بلوچستان نا علاقہ اوستہ محمد و چاغی ٹی جتا ویل آتیٹ اسہ چنکو چناس مرگ نا گواچی و 15بندغ ٹپی مسونو۔
حوال تا رد ئٹ اوستہ محمد ٹی مست ئنا دژمنی نا سوب آن رند بلیدی قبائلی نا نیام ئٹ جنگ مس، سم کاری آن 5 بندغ ٹپی مسر۔
پولیس سہی وخت آ کارروائی کریسہ ٹپی آتے تینا دوٹی الیسہ اسپتال آ سر کرے، رند برادری نا سوختہ ورناک سٹی پولیس تھانہ نا مونا ہڑاند جوڑ مریسہ ٹریفک نا ہن و بر ءِ بند کریسہ برانز کریر و پولیس بند و بست نا بر خلاف بھاز نعرہ خلکر۔
سوختہ بندغ آک سی آئی اے انچارج منظور بحالی و پالیس کارندہ آتیا جہلو کریر بے دادی کریسہ اسہ پولیس کارندہ نا وردی ءِ ارار پولیس کارندہ آک بھاز سختی ئٹ سی آئی اے انچارج و کارندہ آتے سوختہ بندغ آتیان بچفیر۔
اندن پین حوال ئسے تا رد ئٹ تحصیل چاغی ٹی موٹر سائیکل نا ڈک خلینگ آ چنکو چناس مرگ نا گواچی مسونے، ہسپتال آن رسینگوک حوال تا رد ئٹ چاغی بشری روڈ آ تروند انوک موٹر سائیکل سوار انگا نا ڈک خلینگ آن چنکا چناس بھاز ٹپی مسوسس ہسپتال آ دننگ آ ولے ٹپی حالیت ئٹ ساہ تس۔