چیف جسٹس بلوچستان ہائی کورٹ تیوہ ڈسٹرکٹ جج آتے سول و کریمنل کیس تے 19 مئی اسکان پد بٹینگ نا پنت تسونے.
چیف جسٹس بلوچستان ہائیکورٹ حکم تریسہ پنت تسونے کہ سول و کریمنل نوعیت نا کیس تے 6 مئی آن 19 مئی اسکان پد شاغر، جج آک بیرہ الّمی خواست و مقدمہ غاتے بننگ کیر۔
چیف جسٹس جمال خان مندوخیل پنت تس کہ تیوہ ڈسٹرکٹ و سیشن جج آک اندن وڑ و ڈَول اس ٹہیفر کہ کم آن کم افسر و کارندہ غاک ساڑی مننگ کیر۔
او فیملی جج آتے ہم پنت تسونے کہ خاہوتی نوعیت نا مقدم و میٹنگ آف مائنرز ءِ 19 مئی 2020 اسکان پد شاغیر۔
بلوچستان نیشنل پارٹی نا سرکماش سردار اختر مینگل بلوچ صحافی ساجد حسین نا خون انا سخت مذمت کریسہ پارے کہ ای ساجد حسین نا خون انا سخت لوز آتیٹی مذمت ءِ کیوہ۔
بی این پی نا سرکماش پارے ساجد حسین اسہ دلیر و گچینو صحافی اس ئس۔
او سویڈن حکومت آن خواست کرے کہ او ساجد حسین نا خون نا کیس انا پٹ و پول ءِ کیر۔
یات مرے کہ بلوچستان نا پنی آ صحافی ساجد حسین مارچ انا دو تاریخ ءِ سویڈن نا شار اپسالا آن بے گواہ مسس ہراڑان پد اونا جون ءِ دریا غان پولیس خنا۔
صدر ڈونلڈ ٹرمپ امیت تسونے کہ برجاہ سال نا ایسری اسکان امریکا کورونا وائرس نا مون تس کن ویکسین جوڑ کرو۔
امریکی نشریاتی ادارہ فوکس نیوز آ انٹرویو ٹی صدر ڈونلڈ ٹرمپ پارینے کہ امریکا دا سال نا ایسر مننگ اسکان کورونا وائرس نا مون تس کن ویکسین جوڑ کرو۔
صدر ٹرمپ نا دا پننگ ہمو وختا مونا بسونے کہ منہ وخت مالو ءُ تینٹ ویکسین نا جوڑ کننگ کن فنڈ آتا کمبوتی آ خلیس نا درشانی کریسس۔
صدر ڈو نلڈ ٹرمپ دا ہیت ءِ ہم پاش کرینے کہ اسہ گمان ئسے نا رد ئٹ کورونا وائرس دین ٹی اسہ لکھ آن بھاز امریکی تا مرگ مرو۔ داکا مُست امریکی صدر دا رِد ئٹ پاریسس کہ دا تباہی بش کروک وائرس آن امریکا ٹی 60 ہزار آن زیات بندغ آتا مرگ مننگ کیک ۔
امریکی صدر کورونا وائرس نا تالانی نا تومت ءِ اسیکہ وا چین آ خلیسا پارے کہ کورونا وائرس نا مُچ جہان ئٹ تالان مننگ و دانا سوب آن جہانی زرگزران نا بُھس مننگ نا ذمہ وار چین ءِ۔ داڑان مُست صدر ٹرمپ دا ہم پارے کہ چین اودے گچین کاری ٹی پد بٹنگ کن کورونا وائرس ءِ تالان کرے ۔
یاتی مرے کہ کورونا وائرس دین آن تیوہ غاتیان زیات زیمی مروکا ملک امریکا ءِ ہراڑے تباہی بش کروک وائرس آن کہوکا تا جمعی کچ 70 ہزار آن خڑک سرمسونے، اندن سوا لکھ آن زیات امریکی دا وائرس آن زیمی مسونو ۔
لیویز نا پاننگے ایران آن پاکستانی تا بننگ نا لڑ برجاہ ءِ، تدوکا دے پین 14 زائرین تفتان بارڈر آ سرمسر۔ پاکستانی تے پاسپورٹ گیٹ آ اسکریننگ آن گُڈ قرنطینہ کننگا۔
محکمہ جانجوڑی نا پاننگے ایران آن دائسکان پاکستانی تا بننگ نا لڑ برجاہ ءِ۔ کرونا وائرس نا سوب آن بلوچستان آ سر مروکا تیوہ بندغ آتے 14 دے کورنٹائن کننگ تون اوار دافتا ٹیسٹ ہم تفتان بارڈر آ مریسہ ءِ۔
