قطر نا وزارت جانجوڑی پارے کہ ملک ٹی بیست و چار گھنٹہ ٹی کورونا نا پوسکنو 1733 کیس ریکارڈ آ بسونو۔

عمانی وزارت جانجوڑی پارے کہ 322 پوسکنو ناجوڑ رپورٹ مسونے جمعی کچ 4341 مسونے۔ کویتی وزارت جانجوڑی پڑو کرینے کہ کورونا آن 188 بندغ دراخ مسونو اوکان گُڈ دراخ مروکا تا کچ 3451 مسونے۔

سوڈانی وزارت جانجوڑی پارے کہ کورونا نا 157 پوسکنو ناجوڑ ریکارڈ آ بسونو۔ 10 وائرس آن کسکنو، زیمی تا جمعی کچ 1818 مسونے اندن کہوکا تا جمعی کچ 90 آ سرمسونے و جوڑ مروکا بندغ آتا کچ 198 مسونے۔-

فلسطینی وزارت خارجہ پارینے کہ جمعہ آ 79 بندغ وائرس آن کسکنو۔ جہان نا ایلوم ملک آتیٹ 682 فلسطینی جوڑ مسونو و زیمی تا کچ 1462 مسونے۔

مراکش نا وزارت جانجوڑی پارے کہ تدوکا 24 گھنٹہ ٹی 95 پوسکنو کیس رپورٹ مسونے، زیمی تا کچ 6607 مسونے۔ مصری وزارت جانجوڑی پارے کہ ملک ئٹ کورونا وائرس آن مُچ زیمی تا کچ 10829 و کہوکا تا کچ 571 مسونے۔

اندن اردن ٹی کورونا نا چار پوسکنو ناجوڑ ریکارڈ آ بسونو و جمعی کچ 587 مسونے۔

الجزائر نا وزارت جانجوڑی 189 پوسکنو کیس و7 بندغ نا کہنگ نا پڑو ءِ کرینے۔ لبنانی وزارت جانجوڑی پارے کہ کورونا آن 8 پوسکنو بندغ زیمی مسونو، زیمی مروکا تا جمعی کچ 886 مسونے۔

پاکستانی فورس کیچ ٹی آپریشن نا وختا اُرا اُرا ءِ پٹنگ آن گُڈ چار بندغ دزگیر کریر و نا درست ہند ئسے آ درے۔

ہندی حوالکار آتا رد ئٹ بلوچستان نا ضلع کیچ ٹی پاکستانی فورسز و ڈھکوک ادارہ آک اسہ اوار آپریشن اسیٹی دشت نا علاقہ بلنگور آن چار بندغ ءِ دزگیر کریر و نا درست ہند ئسے آ دریر۔

بیگواہ مروکا بندغ آتا چاہنداری زین شرف شاد نا مار، واہگ‘ واحد بلوچ نا مار، وسیم ابراہیم نا مار و بیبگر داد کریم نا مار نا پن ئٹ مسونے۔

پین حوال ئسے نا رِد اٹ ایلو کنڈان ہفت تو مُست فورس نا دو آن بیگواہ مروکا بی آر پی نا مالو نا راہشون شیر محمد بلوچ نا مار کراچی آن یلہ مس۔

مصدق بلوچ نا خاہوت دی بلوچستان پوسٹ ءِ مصدق بلوچ نا یلہ مننگ ءِ پک کریسہ پارے کہ او دراخی تون اُرا ءِ سرمسونے۔

یاتی مرے کہ مصدق شیر محمد بلوچ نا مار تدوکا سال ستمبر آ پاکستانی فورسز و ڈھکوک ادارہ تا دو آن بیگواہ مسوسس ۔

ہرنائی و ایب کیب ئٹ پِر، جل تیٹ دیر نا ترندی و ہرنائی پنجاب کسر اِن و ر کن بند

ہرنائی و ایب کیب ئٹ مدان و اندن مَشی علاقہ تیٹ ہورہ گروک تون ترند پِر آن جل تیٹ دیر نا فراوانی آن ہرنائی پنجاب نا بھلا کسر اِن و بر کن منہ گھنٹہ اکن بند مس۔ پِر آن باسنی شیف تما و مُد چَس کرے۔

