جنگ زدہ غا بلوچستان ئٹ پوسکنا سال نا بنا – ٹی بی پی سرگپ
بلوچستان ئٹ توہ و سال آک گدرینگرہ، واہم گواچن حالیت آتیٹ جُوانی بننگ نا جاگہ غا بھلا ویل آتیٹ ہڑدے ودکی مننگ ءِ۔ اِرا ہزار بیست و پنچ نا سال زوراکی نا بیگواہی و ریاستی تادی تیٹ ودکی مسنے و سیاسی جہدکار آتیا رکھ گیشتر ودانے۔ پیپلز پارٹی نا اقتدار ئٹ حکومت، بلوچ سیاسی راہشون تا دزگیری و بندی کننگ کن ٹھوس قانودی جواز مونا ہتنگ ئٹ بے سہبی آن پد ہم بلوچستان نا عدالت آک سیاسی راہشون تے آجو کننگ افس۔
خوانندہ، سیاسی جہدکار و بلوچ جہد ئتون تفوک بندغ آتا سیال آتے زوراکی ئٹ بیگواہ کننگ نا عمل برجاء ءِ و داسہ بلوچستان ئٹ زالبول آتا زوراکی نا بیگواہی تا رجحان ودانے۔ اِرا ہزار بیست و پنچ ئٹ دہ آن زیات زالبول زوراکی ئٹ بیگواہی نا گواچی کننگار و ہشت زالبول دائسکان زوراکی ئٹ بیگواہ ءُ۔ بلوچستان ئٹ ریاستی رٹ شاری علاقہ و کنٹونمنٹ آتے اسکان مسنے و حکومت بلوچستان ئٹ تینا رٹ ءِ بحال کننگ نا پِن آ ریاستی تادی ٹی ترندی ہتنگ ءِ، ہرانا گواچی بلوچ زالبول آک مننگ ءُ۔
اِرا ہزار بیست و پنچ ئٹ ہراڑے بلوچستان سیاسی ویل آتا گواچی مسنے، ہموڑے سرکاری کچ و حساب نا ردئٹ شاری، پولیس و فرنٹئر فورس تون اوار سکیورٹی فورسز آتیا جلہو آتیٹ ریکارڈ ودکی مسنے۔ خودکش جلہو، بمب تراک و ٹِک کریسہ خلنگ آتیٹ فوج ئنا 202 افسر و کارندہ تیتون اوار 443 بندغ کسفنگانو۔ جعفر ایکسپریس سروس کن اِرا ہزار بیست و پنچ اسہ ڈکھیا ءُ سال اس ئس، ہراٹی بھاز آ بمب تراک، پول آتے نسخان رسیفنگ و 11 مارچ آ پشاور آ ہنوکا ٹرین ءِ ہائی جیک کننگ دا سال نا کل آتیان بھیم بش کروکا تدینی ئس و سال نا ایسری توہ تیٹ نوکنڈی فرنٹئر کور کیمپ آ جلہو آن بلوچستان ئٹی چین و بیرک گولڈ کمپنی نا کان کنی نا ڈٹ بندی تیا ہم بھاز منفی زہم آک تمور۔
اِرا ہزار بیست و پنچ نا سال تیوہ بلوچستان ئٹ آجوئی کن کاریم کروک سلہہ بند تنظیم بلوچ لبریشن آرمی، بلوچستان لبریشن فرنٹ و بلوچ ریپبلکن گارڈز نا جلہو آتیٹ ترندی بسنے و بھلا کچ ئنا جلہو آتیٹ ودکی نا رجحان برجاء مسنے۔
اِرا ہزار بیست و شش ئٹ بلوچستان نا بھلا ویل آتیٹ کمبوتی نا نشانی اف۔ اِرا ہزار بیست و پنچ نا ایسری آ بلوچستان گرینڈ الائنس نا ملازم آک بے قلم ہڑتال برجاء تخانو، ضلع کیچ ئٹ زوراکی ئٹ بیگواہ زالبول آتا آجوئی کن اوفتا خاہوت آک سی پیک کسر آ تولوک برانز کننگ ءُ و ریاستی تادی نا برخلاف سیاسی جہد ہم برجاء ءِ۔ بلوچ سلہہ بند تنظیم آتا جلہو آتا ترندی آن ریاستی مفاد آتے نسخان رسینگنگ ءِ، دا بھلا ویل آتیٹ پلویڑ آ بلوچستان نا جنگ زدہ حالیت آتیان نتیجہ کشنگ سخت اف کہ پوسکنا سال ئٹ ہم بلوچستان نا حالیت آک خراب ہی مرور۔