چار شمبے نا دے جتا صوبہ آتا زائرین تے اوفتا صوبہ غاتیا رادہ کرور، ایلو صوبہ آتا زائرین تے اسکریننگ و ایلو جانجوڑی چیک اپ آن گُڈ اوفتا صوبہ آتا قرنطینہ سینٹر تیا رادہ کننگگ۔
محکمہ جانجوڑی نا پاننگے ہڑدے ایران آن بروکا زائرین تا سیمپل ہلیسہ اوفتا کرونا ٹیسٹ کننگگ۔
براہوئی زبان نا پُر فکرا شاعر”ظہورصدیقی” نا شئر آتیا تالان اولیکو کتاب “پِر آن پد” آماچ ادبی دیوان مستونگ نا پارہ غان شینک مس۔
کتاب نا پد پنہ غا پنی آ شاعر و ادیب سید غریب شاہ انجم تینا خیال آتا درشانی ءِ ’’سوگوْ آ ہمت آتا علامت‘‘ نا سرحال تون کریسہ پائک ’’توبے آمبار روشنائی، استار پنی ءُ لوز منہ، مہر نا حرف آتے کل ءِ دے ٹکی و دیکی بلینگ نا ساعت آتا پُدینی و حساس تبی ءِ۔ جل تیٹی مدام دیر تا روانی ءِ، خل تا کشادہ غا سینہ غاتیان تِرک کروکا گواڑخ آتا سوگوْ آ ہمت ءِ، نل تیان پیش تموکا زیمل آتے، تل مروکا اُست ئنا لکیراتے و پل مروکا ڈغار نا لیک آتے نن لکھن، تُولن سوچن تو محترم خلیفہ قادر بخش ابابکی نا پُر ہمت، پُرمہر و پُر جوزہ غا مڷ ’’ظہور صدیقی‘‘ نا ہشست پہلو آ شخصیت و ادبی دروشم ننا مونا بریک۔
او مستی پائک کہ مسہ مارچ 1975 نا دے خلق شیریں آپ مستونگ نا گلزمین آ ودی مروکا ظہور صدیقی 1989 ٹی ادبی پڑ آ تینا اولیکو گام ءِ تخسا درستی راستی مریک، حاجی محمد حسن غمخوار، حاجی شاہ بیگ شہدا و استاد رحیم ناز استا پُدین آ ادبی سیخا، حمید عزیزی آبادی، فیض بولانی، ملک فیاض علی بلوچ، بشیر احمد شاد و احسان وسیم و راقم استا پُرمہر آ سنگتی و ہمکوپئی ٹی سال 1992 نا دے ئس فتح محمد شاد و اوکان پد استاد صابر ندیم استا شاگردی نا شرف ءِ دوئی کیک۔
غریب شاہ انجم مُستی ظہور صدیقی نا بابت نوشتہ کیک کہ ادب نا پڑا شاعری آن بیدس کالم نویسی نا بشخ ٹی ہم اسہ بھلو پن اس کٹسا شعر پاننگ (گلوکاری) نا میدان ٹی ہم تینا لائخی تے درشان کیک، دو ئنا پوریا کرسا زند ئنا سختی سوری تے سگسہ اسہ دے ئس متحدہ عرب امارات نا کسر ءِ ہلیک کہ زندہ نا ویل آتیان آسراتی دو برے۔
او پائک کہ ظہور صدیقی اینو پگہ تینا ادبی تنظیم گوشہ ءِ براہوئی نا بنجائی کماشی تون تینا بولی نا شونداری و شینکاری نا فرض آتے ایسری تننگ ٹی ءِ۔ ظہور صدیقی تدوکا دور باری نا اسہ پُر ءُ کتاب ئسے، اونا شاعری راج ٹی زند ئنا آدینک ءِ، دا آدینک ءِ پِر ئنا پڑیک وختس اندن سفا کیرہ کہ پر آن پد دا راج آدینک ٹی تینا بد رنگ آ دروشم ءِ خننگ تون مون ءِ ہڑسک۔
بلوچستان ادبی فورم کتاب نا شینکاری آ امیت و استخواہی نا درشانی کریسہ ظہور صدیقی تون اوار آماچ ادبی دیوان ءِ مبارک بادی تسونے و پارینے کہ ظہورصدیقی و آماچ ادبی دیوان راجی زبان وادب نا شونداری و شرحالی کن تینا تخلیقی، علمی، ادبی جُہد ءِ ہندا ڈول خواری و خلوص تون برجا تخور۔