درو ہم دارالحکومت کوئٹہ تون اوار بلوچستان نا جتا علاقہ تیٹ پر کرے ہرانا سوب آن باسنی نا ترندی ایسر مس۔ واہم برجا پِر نا سوب آن کوئٹہ شار نا جتا روڈ آک جل تا دروشم نشان تسر۔

چار شمبے نا دے آ کوئٹہ، پشین، مستونگ، قلعہ عبداللہ و ایلو علاقہ تیٹ پِر کرے۔ پر نا سوب آن باسنی نا زور پنا ہراڑان روچئیک گل و بال مسر۔

پِر نا وختا شار نا مارکیٹ آتیٹ ہل و تس منہ ساعت کن نزور مس واہم دوارہ عئید کن گڑا ہلوکاتا مُچی زیات مریسہ کرے و مخلوق یخ آ مُد اٹ ہم تینکن گڑا ہلک۔

افغانستان نا شار گردیز ٹی اسہ فوجی عدالت ئسے نا پیشن کار بمب دھماکہ اسیٹی پنچ بندغ کسکنو۔ جلہو نا ذمہ واری ءِ طالبان ارفے۔

افغانستان نا وزیر خارجہ نا ترجمان طارق آریان پارے کہ جمعہ غا مروکا گاڑی نا بمب جلہو گردیز شار نا فوجی عدالت نا پیشن آ مسونے ہرا اسہ زیات آبات ءُ علاقہ ئسے۔ او خلیس نا درشانی کرے کہ درزان آ بندغ آک ٹپی و مرگ نا گواچی مننگ کریرا ۔

برطانوی حوال رسیفوک ادارہ ‘رائٹرز’ نا پاننگے طارق آریان جلہو نا تُہمت ءِ حقانی نیٹ ورک آ خلکونے ہرانا ہل و تس طالبان تو بغاوت کروک ٹولی تون ہم ارے، پاکستان ٹی نت دو خلوک تنظیم لشکر طیبہ تون دانا حال حوال ارے۔ دا ٹولی بھاز کم جلہو تا ذمہ واری ءِ ارفک۔

ایڑے طالبان نا ترجمان ذبیح اللہ مجاہد تینا اسے بیان اسیٹی جلہو نا ذمہ واری ارفینے۔ اوفک پاریر دا جلہو ءِ صدر اشرف غنی نا پارہ غان فوج ءِ طالبان تیا جلہو نا حکم تننگ نا بدل اٹ کرینو۔

طالبان ترجمان دعویٰ کننگا کہ جلہو ٹی سلاء بند فورس نا بھلو کچ اسیٹ کارندہ آک کسکنو و ٹپی مونو ۔

افغانستان نا صوبہ پکتیا نا فوجی ترجمان امل خان مومند نا پاننگے دا جلہو اسہ ٹرک ئسے نا کمک ئٹ کننگا ہرا بارود آن پُر ئس۔ اوفک پنچ بندغ نا کہنگ ءِ پک کریسہ پاریر کہ جلہو ٹی 14 بندغ ٹپی ہم مسونو۔

یاتی مرے کہ بیرہ ہرا دے مُست کابل و ننگر ہار ٹی اِرا جلہو کننگاسس ہرافتیٹ 50 آن زیات بندغ کسکر۔

سہہ شمبے آ کابل نا اسہ اسپتال اسیٹ سلاء بند بندغ اسینا جلہو ٹی 24 بندغ کسکر ۔ کہوک آتیٹ لمہ و پوسکودی مروک ءُ چُنا ہم اوار ئسر، اندا دے ننگرہار ٹی ہم اسہ جنازہ ئسے آ وتکش جلہو سیٹی 32 بندغ خلینگاسر۔

دا جلہو نا ذمہ واری ءِ داعش قبول کریسس۔ ​اوکان گُڈ افغانستان نا صدر اشرف غنی جلہو تا مذمت کریسہ پارے فوج ءِ حکم تننگانے کہ اوفک رکھ نا جنگ ئنا جاگہ غا طالبان و ایلو دہشت گرد ٹولی تیا جلہو کیر، کہ لس مخلوق نا ہند آتے رکھنگ کیر۔