بلوچستان نا علاقہ بارکھان ئٹ رکشہ کتابجاہ نا بناء کننگانے۔ رکشہ کتابجاہ جتا علاقہ آتیا سر مریسہ چُنا و بھلا تے اسکان کتاب سر کننگے۔
داکان مالو کوہلو ئٹ اُچ کتابجاہ نا بناء کننگا ہرادے مخلوق دوست کرے و داسہ بارکھان ئٹ رکشہ کتابجاہ نا بناء کننگانے۔
رکشتہ کتابجاہ نا گام ءِ جندران ویلفئر فاونڈیشن ارفینے ہرادے الف لیلیٰ بُک بس سوسائٹی کمک کننگے۔ گل ئنا پاننگے کہ دا پروجیکٹ نا مسخت خوانندہ تیکن اُرا نا درغ آ کتاب سر کننگے۔
یاتی مرے داکان مالو ہم بلوچستان نا علاقہ تیٹ اُچ کتابجاہ تا گام ارفنگانے ہرا مُر علاقہ آتیٹ چُنا و بھلا تیکن کتاب سر کیرہ و ایلو پارہ غان بلوچستان نا بھاز آ علاقہ آتیٹ خوانندہ ورناک تینا کمک تینٹ کتابجاہ ٹہیفنگ ءُ۔
بلوچ خوانندہ گل “بساک” دا ردئٹ کتاب کاروان نا پن ئٹ بلوچستان نا بھازا علاقہ آتیٹ کتاب مُچی ہڈ تریسہ کرینے۔
یاتی مرے بلوچستان نا شار آتیٹ لائبریریک ساڑی ءُ ولے اوفتے بلوچ خوانندہ غاک تینا کمک تینٹ نا ردئٹ ٹہیفینو ایلو پارہ غا منہ بھلا شار آتیٹ ساڑی لائبریری تے حکومت بے پام کرینے ہراڑان اوفک بد حالیت ئٹی ءُ۔