ایرانی پارلیمان ہمو مسودہ قانود ءِ منظور کرینے ہرانا رد ئٹ ملکی زر نا قدر آن ’چار صفر‘ ایسری تننگو۔ داڑان بیدس ریال نا جاگہ غا تومان ءِ ملکی زر جوڑ کننگو ءِ، ہرا 10 ہزار ریال نا کچ مریک۔
ایران نا سرکاری میڈیا دو شمبے چار مئی آ پارے کہ ملکی پارلیمان دا قانود ءِ ٹہیفنگ نا رد ئٹ تہران حکومت ءِ دا موکل تسونے کہ او ایرانی ریال ءِ سختی تا سوب آن ملک ئٹ زر ئنا بابت اصلاحات مونا ہتنگ کے۔
ایرانی ریال نا ویل آک تدوکا منہ تو آن ترند مسونو و دانا سوب آک بھازی ایران آ خلوک امریکی پابندیک ءُ
پوسکنا قانود سازی نا رِد ئٹ دا وخت ملکی زر ریال نا قدر آن ‘چار صفر‘ ایسر کننگو۔ داڑان بیدس ریال نا جاگہ آ تومان ءِ پوسکنا ایرانی زر کننگو۔
دہسکان 10 ہزار ریال اسہ تومان نا کچ مسرہ۔ دا قدر آتیان ‘چار صفر‘ ایسر کننگ آن گُڈ اسہ ریال اسہ تومان نا کچ مرو و اندا تومان ایران نا قومی زر مرو۔
پارلیمان نا کنڈان موکل آن گُڈ دا قانودی مسودہ نا بھلا دینی بندغ آتا ادارہ نا پارہ غان موکل دائسکان سلوک ءِ، ہرانا کنڈان امنائی ایران ٹی امرو ہم پوسکنو قانود اس ٹہیفنگ آن مست الّمی مریک۔
ایرانی حوال تروکا ادارہ اِسنا پارے ” پارلیمان نا باسک آک دا بابت ئٹ بل نا موکلی تسونو کہ راجی زر نا قدر آتیان چار صفر ایسری کیر۔‘‘
سرکاری ٹیلی وژن نا کنڈان پارینو ”ایران مرکزی بینک تون داسا اِرا سال نا وخت مرو، ہرانا نیامٹ اودے ملکی زر ریال ءِ عملی وڑ ئٹ تومان ٹی بدلی کروئی تمو۔‘‘
ایرانی ریال نا قدر آن چار صفر ایسر کننگ نا صلہ غا سال دو ہزار ہشت آن ہیت مننگ ئس، ولے اِرا سال مست دو ہزار ہژدہ ٹی دا خواست ہمو وخت آن بھاز مسوسس، ہرا وخت امریکی صدر ٹرمپ تہران تون دو ہزار پانزدہ ٹی مروک جوہری معادہ آن واشنگٹن نا تینا پارہ غان دو خلاسی نا پڑو کریسس۔
نیشنل پارٹی نا صوبائی ترجمان صحافت نا آجوئی نا دے آ شینک کروک بیان ٹی پارے کہ صحافت نا آجوئی چاگرد اسیکن شعوری دیمروی نا پامدار مریک و جمعی چاگرد نا ویل، سختی و گچینی نا عکس مریک۔ بد بختی ئٹ پاکستان ٹی آجوئی صحافت نا یکو مون ءِ توننگانے۔
بیان ٹی پاننگانے کہ ساڑی حکومت میڈیا نا لخ ءِ خلنگ نا پاش کوشست ءِ کرینے۔ جنگ و جیو گروپ نا ایڈیٹر انچیف میر شکیل الرحمٰن نا بے سَوب دزگیری حق و راست نا توار ءِ توننگ نا برجاہ لڑ ءِ۔
ترجمان نا پاننگے کہ نیشنل پارٹی ملک ئٹ آجوئی صحافت نا بیرک ءِ ارفوک ءِ۔ ملک و خطہ دہشت گردی و انتہا پسندی نا بد آ حالیت ئٹ مسونو۔ ولے داڑان بیدس ہم صحافت تون تفوک مخلوق سخت انگا حالیت ئٹ تینا ذمہ واری تے پوروی تون ایسری تسونو۔ سد آ صحافیک شہید ہم مسونو۔
بیان ٹی پاننگانے کہ ساڑی حکومت آجو میڈیا ءِ زورٹ توننگ نا پالیسی ءِ مونی دننگے۔ تینا است خواہی تون میڈیا ءِ بشخنگ نا لڑ ءِ سلیکٹڈ حکومت برجاہ تخانے۔ ایلو کنڈان اخباری صنعت تو تفوک بندغ آک معاشی سختی تا گواچی ءُ ولے حکومت اخبار آتون بے انصافی کننگے۔
بیان ٹی پاننگانے کہ نیشنل پارٹی آجوئی صحافت آ یخین تخک و آجوئی صحافت نا کوشست ئٹ صحافی مخلوق تون اوار ءِ۔ نیشنل پارٹی میر شکیل الرحمٰن نا دزگیری نا ہر تلہ آ مذمت کریسہ کرو۔
بلوچستان محکمہ جانجوڑ دا ہیت ءِ پاش کرینے کہ بلوچستان ٹی 78 فیصد زیمی ناجور آتیٹ کورونا وائرس نا ہچو علامت اس خننگتنے۔
محکمہ جانجوڑی نا پاننگ نا رِد ئٹ بلوچستان اٹ دائسکان کورونا وائرس نا ناجوڑ آتیان 78 فیصد ئٹ کورونا نا علامت آک نہ مننگ نا کچ ئٹی پاش مسونو اندا خاتر اسُل کم علامت آک پاش مننگ آ ناجوڑ نا کرونا آن زیمی مننگ نا گمان مننگ کپک۔
محکمہ جانجوڑی نا پاننگے کہ بلوچستان ٹی دائسکان وائرس آن زیمی مروکا ناجوڑ آتا بھلو کچ ئسے نا عمر 30 آن 44 سال عمر نا نیامٹی ءِ، اوفتا تناسب جمعی ناجوڑ آتیان 33.2 فیصد ءِ، 15 آن 29 سال نا ناجوڑ آتا تناسب 26.62 فیصد ءِ۔
محکمہ جانجوڑی نا رد ئٹ بلوچستان ئٹ دائسکان کورونا 60 آن زیات سال نا بندغ آتیا بھاز ترندی تون جلہو کرینے، داڑان بیدس بلوچستان ئٹ 80 فیصد نرینہ، اندن 20 فیصد نیاڑی کورونا نا گواچی مسونو۔
باہوٹ ہلوک آتا زند ئنا جیڑہ – ٹی بی پی تیدری
ساجد حسین پاکستان آن ساہ ءِ بچفسہ نرنگ آن گڈ 2019 ئٹ سویڈن اٹ سیاسی باہوٹ ہلنگ نا خواست کریسس، 2 مارچ 2020 آن بیگواہ ئس۔ او گڈیکو وار سویڈن نا دارالحکومت اسٹاک ہوم نا جہاندمی پارہ غا 56 کلو میٹر مُر نا شار اپسالا نا پارہ غا اسہ ٹرین اسیٹی تولوک خننگاسس۔
یکم مئی آ اسہ ہندی پولیس ترجمان جوناس ارونن میڈیا ءِ ساجد حسین نا بے گواہی نا بابت پوسکنو معلومداری تریسہ پارے کہ ”اونا جون 23 اپریل آ اپسالا نا خڑک فائریس ڈور آن خننگانے۔“
ساجد حسین اسہ سوگوْ ءُ بلوچ صحافی اس ئس، اونا بے گواہی نا حوال باز زوت ہر پارہ غا تالان مسوسس، و تیوی ہندی و جہانی میڈیا اونا بے گواہی ءِ رپورٹ کریسس۔ واہم پاکستان نا دفتر خارجہ ساجد حسین نا بے گواہی و دوارہ جوْن نا خننگ آ پورہ جوڑ تے موخوک مس۔
اس دُنو صحافی ئسے نا بے گواہی و مرگ آ پاکستان نا پورہ بے پامی، ہرا پاکستان نا گچین جریدہ غاتیٹ ہم کاریم کروک گچین صحافی اس ئس، صحافتی مخلوق و پین ملک آتیٹ باہوٹ نا خواستگار سیاسی باسک آتیٹ شک ءِ زیات کننگ نا سوب جوڑ مسونے۔
سویڈش پولیس تینا اسہ زوت بیان اسیٹی پارینے کہ ”آٹوپسی رپورٹ اسہ ڈو اسیٹی اوار مننگ نا شک ءِ کم کیک ولے دائسکان پولیس پٹ و پول ءِ ایسر مروئی ءِ۔“
بدل اٹ صحافی تا جہانی گَل ”رپورٹرز ود آؤٹ بارڈرز“ نا صدر ایرک ہاکئیر پارینے کہ ”ہراتم اس اسہ ڈو اسینا مننگ ءِ تیوی چپ کننگپک ہمو وخت اسکان دا ہیت ئنا خلیس ارے کہ ساجد حسین نا مرگ اونا صحافتی کاریم و اونا دی بلوچستان ٹائمز نا سرکماش مننگ تون تفوک ءِ“
ساجد حسین بلوچستان ئٹ بندغی حق آتا لتاڑنگ، نشہ نا سوداگری و بلوچساتن ئٹ برجاء فوجی آپریشن آتیا نوشتہ کریکہ، ہرانا سوب آن او مالو آن پاکستان نا ڈھکوک ایجنسی تا خن تیٹ بسوسس و‘ او ویل آتا گواچی مسوسس۔ اونا اُراغا چھاپہ لگاسس و اونا کاریم نا لیپ ٹاپ ءِ رکھوک ادارہ آک ارفیسر دریسر۔ ایسری ات تینا کاریم، خاہوت و وطن ءِ یلہ کریسہ بے وطنی زند گدریفنگ آ بیوس مسوسس۔
ساجد حسین نا مرگ ہمو تیوی باہوٹ خواہوک آتیکن اسہ بیم نا گواچی کروک کلہو ئسے، ہرا ساہ ءِ بچفنگ کن تینا وطن ءِ یلہ کریسہ پین وطن تیٹ باہوٹ پٹنگ ءُ۔ داسہ ہرا زند و خلیس ءِ اوفک یلہ کرینو بسونو، او ایلو ملک آتیٹ ہم اوفتا پد گیری ءِ کریسہ سر مننگو۔
اسہ پین بلوچ صحافی ملک سراج اکبر، ہرا تینا زند ءِ مروک خلیس نا سوب بلوچستان ءِ یلہ کریسہ امریکہ ئٹ باہوٹ ہلوک ہندی ءِ، تینا اسہ نوشت اسیٹی نوشتہ کیک کہ ”دنکہ اسہ وار نیویارک ٹائمز نوشتہ کریسس کہ پاکستان نا سفارتی مشن ”کمیونٹی آؤٹ ریچ“ نا پن اٹ امریکہ تون اوار تیوی جہان ئٹ برجائی تون پیشن ملک آبات ڈائسپورا نا جاسوسی کیک۔“
اسہ باہوٹ ہلوک اس مننگ نا سوب او تینا بیم ئنا درشانی کریسہ پارے ”اگہ جمال خشوگی و ساجد حسین ءِ تینا وطن آن مر بے ڈس کریسہ دوارہ خلنگک، گڑا ہچو باہوٹ ہلوک اس دا است خوشی اٹ مف کہ اوفتے اسکان سر مریسہ اوفتے خلنگپرو۔“
ہمو ملک آک ہرا، دا جنگ زدہ مخلوق ءِ تینا رہی آ باہوٹ ایترہ، ہرافک تینا وطن ءِ اسہ رکھوک زند اس گدریفنگ کن یلہ کریر، ہمو ملک آک بائدے یخینی کیر کہ او باہوٹ ہلوک آتا رکھ ءِ پک کننگ کیر۔ اوفک اندنو حکمت عملی ٹہیفر کہ ہرا زوراک حکومت یا ملک آتیان اوفک ساہ ءِ بچفسہ بسونو، اوفک داڑے اوفتے اسکان سر مننگ کپس۔
بلوچ آجوئی دوست و بلوچستان لبریشن فرنٹ نا راہشون ڈاکٹر اللہ نذر بلوچ پارینے ساجد حسین بلوچ نا مرگ بلوچ قوم و صحافت کن بھاز بلو نسخان ئسے۔
راجی حوالکاری نا ویب سائیٹ ٹوئیٹر آ بلوچ وطن دوست راہشون پارے کہ ساجد حسین نا مرگ بلوچ قوم و صحافت کِن بھاز بلو نسخان ئسے۔ سویڈن نا کوالخواک اونا اِرا تو بیگواہی نا پدانا ساڑی کُل حال حوال تہ پٹیر ہرا اونا بے وخت آ مرگ نا سوب جوڑ مسر۔ بائدے پٹ و پول ٹی پرویز مشرف نا لوز آتے ہم اوار کریسہ تجزیہ کننگے۔
یاتی مرے کہ ڈاکٹر اللہ نذر بلوچ تینا ٹیوٹ ٹی تدوک پاکستانی ڈکٹیٹر جنرل مشرف نا اسہ ویڈیو ئس ہم شیئر کرے ہراٹی اودے پاننگ آ خننگ مریک کہ پاکستان آن پیشن ہم نن کس ءِ خلنگ کینہ و دا ننا پالیسی ءِ۔
